¹ Usa ka adlaw nianang tuiga, sa panahon nga init kaayo, nagpakita pag-usab si Yahweh kang Abraham duol sa dako nga kahoy nga iya ni Mamre. Naglingkod si Abraham sa pultahan sa iyang tolda. ² Sa paghangad ni Abraham nahibulong siya sa pagkakita niya sa tulo ka tawo nga nagtindog duol kaniya. Pagkakita niya kanila, midagan siya aron sa pag-abi-abi kanila. Mihapa siya sa yuta isip pagtahod kanila. ³ Giingnan niya ang usa kanila, "Ginoo, kung gikahimut-an mo ako, pabilin usa' dinhi sa makadiyot. ⁴ Tugoti ang akong mga sulugoon sa pagdala ug gamay nga tubig ug sa paghugas sa inyong mga tiil, ug unya pahulay kamo ilalom niining kahoya. ⁵ Sanglit mianhi man kamo kanako, tugoti ako sa pagdalit kaninyo ug pipila ka pagkaon aron makatigom kamo ug igong kusog sa dili pa kamo mobiya." Mitubag ang tawo, "Kon mao kana, buhata ang imong giingon." ⁶ Midali pag-adto si Abraham ngadto sa tolda ug giingnan niya si Sara, "Pagdali, pagkuha ug 20 kilos sa pinakamaayo natong harina ug paghimo ug pipila ka pan!" ⁷ Unya midali siya pag-adto sa mga baka ug nagpili ug usa ka nati nga humok ug lami ang unod. Gihatag niya kini sa usa sa iyang mga sulugoon, nga nagdali sa pag-ihaw ug sa pagluto niini. ⁸ Sa dihang naluto na ang karne, gidala ni Abraham ang pipila ka mantikilya, gatas, ug karne nga giandam sa mga sulugoon. Gibutang niya kini sa ilang atubangan. Unya samtang nangaon sila nagtindog siya duol kanila ilalom sa usa ka kahoy. ⁹ Human sa ilang pagpangaon, nangutana sila kaniya, "Diin man si Sara, nga imong asawa? Mitubag siya, "Anaa siya sa sulod sa tolda." ¹⁰ Unya miingon ang pangulo sa grupo, "Mobalik ako kaninyo sa tingpamulak sa sunod tuig, ug paminaw, ang imong asawa nga si Sara makabaton ug anak nga lalaki." Nahitabo kadto nga si Sara naminaw sa pultahan sa tolda, nga anaa sa likod sa tawo nga nag-istorya. ¹¹ Karon si Abraham ug si Sara tigulang na kaayo, ug si Sara wala na abti sa iyang binulan. ¹² Busa mikatawa si Sara sa iyang kaugalingon, naghunahuna, "Ang akong lawas nangunot na, ug ang akong bana tigulang na. Busa unsaon paman nako paglipay sa pagbaton ug anak?" ¹³ Miingon si Yahweh kang Abraham, "Nganong mikatawa man si Sara? Nganong naghunahuna man siya nga, 'Tigulang na kaayo ako, unsaon pa man nako pagkabaton ug anak?' ¹⁴ Aduna bay mga butang nga lisod alang kanako? Mobalik ako sa sunod tuig sa samang tuig sa tingpamulak, ang panahon nga ako nang gitagana, ug makabaton na si Sara ug usa ka anak nga lalaki." ¹⁵ Unya nahadlok si Sara, busa nilimod siya ug nag-ingon, "Wala man ako mikatawa." Apan si Yahweh nag-ingon, "Ayaw na kana ilimod! Kay mikatawa ka gayod." ¹⁶ Sa dihang nanindog na ang tulo ka tawo, gitan-aw nila ang walog paingon sa siyudad sa Sodoma. Niuban ug lakaw si Abraham kanila aron sa pagpanamilit. ¹⁷ Nag-ingon si Yahweh sa iyang kaugalingon, "Dili maayo alang kanako nga dili ipahibalo kang Abraham ang plano nga akong pagabuhaton. ¹⁸ Kay ang kaliwat ni Abraham mahimo mang dako ug gamhanang pundok sa mga tawo. Ug ang mga tawo sa tanang pundok sa katawhan mapanalanginan tungod sa akong pagabuhaton kaniya. ¹⁹ Gipili ko siya aron mogiya sa iyang mga anak ug sa ilang mga pamilya aron sundon nila ako ug pagabuhaton nila kung unsa ang insakto ug makiangayong buhat, busa pagabuhaton ko kang Abraham kung unsa ang akong gisaad nga buhaton alang kaniya." ²⁰ Busa nag-ingon si Yahweh ngadto kang Abraham, "Nadungog ko ang mangilngig nga mga butang nga ginasulti mahitungod sa mga tawo sa Sodoma ug Gomora. Hilabihan na kaayo kadako ang ilang mga sala. ²¹ Busa molugsong ako karon, ug sutaon ko kung tinuod ba o dili ang mangilngig nga mga butang nga akong nadungog." ²² Unya ang duha ka tawo mitalikod na ug milakaw padulong sa Sodoma. Apan si Abraham nagpabilin pa ug nagtindog sa atubangan ni Yahweh. ²³ Mipaduol si Abraham kaniya ug miingon, "Laglagon mo ba ang mga tawo nga walay gibuhat nga sala uban sa daotang mga tawo? ²⁴ Unsa man ang imong pagabuhaton kung adunay 50 ka mga tawo diha sa siyudad nga walay gibuhat nga daotan? Imo ba gayong laglagon silang tanan, ug dili luwason ang lugar alang niadtong 50 ka matarong nga mga tawo nga walay gibuhat nga daotan? ²⁵ Dili mo gayod buhaton kanang mga butanga, nga mopatay sa mga matarong nga tawo uban sa daotang mga tawo, ug tagdon ang mga matarong nga tawo ug daotang mga tawo sa samang paagi. Dili mo kana mahimo, tungod kay ikaw, mao man ang manghuhukom sa matag-usa dinhi sa kalibotan, nga mobuhat gayod kung unsa ang husto mahitungod sa mga tawo sa Sodoma!" ²⁶ Mitubag si Yahweh, "Kung makakaplag ako ug 50 ka mga tawo sa Sodoma nga walay gibuhat nga daotan, dili nako laglagon ang tibuok nga dapit alang kanila." ²⁷ Mitubag si Abraham, "Dili unta ako angay mangahas sama niini nga makigsulti kanimo, akong Ginoo, tungod kay sama lamang ako ka walay pulos sa abog ug sa mga abo. ²⁸ Apan unsa may imong pagabuhaton kung adunay 45 ka mga tawo nga walay gibuhat nga daotan? Imo ba gayong laglagon ang tanan diha sa tibuok siyudad tungod kay aduna lamang 45 ug dili 50 ka mga tawo nga matarong?" Mitubag si Yahweh, "Dili ko kini pagalaglagon kung makakaplag ako nga adunay 45 ka mga tawo nga matarong." ²⁹ Nagpadayon sa pagpakigsulti si Abraham ngadto kaniya sa samang paagi, ug miingon, "Unsa man ang imong pagabuhaton kung makakaplag ka nga adunay 40 lamang ka mga tawo nga maayo didto?" Mitubag si Yahweh, "Dili ko pagalaglagon silang tanan, alang niadtong 40." ³⁰ Nag-ingon si Abraham, "Palihog ayaw kasuko. Tugoti ako sa pagsulti pag-usab. Unsa may imong pagabuhaton kung adunay 30 ka mga tawo nga maayo?" Mitubag siya, "Dili ko kana buhaton kung makakaplag ako nga adunay 30 didto. ³¹ Nag-ingon si Abraham, "Dili unta ako angay mangahas nga makigsulti kanimo sama niini, akong Ginoo. Apan unsa may imong buhaton kung makakaplag ka nga adunay 20 na lamang ka mga maayong tawo didto?" Mitubag siya, "Dili ko pagalaglagon ang tibuok siyudad, alang niadtong 20." ³² Sa kataposan, nag-ingon si Abraham, "Akong Ginoo, hinaot nga dili ka masuko. Tugoti ako sa pagpangutana sa makausa nalang ka higayon. Unsa may imong pagabuhaton kung makakaplag ka nga adunay napulo na lamang ka mga maayong tawo didto?" Mitubag si Yahweh, "Dili ko pagalaglagon ang siyudad alang niadtong napulo." ³³ Wala na nangutana pa si Abraham. Pagkahuman gayod sa pagpakigsulti ni Yahweh kang Abraham, mibiya siya, ug mipauli sa balay si Abraham.