¹ Mibiya si Abraham sa Mamre ug mibalhin sa habagatang-kasadpan sa kamingawan sa Negeb. Nagpuyo siya didto taliwala sa Kades ug Sur. Nagpuyo siya ingon nga usa ka langyaw didto sa lungsod sa Gerar. ² Samtang atua siya didto, giingnan niya ang mga tawo nga igsoon niya si Sara ug dili niya kini asawa. Unya si Haring Abimelec sa Gerar nagpadala ug pipila sa iyang mga tawo sa pagkuha kang Sara, ug gidala nila siya ngadto kaniya aron mahimong iyang asawa. ³ Apan nagpakita ang Dios kang Abimelec sa damgo sa panahon sa kagabhion ug miingon kaniya, "Paminawa ako! Mamatay ka tungod kay ang babaye nga imong gikuha asawa sa laing lalaki." ⁴ Apan wala nakigdulog si Abimelec kaniya, busa miingon siya, "Ginoo, sanglit ang katawhan sa akong nasod ug ako wala man nakasala, patyon mo ba kami? ⁵ Miingon si Abraham kanako, 'Igsoon nako siya,' ug miingon usab si Sara, 'Igsoon nako siya.' Wala ako nagtinguha sa pagbuhat ug dili maayo; wala usab ako nakabuhat ug dili maayo." ⁶ Miingon ang Dios kaniya, "Oo, nasayod ako nga dili nimo gusto nga mobuhat ug daotan. Mao nga gipugngan ko ikaw sa pagpakasala batok kanako. Wala ko ikaw gitugotan sa pagpanghilabot kaniya. ⁷ Busa, iuli siya sa iyang bana, tungod kay usa siya ka propeta. Mag-ampo siya kanimo aron mabuhi ka. Apan kung dili nimo siya iuli kaniya, mamatay ka gayod, ug ang tanang nasakop sa imong panimalay mamatay gayod." ⁸ Sayo sa kabuntagon, gipatawag ni Abimelec ang tanan niyang mga opisyal ug gisultihan sila sa tanang nahitabo. Pagkadungog nila niini, nahadlok pag-ayo ang iyang mga tawo nga silotan sila sa Dios. ⁹ Unya gipatawag ni Abimelec si Abraham, ug miingon kaniya, "Wala unta nimo kini gibuhat kanamo! Aduna ba akoy nabuhat nga sayop kanimo? Gihatagan ko ba ikaw ug rason aron nga himuon kaming sad-an sa dakong sala? Nakabuhat ka ug mga butang nganhi kanako nga dili unta nimo angay buhaton! ¹⁰ Nganong gibuhat man nimo kini?" ¹¹ Mitubag si Abraham, "Miingon ako nga igsoon nako siya tungod kay naghunahuna ako nga, 'Ang katawhan niini nga dapit wala gayod nagtahod sa Dios. Nagabuhat gayod sila sa bisan unsang daotan nga mga butang nga buot nila. Busa patyon nila ako aron kuhaon ang akong asawa.' ¹² Labot pa niana, mahimo gayod nga isipon nga igsoon nako si Sara, tungod kay anak siya sa akong amahan bisan tuod dili siya anak sa akong inahan. Anak siya sa laing babaye, ug giminyoan nako siya. ¹³ Sa dihang giingnan ako sa Dios nga mohawa gikan sa panimalay sa akong amahan, miingon ako kang Sara, 'Mao kini ang paagi nga ipakita nimo nga matinud-anon ka kanako: Bisan asa kita moadto, ang isulti nimo mahitungod kanako, "Mao kini ang akong igsoon."" ¹⁴ Busa nagdala si Abimelec ug pipila ka mga karnero ug baka ug gihatag kini kang Abraham. Naghatag usab siya kaniya ug pipila sa iyang mga ulipon nga babaye ug lalaki. Unya giuli niya kang Abraham ang iyang asawa nga si Sara. ¹⁵ Ug miingon si Abemelec kaniya, "Tan-awa! Kanang imong giatubangan, mao kana ang akong yuta. Pagpuyo bisan asa nimo gusto!" ¹⁶ Ug miingon siya kang Sara, "Tan-awa! Mohatag ako ug 1,000 kabuok nga plata sa imong igsoon. Mao kini ang pagsiguro nga wala nay mohisgot niining mga butanga pag-usab ug mag-ingon nga nakabuhat ka sa mga butang nga dili maayo." ¹⁷ Unya nag-ampo si Abraham sa Dios, ug giayo sa Dios ang asawa ni Abimelec ug ang iyang mga ulipong mga babaye aron makabaton sila ug anak. ¹⁸ Tungod kay gihimo kini ni Yaweh nga dili mahimong makabaton ug mga anak ang si bisan kinsa sa mga kababaihan sa panimalay ni Abimelec, tungod kay gikuha ni Abimelec si Sara nga asawa ni Abraham.