¹ Ako si Nahum, gikan sa baryo sa Elkosh. Mao kini ang mensahe mahitungod sa siyudad sa Nineveh, ang mensahe nga gihatag ni Yahweh kanako pinaagi sa panan-awon. ² Gidumtan ni Yahweh nga atong Dios ang mga diosdios nga nakigbatok kaniya. Nasuko siya pag-ayo niadtong nagsimba sa mga diosdios, ug padayon siya nga masuko sa iyang mga kaaway. ³ Si Yahweh dili daling masuko; apan siya gamhanan kaayo, ug dili siya mosulti nga walay sala ang iyang mga kaaway. Bisan asa siya molakaw, anaay mga alimpulos ug mga bagyo, ug ang mga panganod sama sa abog nga naukay sa iyang mga tiil. ⁴ Sa dihang iyang mandoan ang dagat ug ang sapa nga mauga, mauga gayod kini. Siya ang hinungdan nga mangalawos ang mga sagbot sa uma sa rehiyon sa Bashan ug didto sa Bukid sa Carmel, ug maoy hinungdan nga mangalaya ang mga bulak sa Lebanon. ⁵ Sa Dihang mopakita siya, mauyog ang mga kabukiran ug malanay ang mga kabungtoran; mokurog ang yuta ingon man ang katawhan sa yuta. ⁶ Walay bisan usa nga makaharong kaniya sa dihang siya hilabihan nga masuko; walay usa ang makaikyas sa dihang siya mapungot. Sa dihang siya labihan nga nasuko, sama kini sa nagdilaab nga kalayo, ug sama usab nga nadugmok ang kabukiran. ⁷ Apan maayo siya; gipanalipdan niya kita, nga iyang katawhan, sa dihang nakatagamtam kita ug mga kagubot. Giatiman niya kadtong nagsalig kaniya. ⁸ Apan iyang puohon ang iyang mga kaaway; mahimo siyang sama sa baha nga moguba sa tanan. Gukdon niya ang iyang mga kaaway hangtod ngadto sa mangitngit nga dapit kung asa nahimutang ang mga patay. ⁹ Busa walay kapuslanan alang kaninyo katawhan sa Nineveh nga maglaraw batok kang Yahweh. Dili kinahanglan nga mosulong siya sa makaduha aron sa pagguba kaninyo, kausa lamang siya mosulong aron sa pagguba kaninyo. ¹⁰ Kini sama nga ang iyang mga kaaway nahiktan sa mga sampinit ug sila magbarag sama sa mga tawo nga nakainom ug daghang bino. Kini sama nga sila masunog sama sa ugang dagami. ¹¹ Sa Nineveh adunay usa ka tawo nga mitambag sa katawhan aron sa pagbuhat ug hilabihan ka daotang mga butang batok kang Yahweh. ¹² Apan mao kini ang gisulti ni Yahweh alang kaninyo mga Israelita: "Bisan tuod kung daghan kaayo ang katawhan sa Assyria ug gamhanan kaayo ang ilang mga sundalo, magguba ug mawala sila. Miingon ako sa akong katawhan sa Judah, gisilotan ko na kamo, busa dili ko na kamo silotan pag-usab. ¹³ Karon himoon ko nga ang katawhan sa Assyria dili na gayod moulipon kaninyo; kini sama nga akong tangtangon ang kadena sa inyong mga kamot ug mga tiil." ¹⁴ Ug mao usab kini ang gipamulong ni Yahweh mahitungod kaninyo katawhan sa Nineveh: "Wala na kamoy mga kaliwatan nga mopadayon ug dala sa ngalan sa inyong pamilya. Ug akong pagagubaon ang mga rebulto sa inyong mga diosdios nga kinulit o giporma sa mga hulmahan. Ug patyon ko kamo ug ihatod sa inyong mga lubnganan, tungod kay hugaw kamo!" ¹⁵ Kamo nga katawhan sa Judah. Tan-awa! Ang usa ka mensahero molatas sa mga kabukiran, ug dad-on niya ang maayong balita kaninyo. Isulti niya kaninyo nga karon makaangkon na kamo ug kalinaw. Busa pagsaulog sa inyong kapistanhan, ug buhata ang inyong kinasingkasing nga gisaad nga buhaton sa dihang ang inyong mga kaaway mibahad sa pagsulong kaninyo, tungod kay ang inyong daotang mga kaaway dili na mosakop sa inyong nasod pag-usab, tungod kay hingpit silang nga maguba.