¹ Nianang gabhiona, ang duha ka mga anghel miabot sa Sodoma. Naglingkod si Lot sa ganghaan sa siyudad. Sa dihang nakita niya sila, mitindog siya sa pag-abiabi kanila ug mihapa siya sa yuta. ² Miingon siya kanila, "Sir, palihog pabilin kamo sa akong balay karong gabhi-ona. Makahimo kamo sa paghugas sa inyong mga tiil, ug ugma sa sayo makapadayon na kamo sa inyong panaw." Apan miingon sila, "Dili, diha lang kami matulog sa plasa sa siyudad." ³ Apan gipugos gayod sila ni Lot nga didto matulog sa iyang balay. Busa misulod sila sa iyang balay, ug nag-andam siya ug pagkaon alang kanila. Nagluto siya ug pipila ka pan nga walay patubo, ug gikaon nila kini. ⁴ Pagkahuman nila ug kaon, sa wala pa sila miadto sa higdaanan, ang tanang mga lalaki sa siyudad sa Sodoma, gikan sa mga batan-on ngadto sa mga tigulang, mipalibot sa balay. ⁵ Gitawag nila si Lot, nga nag-ingon, "Hain na man ang mga lalaki nga miabot sa imong balay karong gabhiona? Ipagawas sila, aron nga makigdulog kami kanila!" ⁶ Nigawas si Lot sa balay ug gisirad-an ang pultahan, aron dili sila makasulod. ⁷ Miingon siya kanila, "Akong mga higala, ayaw ninyo buhata kanang daotang butang! ⁸ Paminaw kanako. Aduna akoy duha ka mga anak nga babaye nga wala pa gayod nakigdulog sa bisan kinsang lalaki. Tugoti ako karon sa pagdala kanila nganha kaninyo, ug mahimo ninyong buhaton ngadto kanila ang bisan unsa nga makapalipay kaninyo. Apan ayaw ninyo hilabti kining mga tawhana, tungod kay ako silang mga bisita, busa kinahanglan nako silang panalipdan!" ⁹ Apan mitubag sila, "Pahawa sa among agianan! Usa ka lang ka langyaw; mao nga wala kay katungod nga magsulti kanamo kung unsa ang husto! Mas daotan pa ang buhaton namo kanimo kay sa among buhaton kanila!" Unya midasmag sila kang Lot ug gipugos pagguba ang pultahan. ¹⁰ Apan maampingon nga giablihan sa duha ka anghel ang pultahan, ug gibira nila si Lot pasulod sa balay. Unya gisirad-an dayon nila ang pultahan. ¹¹ Pagkahuman gibutahan nila ang tanang tawo nga anaa sa gawas sa balay, mga batan-on ug mga tigulang, aron nga dili sila makatultol sa pultahan. ¹² Unya miingon ang duha ka anghel kang Lot, "Kinsa paman ang imong mga kauban dinhi? Kung aduna kay mga anak nga lalaki o mga umagad o mga anak nga babaye o bisan kinsa dinhi sa siyudad nga adunay kalambigitan kanimo, ubana sila pagawas sa siyudad, ¹³ tungod kay laglagon namo kining dapita. Nadungog ni Yahweh ang daghang mga mangilngig nga mga butang nga giingon sa pipila ka mga tawo mahitungod niining siyudara, ug gipadala niya kami aron sa paglaglag niini." ¹⁴ Busa miadto si Lot ug nakigsulti sa mga lalaki nga nagsaad nga makigminyo sa iyang duha ka mga anak nga babaye. Miingon siya kanila, "Pagdali! pahawa na niini nga siyudad, tungod kay laglagon kini ni Yahweh!" Apan ang iyang umaabot nga mga umagad naghunahuna nga nagtiaw-tiaw lang siya. ¹⁵ Sa dihang nagbanagbanag na ang kabuntagon, ang duha ka mga anghel nag-awhag kang Lot, nga nag-ingon, "Pagdali ug bangon! Dad-a ang imong asawa ug ang imong duha ka mga anak nga babaye nga kauban nimo karon ug lakaw na! Kung dili ka mobiya, mahiapil kamo sa dihang laglagon namo ang siyudad!" ¹⁶ Sa dihang nagduhaduha si Lot, gigunitan sa mga anghel ang iyang kamot ug ang kamot sa iyang asawa ug sa iyang mga anak nga babaye. Gihatod nila sila sa gawas sa siyudad nga luwas. Gibuhat kadto sa mga anghel tungod kay manggiluluy-on si Yahweh kanila. ¹⁷ Sa dihang anaa na sila sa gawas sa siyudad, ang usa sa mga anghel miingon, "Kung gusto pamo nga mabuhi, pagdali kamo ug dagan! Ayaw na paglingi! Ug ayaw na paghunong bisan asa sa walog! Dagan ngadto sa kabungtoran! Kung dili ninyo kana buhaton, mamatay kamo!" ¹⁸ Apan miingon si Lot sa usa kanila, "Dili, sir, ayaw kana ipabuhat kanako! ¹⁹ Palihog, paminaw. Nahimuot ka kanako ug maayo kaayo ka kanako ug imong giluwas ang akong kinabuhi. Apan dili ako makahimo sa pagdagan padulong sa bukid. Kung sulayan ko ang pagbuhat niana, mamatay ako niini nga katalagman. ²⁰ Paminawa ako, adunay lungsod nga duol dinhi, tugoti ako sa pagdagan didto karon. Gamay lamang kini nga lungsod, ug kung dili nimo kini laglagon, maluwas ang among kinabuhi kung moadto kami didto." ²¹ Ang usa sa mga anghel miingon kang Lot, "Tugotan ko ikaw sa pagbuhat sa imong gihangyo. Ug dili nako laglagon ang lungsod nga imong ginaingon. ²² Apan pagdali! Dagan na didto, tungod kay dili nako malaglag ang bisan unsa hangtod nga dili ka makaabot sa maong dapit." human niadto ginganlan sa mga tawo ang lungsod ug Zoar, nga nagpasabot nga 'Dili mahinungdanon,' tungod kay miingon si Lot nga gamay kini nga baryo. ²³ Sa dihang misubang na ang adlaw, si Lot ug ang iyang pamilya nakaabot na sa lungsod nga gitawag na karon ug Zoar. ²⁴ Unya gihulog ni Yahweh ang kalayo ug ang nagdilaab nga asupre ngadto sa Sodoma ug Gomora sama sa ulan nga gikan sa langit. ²⁵ Niana nga paagi, gilaglag niya kadtong mga siyudara ug ang tanan nga mga tawo nga nagpuyo niadto nga mga siyudad. Gilaglag usab niya ang tanang butang sa walog, lakip na ang mga tanom. ²⁶ Apan ang asawa ni Lot mihunong ug milingi aron makita kung unsa ang nagakahitabo, busa namatay siya, ug ang iyang lawas nahimong haligi nga asin. ²⁷ Niana nga buntag, mibangon si Abraham ug miadto sa dapit diin mitindog siya sa atubangan ni Yahweh. ²⁸ Milantaw siya sa Sodoma ug Gomora, ug nakurat siya sa pagtan-aw sa tibuok walog nga nag-aso, sama sa aso sa dakong hudno. ²⁹ Busa sa dihang giguba sa Dios kadto nga mga siyudad sa walog, wala siya nalimot sa pagtabang kang Abraham, ug giluwas niya si Lot gikan sa katalagman nga nahitabo sa mga siyudad nga gipuy-an ni Lot. ³⁰ Nahadlok si Lot nga magpuyo didto sa Zoar, busa mibiya siya didto uban sa iyang duha ka mga anak nga babaye ug miadto sa bukid, ug nagpuyo sila sa langub. ³¹ Usa ka adlaw miingon ang maguwang nga anak nga babaye ngadto sa iyang manghod nga babaye, "Tigulang na ang atong amahan, ug walay lalaki dinhing dapita nga makigdulog kanato, sama sa ginabuhat sa mga tawo sa kalibotan. ³² Paimnon nato ang atong amahan ug bino hangtod mahubog siya. Unya makahimo na kita sa pagpakigdulog kaniya nga dili siya makahibalo. Niana nga paagi mabuntis kita pinaagi kaniya ug makabaton kita ug mga anak nga mahimong mga kaliwat sa atong amahan." ³³ Busa nianang gabhiona gihubog nila ang ilang amahan. Ug ang maguwang nga anak nga babaye nakigdulog sa iyang amahan, apan nahubog siya pag-ayo nga wala siya nasayod kung kanus-a mihigda ang iyang anak nga babaye uban kaniya o kung kanus-a siya mibangon. ³⁴ Pagkasunod adlaw, miingon ang iyang kinamaguwangang anak nga babaye ngadto sa iyang manghod nga babaye, "Paminawa ako. Nakigdulog ako sa atong amahan kagabii, hubogon na usab nato siya karong gabhi-ona! Niining higayona ikaw na ang makigdulog kaniya. Kung makigdulog siya kanimo, mabuntis ka ug makabaton ka usab ug anak." ³⁵ Busa nianang gabhiona, gihubog na usab nila ang ilang amahan pinaagi sa bino, unya ang kinamanghurang anak nga babaye nakigdulog kaniya. Sa gihapon, nahubog kaayo siya ug wala siya nasayod kung kanus-a mihigda ang iyang anak nga babaye o kung kanus-a siya mibangon. ³⁶ Busa si Lot ang hinungdan nga nabuntis ang iyang duha ka mga anak nga babaye. ³⁷ Ang kinamaguwangan nanganak ug batang lalaki, nga ginganlan niya ug Moab. Siya ang nahimong kagikan sa mga Moabnon. ³⁸ Ang manghud usab nanganak ug usa ka batang lalaki, nga ginganlan niya ug Ben Ammi. Siya ang nahimong kagikan sa katawhan nga gitawag ug Amonihanon.