¹ Karon sultihan ko kamo nganong nakig-away kamo diha sa inyong mga kaugalingon ug nagbangi sa usag usa. Kini tungod kay ang matag usa kaninyo gustong mobuhat sa daotang mga butang nga kalipay ninyong buhaton. Mga butang nga wala makapahimuot sa inyong isig ka mga magtutuo. ² Adunay mga butang nga gitinguha gayod ninyong maangkon, apan wala ninyo makuha kadtong mga butanga. Busa gusto ninyong patyon kadtong mobabag kaninyo gikan sa pagkuha niini. Nagtinguha kamo kung unsa ang naangkon sa ubang mga tawo, apan wala kamo makahimo sa pagkuha sa kung unsa ang inyong gitinguha, busa nakigbangi kamo ug nakig-away sa usag-usa. Wala kamo makaangkon kung unsa ang inyong ginatinguha tungod kay kamo wala nangayo sa Dios alang niini. ³ Bisan tuod ug kamo nangayo kaniya, siya wala naghatag kaninyo sa kung unsa ang inyong gipangayo tungod kay kamo nangayo alang sa sayop nga rason. Nangayo kamo sa mga butang aron nga magamit ninyo kini sa paglipay sa inyong kaugalingon sa daotang mga paagi. ⁴ Sama sa usa ka babaye nga dili matinud-anon sa iyang bana, kamo wala nagmatinud-anon sa Dios ug wala na gayod nagatuman kaniya. Kadtong nagkinabuhi nga daotan nga mga tawo nahisakop niining kalibotan ug mga kaaway sa Dios. Tingali wala kamo nakaamgo niana. ⁵ Sa pagkatinuod wala kamo maghunahuna nga kini walay hinungdan nga, ang Dios misulti kanato sa kasulatan nga ang Espiritu nga iyang gibutang dinhi kanato nangandoy kanato aron magpuyo ang atong kinabuhi sa paagi nga makapahimuot kaniya. ⁶ Apan ang Dios gamhanan ug maayo gayod kanato, ug gusto gayod siyang motabang kanato sa paghunong sa pagpakasala. Mao nga ang kasulatan nag-ingon, "Ang Dios nagbatok niadtong mga mapahitas-on, apan siya motabang niadtong mga mapainubsanon. ⁷ Busa ipailalom ang inyong kaugalingon ngadto sa Dios. Sukli ang yawa ug siya mopalayo gikan kaninyo. ⁸ Duol sa Dios uban sa espiritu. Kung buhaton ninyo, siya moduol diha kaninyo. Kamo nga mga makasasala, biyai ang daotang binuhatan ug buhata kung unsa lamang ang maayo. Kamo nga dili makahukom kon isalig ba ninyo ang inyong kaugalingon ngadto sa Dios, undanga ang paghunahuna ug sayop nga panghunahuna, ug paghunahuna lamang sa iyang panghunahuna. ⁹ Pagmasulob-on ug paghilak tungod sa sayop nga inyong nabuhat. Ayaw ug katawa, sa paglipay lamang sa kung unsa ang inyong hinakog nga tinguha. Hinuon, pagsubo tungod kay nakabuhat kamo ug daotan. ¹⁰ Ipaubos ang inyong kaugalingon atubangan sa Ginoo; kung buhaton ninyo kini, siya magpasidungog kaninyo. ¹¹ Akong mga igsoong lalaki ug mga igsoong babaye, undanga ang pagsulti ug daotan batok sa usag usa, tungod kay kadtong magsulti ug daotan batok sa isig ka magtutuo ug nagsilot sa usa nga sama sa igsoong lalaki o igsoong babaye ngadto kanila sa pagkatinuod nagsulti batok sa balaod nga gihatag kanato sa Dios aron tumanon. Kung kamo mosulti batok sa iyang balaod, kamo nagbuhat sama sa usa ka maghuhukom nga nagsilot niini. ¹² Apan sa pagkatinuod, adunay usa lamang nga diin adunay katungod sa pagpasaylo sa atong pagkadaotan ug sa pagsilot sa mga tawo, ug kana mao ang Dios. Siya lamang ang makahimo sa pagluwas sa mga tawo o sa paglaglag sa mga tawo. Kamo wala gayoy katungod sa pagpuli sa dapit sa Dios ug maghukom sa uban. ¹³ Pipila kaninyo magarbohon nga naga-ingon, "Karong adlawa o ugmang adlawa mangadto kami sa usa ka siyudad. Magpabilin kami ug usa ka tuig didto ug magpalit kami ug magbaligyag mga butang ug makatigom ug daghang kuwarta." Karon, paminaw kamo kanako! ¹⁴ Kinahanglan nga dili kamo mosulti sama niana, tungod kay wala kamo masayod kung unsa ang mahitabo ugmang adlawa, ug wala kamo masayod kung unsa kataas ang inyong pagpuyo! Ang inyong kinabuhi mubo, sama sa gabon nga mopakita sa mubong takna ug unya mawala. ¹⁵ Kay sa kung unsa ang inyong ipangsulti, kamo kinahanglang musulti, "Kung pagbuot sa Dios, kita magpuyo ug mobuhat niini, o mobuhat kita niana." ¹⁶ Apan ang inyong gibuhat mao ang pagpanghambog mahitungod sa mga butang nga inyong ginalaraw nga buhaton. Naghinambog kamo ug kana daotan. ¹⁷ Busa kung si bisan kinsa nga nasayod sa hustong butang nga iyang kinahanglang buhaton, apan wala niya kini buhata, siya nakasala.