¹ Sa dihang 99 na ang pangidaron ni Abram, mipakita si Yahweh kang Abram pag-usab ug miingon kaniya, "Ako ang Dios nga makagagahom. Gusto ko nga magkinabuhi ka sa paagi nga akong gusto. Gusto ko nga dili ka magbuhat ug bisan unsa nga sayop. ² Pamatud-an ko ang akong kasabotan tali kanato, ug padaghanon ko pag-ayo ang imong mga kaliwat." ³ Miyukbo si Abram sa yuta. Unya miingon ang Dios kaniya, ⁴ "Paminawa kini! Mao kini ang kasabotan nga akong himoon kanimo: Mahimo kang amahan sa daghang mga pundok sa katawhan. ⁵ Dili na Abram ang imong ngalan. Hinuon, mahimo nang Abraham ang imong ngalan, tungod kay himoon ko ikaw nga amahan sa daghang mga pundok sa katawhan. ⁶ Hatagan ko ikaw ug daghan kaayong mga kaliwat, ug himoon ko ang mga nasod ug ang mga hari taliwala kanila. ⁷ Himoon ko kini nga kasabotan tali kanako ug kanimo ug sa mga kaliwatan sa imong mga kaliwat human kanimo sa kahangtoran. Tungod niini nga kasabotan, mosimba ka ug mosunod kanako ingon nga Dios, ug mao usab ang imong mga kaliwat. ⁸ Ihatag ko kanimo ug sa imong mga kaliwat ang yuta sa Canaan, ang tibuok yuta sa Canaan, nga diin ikaw nagpuyo karon. Magpanag-iya sila niini hangtod sa kahangtoran, ug mahimo nila akong Dios." ⁹ Unya miingon ang Dios kang Abraham, "Karon kinahanglan tumanon nimo ang imong bahin sa kasabotan nga akong buhaton kanimo, ug kinahanglan usab mosunod ang imong mga kaliwat niini, alang sa tanang mga kaliwatan. ¹⁰ Mao kini ang gikinahanglan sa kasabotan nga akong gihimo tali kanako ug kanimo ug sa tanan nimong mga kaliwat: Kinahanglan nga magpatuli ang matag lalaki nga anaa kaninyo. ¹¹ Ang pagtuli kanila mahimong timailhan nga gidawat nimo ang kasabotan nga akong gihimo kanimo. ¹² Ang matag batang lalaki nga anaa kaninyo kinahanglan nga tulion sa walo pa lamang ka adlaw ang ilang pangidaron, sa tanang umaabot nga mga kaliwatan. Naglakip kana sa mga batang lalaki sa inyong panimalay ug niadtong natawo gikan sa mga ulipon nga gipalit, ug mga langyaw nga nagpuyo kaninyo apan dili sakop sa inyong panimalay. ¹³ Dili kini igsapayan kon ang ilang mga ginikanan miyembro ba sa inyong panimalay o mga ulipon nga inyong gipalit; kinahanglan nga matuli silang tanan. Ang inyong mga lawas aduna niini nga timailhan sa pagpakita nga gidawat ninyo ang walay kataposan nga kasabotan nga akong gihimo. ¹⁴ Kinahanglan nga papahawaon ninyo sa inyong komunidad kung adunay si bisan kinsa nga lalaki ang wala natuli, tungod kay kana nga tawo misupak sa akong kasabotan." ¹⁵ Miingon usab ang Dios kang Abraham, "Si Sarai, ang imong asawa, kinahanglan nga dili na nimo siya tawagon ug Sarai. Usabon ko usab ang iyang ngalan. Mahimo nang Sara ang iyang ngalan . ¹⁶ Panalanginan ko siya, ug sigurado gayod nga makaanak siya ug anak nga lalaki alang kanimo. Ug panalanginan ko siya pag-ayo nga mahimo siyang katigulangan sa katawhan sa daghang kanasoran. Ang mga hari ug mga pundok sa mga tawo mahimong kaliwat nga gikan kaniya." ¹⁷ Mihapa si Abraham sa yuta isip pagtahod atubangan sa Dios. Apan mikatawa siya samtang miingon siya sa iyang kaugalingon, "Makahimo pa ba ang usa ka tawo nga 100 na ang pangidaron nga mahimong amahan sa usa ka batang lalaki? Ug sanglit si Sara 90 na ang pangidaron, unsaon pa man niya pagpanamkon sa usa ka bata?" ¹⁸ Unya miingon si Abraham sa Dios, "Tingali tugotan nimo si Ismael nga makadawat ug panalangin ug makapanunod sa tanan nakong gipanag-iya." ¹⁹ Unya mitubag ang Dios "Dili! Ang imong asawa nga si Sara manganak ug usa ka bata alang kanimo. Kinahanglan panganlan nimo siya ug Isaac. Pagatukoron ko ang akong kasabotan uban kaniya, ang usa nga walay kataposan nga kasabotan uban kaniya ug sa iyang mga kaliwat. ²⁰ Mahitungod kang Ismael, nadungog ko nga naghangyo ka kanako nga aduna akoy himoon kaniya. Panalanginan ko siya aron nga makabaton usab siya ug daghang mga kaliwat. Ang uban sa iyang mga kaliwat mahimong mga pangulo sa dose ka mga tribo. Ug himoon nako nga ang iyang mga kaliwat mahimong dako nga nasod. ²¹ Apan kang Isaac lamang ako magtukod sa akong kasabotan—si Isaac, ang anak nga diin ipanganak ni Sara sama niini nga higayona sa sunod tuig." ²² Sa dihang nahuman na sa pagpakigsulti ang Dios kang Abraham, nawala na ang Dios sa iyang panan-aw. ²³ Sa samang adlaw, gikuha ni Abraham ang iyang anak nga si Ismael ug ang tanan nga mga lalaki nga atua sa iyang panimalay, lakip ang mga anak nga lalaki sa tanan niyang mga ulipon nga iyang gipalit, ug gituli sila. Giputol niya ang tumoy nga mga panit sa ilang kinatawo, sama sa gisulti sa Dios kaniya nga pagabuhaton. ²⁴ Gituli si Abraham sa 99 na ang iyang pangidaron, ²⁵ ug trese na ang pangidaron ni Ismael sa dihang gituli siya ni Abraham. ²⁶ Niana gayong adlawa natuli si Abraham ug ang iyang anak nga si Ismael. ²⁷ Ang tanang mga lalaki sa iyang panimalay, ang natawo didto ug kadtong gipangpalit ni Abraham sa mga langyaw, gipangtuli usab.