¹ Gipakita ni Yahweh ang iyang pagkamaayo ngadto kang Sara, sama sa iyang giingon nga iyang buhaton. Gihimo niya kung unsa gayod ang iyang gisaad, ² kay namabdos siya ug nanganak ug usa ka lalaki alang kang Abraham bisan tigulang na kaayo siya, nianang panahona nagsaad ang Dios nga mahitabo gayod kini. ³ Ginganlan ni Abraham ug "Isaac" ang gipanganak ni Sara. ⁴ Gituli usab niya ang iyang anak nga si Isaac sa dihang walo ka adlaw pa lamang siya, sama sa gisugo sa Dios nga iyang buhaton. ⁵ Nagpanuigon si Abraham ug 100 ka tuig sa pagkatawo ni Isaac nga iyang anak nga lalaki. ⁶ Miingon si Sara, "Bisan nagmasulob-on ako kaniadto tungod kay wala akoy bisan usa ka anak, gipakatawa ako sa Dios uban sa kalipay, ug ang tanan nga makadungog mahitungod sa gibuhat sa Dios kanako mokatawa usab." ⁷ Miingon usab siya, "Walay nakasulti kang Abraham nga sa umaabot makapasuso pa ako ug bata, apan nakapanganak pa ako ug usa ka batang lalaki bisan tigulang na kaayo si Abraham." ⁸ Midako ang bata. Ug miabot ang adlaw nga lutason na siya sa gatas sa iyang inahan. Nianang adlawa, nagpahigayon si Abraham ug dako nga kombira. ⁹ Usa ka adlaw nakita ni Sara nga gibiaybiay si Isaac sa anak ni Hagar nga si Ismael. ¹⁰ Busa miingon si Sara ngadto kang Abraham, "Papahawaa kanang ulipong babaye nga taga-Ehipto ug ang iyang anak nga lalaki! Dili nako gusto nga makuha sa anak nianang ulipong babaye ang mapanunod sa akong anak nga si Isaac." ¹¹ Naguol pag-ayo si Abraham mahitungod niana, tungod kay nahangawa man usab siya mahitungod sa iyang anak nga si Ismael. ¹² Apan miingon ang Dios kang Abraham, "Ayaw kaguol mahitungod sa imong anak, nga si Ismael, ug mahitungod sa imong sulugoon nga si Hagar. Paminawa ang tanan nga isulti ni Sara nga imong buhaton, ug buhata kini, tungod kay si Isaac mao ang mamahimong katigulangan sa mga kaliwat nga akong gisaad aron ihatag kanimo. ¹³ Apan himoon ko usab ang anak sa imong sulugoon nga si Hagar nga mahimong gigikanan sa dakong pundok sa katawhan, tungod kay siya usab imong anak." ¹⁴ Busa sayo sa kabuntagon mibangon si Abraham. Giandam niya ang mga pagkaon, gibutang ang tubig sa panudlanan, ug gihatag kini kang Hagar. Gipapas-an niya ang panudlanan, gihatag kaniya si Ismael, ug gipalakaw sila ngadto sa kamingawan sa Beersheba. ¹⁵ Sa nahurot na ni Hagar ug sa iyang anak ang tubig sa ilang panudlanan, gibutang niya ang batang lalaki sa ilalom sa punoan sa kahoy. ¹⁶ Unya mipalayo siya ug naglingkod sa atbang, sama sa gilay-on sa tawo nga magpapana. Naghunahuna siya, "Dili ako makaako nga motan-aw sa akong anak nga mamatay!" Samtang naglingkod siya didto, nagsugod siya sa paghilak. ¹⁷ Unya nadungog sa Dios ang tingog ni Ismael, busa gipadala niya ang iyang usa ka anghel gikan sa langit aron motawag kang Hagar. Miingon siya, "Hagar, unsa may nahitabo kanimo? Ayaw kahadlok, tungod kay nadungog sa Dios ang paghilak sa bata didto. ¹⁸ Alsaha ang bata ug tabangi siya nga magmaisugon, tungod kay himoon ko ang iyang kaliwatan nga dakong pundok sa katawhan." ¹⁹ Unya gipakita sa Dios kaniya ang usa ka atabay nga may tubig. Busa miadto siya sa atabay ug gipuno ang panudlanan sa tubig, ug gipainom ang batang lalaki. ²⁰ Gitabangan sa Dios ang bata samtang nagdako siya didto sa kamingawan, ug nahimo siyang maayong magpapana. ²¹ Nagpuyo siya sa kamingawan sa Paran. Ug gipapangasawa siya ni Hagar ug taga-Ehipto. ²² Nianang panahona, si Haring Abimelec ug si Phicol, ang pangulo sa iyang kasundalohan, miingon kang Abraham, "Dayag gayod nga ang Dios nagtabang sa tanan nimong gibuhat. ²³ Busa karon, ipanumpa dinhi kanako, ingon nga naminaw ang Dios, nga dili mo ako pagalimbongan ug ang akong mga anak, o ang akong mga kaliwatan. Pagmatinud-anon kanako ug sa tanang katawhan dinhi sa nasod nga gipuy-an nimo karon. Pagmatinud-anon kanako, sama nga ako nagmatinud-anon diha kanimo." ²⁴ Busa nanumpa si Abraham nga buhaton niya kana. ²⁵ Mireklamo usab si Abraham kang Abimelec mahitungod sa usa sa atabay ni Abraham nga giilog sa sulugoon ni Abimelec. ²⁶ Apan miingon si Abimelec, "Wala ako masayod kung kinsay nagbuhat niana. Wala mo ako sultihi kaniadto, ug wala ako makadungog mahitungod niini hangtod karon." ²⁷ Busa gidala ni Abraham ang pipila ka karnero ug mga baka ug gihatag ngadto kang Abimelec, ug nagkasinabot sila nga magmalinawon sa usag-usa. ²⁸ Miadto si Abraham sa panon sa iyang karnero ug nagpili ug pito ka mga bayeng karnero gikan niini. ²⁹ Nangutana si Abimelec kang Abraham, "Nganong nagkuha ka man niining pito ka mga bayeng karnero gikan sa panon sa imong karnero?" ³⁰ Mitubag si Abraham, "Gusto nako nga dawaton nimo kining pito ka mga bayeng karnero gikan kanako. Sa niini nga paagi, ang akong gasa alang kanimo magpamatuod sa tanan nga kining atabaya akoa gayod tungod kay ako man ang nagkalot niini." ³¹ Busa gidawat ni Abimelec ang mga karnero. Unya ginganlan kini ni Abraham ug Beersheba, nga nagpasabot 'Atabay sa pagpanumpa,' tungod kay siya ug si Abimelec nanumpa man didto nga magmalinawon ang usag-usa. ³² Human nila mabuhat ang kasabotan didto sa Beersheba, si Abimelec ug ang pangulo sa iyang kasundalohan, nga si Phicol, mibiya ug mipauli ngadto sa yuta sa mga Filistihanon. ³³ Nagtanom si Abraham didto ug kahoy nga tamarisko, ug gisimba niya si Yahweh, ang walay kataposan nga Dios. ³⁴ Nagpuyo si Abraham ingon nga usa ka langyaw sa yuta sa katawhan sa Filistihanon sa dugay nga panahon.