¹ Kamong katawhan sa Nineve, moabot na ang inyong mga kaaway aron pagsulong kaninyo. Busa pagbutang ug mga tigbantay sa ibabaw sa mga pader palibot sa siyudad! Bantayi ang mga kadalanan paingon sa siyudad! Pangandam sa pagpakig-away! Tigoma ang inyong mga kasundalohan! ² Bisan pa nga ang inyong mga kasundalohan naglaglag sa mga kaliwatan ni Jacob, himoon ni Yahweh ang ubang mga nasod nga mopasidungog kanila pag-usab. Ang mga manunulong gikan sa inyong nasod nga nagguba sa Israel ingon nga mga kaaway nga nangibot sa parasan, apan ang Israel mouswag pag-usab. ³ Ang mga taming sa mga kaaway nga kasundalohan nga moabot aron sa pag-ataki kaninyo nagsidlak nga pula ingon sa adlaw nga nagdan-ag kanila, ug mosuot sila ug masanagong pula nga mga bisti. Ang plata sa mga ligid sa ilang karwahe magkidlap sa dihang maglinya sila sa wala pa ang gubat, ug ang ilang mga kasundalohan mopataas sa ilang mga sipris nga bangkaw ug mokaway kanila. ⁴ Ang ilang mga karwahe maghaguros ngadto sa kadalanan sa Nineve ug bangis nga magdali-dali paingon sa mga plasa. Mosutoy daw kilat, sama sila sa nagdilaab nga mga sulo. ⁵ Magpatawag ang ilang hari sa iyang mga opisyal sa pagdali-dali ug duol nga mangadagma sila. Magdali-dali sila sa pagsulong sa pader sa siyudad; andamon nila ang dagko nga taming nga kahoy sa pagpanalipod sa moataki nga mga sundalo. ⁶ Pugson pag-abli sa mga kaaway nga sundalo ang mga ganghaan sa siyudad sa mga suba; ang palasyo mangahugno. ⁷ Huboon ang sanina sa rayna sa mga kaaway nga sundalo, ug ang iyang mga ulipon nga mga babaye modanguyngoy sama sa mga salampati ug mamukpok sa ilang mga dughan aron ipakita nga nasubo sila pag-ayo. ⁸ Nagdali-dali ang mga katawhan nga gikan sa Nineve sama sa sulog sa tubig nga gikan sa nabuak nga tigumanan. Mosinggit ang mga opisyal, "Hunong! Hunong!" apan ang katawhan wala man lang molingi sa ilang pagdagan. ⁹ Nagsultihanay sa matag-usa ang mga kaaway nga nag-ataki, "Kuhaa ang plata! Sakmita ang bulawan! Adunay dakong kantidad ug bililhon nga mga butang sa siyudad, daghang mga bililhon nga mga butang nga walay bisan usa nga makaihap!" ¹⁰ Sa dili madugay ang tanang bililhon nga butang diha sa siyudad mahimong panguhaon o mangaguba. Mangurog ang katawhan, tungod niini dili na sila makahimo sa pagpakig-away. Mangluspad ang ilang mga nawong sa kahadlok. ¹¹ Human kana nahitabo, ang mga tawo moingon, "Unsa man ang nahitabo sa bantogan nga siyudad sa Nineve? Sama kini sa langob nga puno sa gagmay nga mga liyon, sa diin ang laki ug baye nga mga liyon nagpuyo ug gipakaon ang gagmay nga mga liyon, nga diin wala silay gikahadlokan. ¹² Ang mga sundalo sa Nineve sama sa mga liyon nga mopatay ug motuok sa ubang mga mananap ug dad-on ang karne ngadto sa ilang taguanan." ¹³ Si Yahweh, nga pangulong anghel sa mga sundalo, miingon sa katawhan sa Nineve, "Ako inyong kaaway; sunogon ko ang inyong mga karwahe ug mag-aso. Ang inyong mga batan-ong lalaki patyon pinaagi sa mga espada. Ang tanang bililhon nga mga butang nga imong gikawat gikan sa ubang mga nasod mangahanaw. Ang inyong mensahero dili na gayod makakuha ug mensahe sa ubang mga nasod, nagmando nga ang ilang mga kasundalohan dili na mosukol kanila."