¹ A min ae̱n lokhua vbi okhumeimi khi o̱kposo ri o̱e̱e̱n vo egbe. Ukin ri vbi okpoto̱ awe so̱i, uvbierun oje lo̱mo̱n ikpaehie̱n igbeva o̱ri o̱i vbi uhumi. ² O̱han ma, o̱ vie̱ ebo̱ kei hin khue ekun bi udomi si o̱lo̱ghe vbia. ³ O̱kese̱, a chie min ae̱n o̱vbee vbi okhumeimi: Kae̱ogho! Idrago̱ni lokhua lo̱ vbae, lo̱ mo̱n uhumi ihio̱n, bi ike igbe, ivbierun oje ihio̱n lo̱ri o̱i vbi uhumi. ⁴ O̱ri ukpiriai so̱i we̱li ahin ea si ikpaehie̱n le ri vbi okhumeimi kua di oto̱i si agbo̱n re. O̱li idrago̱ni, o̱ muzan vbi isao si o̱lo̱kposo li o̱lo̱ ghe vbia na, lo̱i re̱ u khi o̱ kha ke vbia, lo̱ ire̱ gbi o̱lo̱mo̱n e. ⁵ O̱ o̱vbi o̱mo̱n mo̱he, lo̱ lo̱ ri ukpoto̱i ri uhumuroo ere̱me̱n shan. Aza mio̱in o̱li o̱mo̱n yi esi Oise̱le̱bua bi e̱kpeteo̱ba so̱i. ⁶ O̱li o̱kposo za la lode̱ vbi o̱dagbe, ebi Oise̱le̱bua e̱he̱n o̱ vbi oto̱i nai, ebi alo̱ za kue̱ o̱i shan vbi ikpe̱de̱ e̱gbe̱e̱n, egboigbe bi egbo̱ea. ⁷ Okho̱in za ri vbi okhumeimi. Imaike̱li bi ekhe̱n ange̱li so̱i, ya kpa o̱li idrago̱ni gbi egbe, o̱li idrago̱ni bi ekhe̱n ange̱li so̱i, ya gbo deli obo̱. ⁸ Ama, o̱li idrago̱ni o̱i toto se̱ vbi o̱li obo̱ so̱i lo̱ kpokhumi. Ehee ke guai vbi ayi oso vbi okhumeimi, yo̱in bi ekhe̱n ange̱li so̱i. ⁹ Idrago̱ni lo̱ kpo-o̱li e̱nye̱n lae cho̱i emi lo̱be da esun, lo̱ te̱e̱ agbo̱n ere̱me̱n e, a nwuio̱in fii di oto̱i re yo̱in bi ekhe̱n ange̱li so̱i, la khu di oto̱i re. ¹¹ Ekhuokho̱in so̱i, vbo̱hio̱ si e̱re si o̱li Ovbioghogho bi o̱li eta si o̱se̱e̱i si ain, erimidi khi ei hume̱ke̱in siain se̱ vbi e̱de uu. ¹² O̱hio̱ si o̱na, ya gho̱gho̱n, ekhe̱n okhumeimi, bi eli yan dia vbi e̱vbo. Ama, ikhueo o̱ yi ibiohan lo̱be; erimidi khi o̱ e̱n khi uvbi e̱ghe̱ ke re lo ke mo̱e̱n. ¹³ O̱li idrago̱ni ke e̱n kha khuo̱ di oto̱i re, o̱khui o̱lo̱kposo lo̱ vbi o̱mo̱n mo̱he shan. ¹⁴ Ama, awin ihuanabo̱ eva si akala li o̱lo̱kposo, lo̱ lo̱ re̱ meti tin lode̱ vbi eba e̱he̱n khe̱ o̱i vbi o̱dagbe. Aan li khi ebi alo̱ za kue̱ o̱i vbi e̱ghe̱, bi e̱ghe̱ lo̱bun bi usho̱mi e̱ghe̱, vbi uokho si o̱li e̱nye̱n lo khua. ¹⁵ O̱li e̱nye̱n o̱ kui ame̱n za vbi unu dianre bi e̱da, lo̱i gbe kho̱ lo̱ re̱ ri ikhuo so̱i khuo̱i raa le̱. ¹⁶ Ama, oto̱i za kpa yi o̱lo̱kposo obo̱. Oto̱i tan unu aan lo̱ re nwin ame̱da li o̱li idrago̱ni ku za vbi unu dianre o̱o̱n. ¹⁷ O̱kese, o̱han za totobo̱ bi o̱li idrago̱ni yi o̱li o̱kposo, o̱ za hua okho̱in buu elo̱ko̱re vbi uanmi so̱i, elo̱ re̱ o̱ vbi uhi si Oise̱le̱bua, le muzan vbi o̱se̱e̱ si o̱hio̱ si Ijesu. ¹⁸ O̱li idrago̱ni za o̱ muzan vbi okhumi ekhai si ikin si o̱lokun.