¹ Makalilisang nga mga butang ang mahitabo sa Nineve, kana nga siyudad nga napuno sa katawhan nga mopatay, mangawat ug mamakak. Ang siyudad nga napuno sa katawhan nga ang mga sundalo midala palayo gikan sa ubang mga nasod. ² Apan karon paminawa ang kaaway nga mga sundalo nga moabot aron mosulong sa Nineve; paminawa sila ang lagiti sa ilang mga latigo, ug paminawa ang dahunog sa mga ligid sa ilang karwahe! Paminawa ang ilang nagdagan nga kabayo ug ang ilang mga karwahe nga nag-untol untol! ³ Tan-awa ang ilang nagpangidlap nga mga espada ug nagsinawsinaw nga mga bangkaw ingon man ang pagsulong sa nagkabayo nga mga kalalakin-an! Daghan sa katawhan sa Nineve ang mamatay; magtipun-og ang mga minatay, busa daghan sa mga manunulong ang mangapandol sa mga patay nga lawas. ⁴ Mahitabo kanang tanan tungod kay ang Nineve sama sa usa ka babaye nga nagbaligya ug dungog nga maoy naglumay sa mga kalalakin-an aron nga sila mangalumpag; ang Nineve usa ka maanyag nga siyudad nga nakadani sa mga tawo sa ubang kanasoran aron pag-adto didto. Gitudloan sa mga katawhan sa Nineve kadtong mga tawo sa ubang kanasoran sa mga tulumanon sa salamangka, ug himoon sila nga ilang mga ulipon. ⁵ Busa si Yahweh, pangulo sa mga anghel nga sundalo, miingon sa katawhan sa Nineve: "Ako ang inyong kaaway, ug himoon ko ang katawhan sa ubang kanasoran nga makakita kaninyo nga maulawan pag-ayo sama sa usa ka babaye nga nakabuhat ug pagpanapaw nga naulawan pinaagi sa paghukas sa ilang sinina, mao nga ang mga tawo makakita sa ilang hubo nga lawas. ⁶ Himoon ko ang uban sa paglabay ug basura diha kanimo; ipakita ko sa uban ang akong hilabihan nga pagbiaybiay diha kanimo, ug himoon ko ang uban nga pakaulawan ka sa daghang tawo. ⁷ Kadtong tanan nga makakita kanimo motalikod sila kanimo ug moingon, 'nagun-ob ang Nineve, apan wala gayoy usa nga magbangotan niini. 'Nineve, walay usa nga gusto mohupay kanimo." ⁸ Ang imong siyudad sigurado nga dili na luwas nga dapit kaysa siyudad sa Tebes kaniadto. Ang Tebes usa ka mahinungdanon nga siyudad nga tupad sa Suba sa Nilo; ang suba nga daw sama sa usa ka pader nga nakapalibot kaniya. ⁹ Ang mga magmamando sa Etiopia ug Ehipto mitabang sa Tebes; walay kinutoban sa ilang gahom. Ang mga gobyerno nga duol sa mga nasod nga Put ug Libya katabang usab sa Tebes. ¹⁰ Bisan pa niana, ang Tebes nabihag, ang ilang katawhan gipapahawa. Ang iyang mga kabataan gipangwataswatas diha sa mga kadalanan sa siyudad. Nagripa ang mga kaaway nga sundalo aron paghukom kung si kinsa ang makakuha sa matag opisyal sa Tebes nga mahimo niyang ulipon. Gipangkadinahan ang tanan nga mga pangulo sa Tebes. ¹¹ Kamong katawhan sa Nineve sa gihapon mahimo nga malipong ug mahubog, ug mangita kamo ug mga dapit aron pagtago ug pag-ikyas gikan sa inyong mga kaaway. ¹² Gub-on sa imong mga kaaway ang mga pader nga nakapalibot sa siyudad, sama sa usa ka igera nga mao pay pagkahinog nga mahulog diha sa imong baba sa dihang inyong uyogon ang kahoy. Ingon niini ka sayon nga mabihag ang inyong siyudad. ¹³ Tan-awa ang imong mga sundalo! Mahisama sila ka huyang sa mga babaye! Ang ganghaan sa imong siyudad maabli pag-ayo aron nga makahimo ang imong mga kaaway sa pagsulod, ug unya ang mga rehas niadtong mga ganghaan mangasunog. ¹⁴ Pagpundo na daan ug tubig karon aron magamit sa dihang palibotan sa imong mga kaaway ang siyudad! Ayoha ang mga kota! Pagkalot ug kulonon ug tamaktamaki kini aron mahumok, ug ibutang kini ngadto sa hulmahan aron mahimong tisa aron pag-ayo sa mga pader! ¹⁵ Bisan paman niana, sunugon sa imong mga kaaway ang imong siyudad; pagapatyon ka nila sa ilang mga espada; pagapatyon ka nila sama sa mga dulon nga moguba sa mga pananom. Pag-una ug padaghana ang imong katawhan sama sa panon sa mga dulon ug mga apan-apan. ¹⁶ Sa imong siyudad daghan na kaayo ang mga negosyante; nga mas daghan pa sa kabituonan. Apan sa dihang ang imong siyudad maguba, kadtong mga negosyante mokuha sa bililhong mga butang ug mahanaw daw sama sa mga dulon nga kaonon ang dahon sa pananom ug unya manglupad palayo. ¹⁷ Ang imong mga pangulo sama usab sa usa ka panon sa mga dulon nga motugdon sa mga koral sa tingtugnaw nga panahon, ug unya manglupad palayo sa dihang ang adlaw mosidlak, ug walay usa nga nasayod kung asa sila. ¹⁸ Hari sa Asiria, ang imong mga opisyal mangamatay; ang imong mahinungdanon nga mga katawhan manghigda ug magpahulay sa kahangtoran. Ang imong katawhan magkatibulaag sa mga kabukiran, ug walay usa nga makatapok kanila. ¹⁹ Sama ka sa usa ka tawo nga adunay samad nga daw dili kini matambalan; ug kini nga samad mao ang hinungdan nga siya mamatay. Ug ang tanan nga makadungog mahitungod kung unsa ang nahitabo kanimo mopakpak sa ilang mga kamot ug magmaya. Moingon sila, "Ang matag-usa nag-antos tungod sa iyang mapinadayonong pagbuhat ug hilabihang kadaotan nganhi kanato."