¹ Akong mga igsoong lalaki ug babaye, ang kadaghanan sa inyo wala nagtinguha nga mahimong magtutudlo sa pulong sa Dios, tungod kay nakahibalo kamo nga ang Dios maghukom kanato nga mga magtutudlo nga mas labaw pa kaysa iyang paghukom sa ubang mga tawo. ² Sa daghang mga paagi nagbuhat kita kung unsa ang sayop. Apan kadtong nagpugong kung unsay ilang isulti mao kadtong tanan nga gitinguha sa Dios alang kanila. Makahimo sila sa pagugong sa tanan nilang mga buhat. ³ Sa paghulagway, kung magbutang kita ug usa ka renda ngadto sa baba sa kabayo aron nga ang kabayo motuman kanato, mapalihok nato ang dako nga lawas sa kabayo ug mapalakaw kini bisan asa nato gusto. ⁴ Hunahuna usab ang mga barko. Bisan tuod ang usa ka barko nga dako kaayo ug bisan tuod nga kini mapalihok pinaagi sa kusog nga hangin, apan pinaagi sa pagpatuyok sa gamay kaayo nga timon ang mga tawo makadumala sa barko bisan asa nila kini ipaadto. ⁵ Sa samang paagi, bisan tuod nga ang atong dila gamay kaayo, kung dili nato kini pugngan, makadaot kita sa tawo sa pagsulti ug dako, hunahunaa usab kung unsa lang ka gamay sa siga sa kalayo mahimong hinungdan sa usa ka dako nga sunog sa kalasangan. ⁶ Sama sa gamay nga kalayo nga makasunog sa kalasangan, kung mosulti kita ug mga butang nga daotan, makadaot kita ug daghang mga tawo. Kung unsa ang atong isulti nagapakita kini nga adunay daghang kadaot sa kinasuluran nato. Kung unsa ang atong gisulti makadalahig sa tanan natong gihunahuna ug gibuhat. Sama sa gamay nga siga sa kalayo nga dali kaayong makasunog sa tibuok palibot, kung unsa ang atong gisulti hinungdan sa mga anak nga lalaki ug babaye ug ilang mga kaliwatan nga mobuhat ug daotan sa tibuok nilang mga kinabuhi. Ang Yawa mismo nga nagadani kanato sa pagsulti ug daotan. ⁷ Sa pagkatinuod, bisan pa nga ang mga tawo makahimo sa pagpaanad sa tanang matang sa mga ihalas nga mga mananap, mga langgam, mga nagkamang ug mga binuhat nga nagpuyo sa tubig, ug ang mga tawo nga nagpaanad kanila, ⁸ walay tawo sa iyang kaugalingon ang makahimo sa pagpugong kung unsa ang iyang isulti. Ug sa dihang ang mga tawo mosulti ug daotan kaayo, nagpakita kini nga sila nagabuhat ug daotang mga butang nga wala nagpugong sa ilang mga kaugalingon. Sama sa lala sa usa ka bitin nga makapatay sa mga tawo, makadaot kita sa uban kung unsa ang atong ginasulti. ⁹ Gigamit nato ang atong dila sa pagdayeg sa Dios, nga atong Ginoo ug Amahan, apan gigamit usab nato ang atong susamang dila sa paghangyo sa Dios sa pagbuhat ug daotan ngadto sa mga tawo. Kana sayop kaayo, tungod kay gihimo sa Dios ang mga tawo sama sa iyang kaugalingon. ¹⁰ Atong gidayeg ang Dios, apan sa atong susamang baba gipangayo usab nato ang daotang mga butang nga mahitabo ngadto sa uban. Akong mga kaigsoonang lalaki ug babaye, kini dili gayud unta mahitabo! ¹¹ Sa pagkatinuod ang pait nga tubig ug ang maayo nga tubig dili mogawas sa samang tinubdan! ¹² Mga kaigsoonan kong lalaki ug babaye, ang usa ka kahoy nga igira dili mobunga ug Olibo. Ni ang usa ka parasan dili mobunga ug igos. Ni ang usa ka parat nga tinubdan mohatag ug maayo nga tubig. Sa samang paagi, kinahanglan mosulti lamang kita kung unsa ang maayo, ug dili kita mosulti kung unsa ang daotan. ¹³ Kung kinsa kaninyo ang maghunahuna nga kamo maalamon ug nakahibalo kaayo, kinahanglan kanunay kamong mobuhat sa usa ka maayo nga paagi sa pagpakita sa mga tawo nga ang inyong maayong mga binuhatan mao ang resulta sa inyong pagkamaalamon. Ang pagkamaalamon makatabang kanato sa pagbuhat nga malumo ngadto sa uban. ¹⁴ Apan kung kamo masinahon kaayo sa ubang mga tawo ug mamakak batok kanila ug magbuhat kanila ug sayop, dili kamo angay magpakaaron-ingnon nga kamo maalamon. Pinaagi sa pagpanghambog sama nga kamo nagsulti nga kung unsa ang tinuod mao ang bakak. ¹⁵ Kadtong naghunahuna sama niini dili maalamon sa paagi nga gusto sa Dios ipabuhat kanila. Hinuon, naghunahuna lamang sila ug nagbuhat sama sa mga tawo nga wala nagtahod sa Dios. Sila naghunahuna ug nagbuhat sumala sa ilang kaugalingon ug daotang tinguha. Nagbuhat sila sa gustong ipabuhat sa demonyo kanila. ¹⁶ ibutang sa hunahuna nga ang mga tawo nga adunay samang mga kinaiya niana wala nagpugong sa ilang mga kaugalingon. Nagkuha sila gikan sa ubang mga tawo ug nagbuhat nga daw ang ilang gibuhat husto, apan kini sayop, ug nagbuhat sila sa tanang matang nga daotan. ¹⁷ Apan sa dihang ang mga tawo maalamon sa paagi nga gusto sa Dios ipabuhat kanila, magabuhat sila nga walay sayop, diin ang Dios nag-isip nga mahinungdanon gayod kaayo. Nagatabang usab sila sa uban nga magpuyo nga malinawon, nagpakabana sila kung unsa ang gikinahanglan sa ubang mga tawo, andam sila sa paghatag sa mga pangandoy sa uban, aduna silay kalooy sa uban, ug nagbuhat sila sa tanang matang sa maayong mga butang alang sa uban. kung giunsa nila pagtagad ang uban wala nagbasi kung unsa sila ka mahinungdanon, ug sila magsulti ug magbuhat sa matinud-anon nga pamatasan. ¹⁸ Kadtong nagbuhat nga malinawon ngadto sa uban maoy hinungdan sa uban nga magbuhat usab sila ug kalinaw, ug ang sangpotan mao nga silang tanan magpuyo sa pagbuhat sa pagkamatarong.