¹ Hangtod nianang panahona, ang asawa ni Abram nga si Sarai wala pa gihapon nakaanak alang kang Abram. Apan aduna siyay ulipon nga babaye gikan sa Ehipto, nga ginganlan ug Hagar. ² Miingon si Sarai kang Abram, "Paminaw kanako! Wala ako gitugotan ni Yahweh nga mabuntis. Busa pagpakigdulog sa akong ulipon nga si Hagar. Tingalig makabaton siya ug mga anak nga ilhon ko nga akoa." Miuyon si Abram nga buhaton ang giingon ni Sarai. ³ Nahitabo kini sa napulo ka tuig human mipuyo si Abram ug si Sarai didto sa Canaan. Niining paagiha gikuha ni Abram si Hagar, ang ulipon ni Sarai nga taga-Ehipto, nga mamahimo niyang ikaduha nga asawa. ⁴ Busa nakigdulog siya kang Hagar, ug nabuntis siya. Sa dihang naamgohan na niya nga buntis na siya, iya nang gitamay ang iyang agalong babaye nga si Sarai. ⁵ Unya miingon si Sarai kang Abram, "Sala nimo kini! Gihatag ko ang akong sulugoon kanimo aron makigdulog ka kaniya. Karon buntis na siya, ug gitamay niya ako tungod kay wala akoy mga anak. Hinaot nga himoon kang sad-an ni Yahweh sa pagbuhat nimo niini kanako!" ⁶ Busa miingon si Abram kang Sarai, "Paminaw kanako! Imo siyang sulugoon, buhata ngadto kaniya kung unsa ang imong gihunahuna nga maayo." Unya gidaogdaog na siya ni Sarai, busa milayas si Hagar. ⁷ Ang anghel ni Yahweh miadto kaniya samtang anaa siya duol sa tuboran sa tubig sa kamingawan. Mao kini ang tuboran nga duol sa dalan sa Shur. ⁸ Miingon siya kaniya, "Hagar, ulipon ni Sarai, asa ka gikan, ug asa ka padulong?" Mitubag siya, "Mipahawa ako gikan kang Sarai, nga akong agalon nga babaye." ⁹ Ang anghel ni Yahweh miingon, "Balik didto sa imong agalon nga babaye, padayona ang pagtuman kaniya." ¹⁰ Ang anghel ni Yahweh miingon usab kaniya, "Tugotan ko ikaw nga makabaton ug daghan kaayo nga mga kaliwat ug walay bisan kinsa nga makaihap kanila!" ¹¹ Ang anghel ni Yahweh miingon usab kaniya, "Paminawa kini! Buntis ka, ug manganak ka ug batang lalaki. Kinahanglang nganlan nimo siya ug Ismael, nga nagpasabot 'ang Dios naminaw,' kay nadungog ka ni Yahweh nga mihilak tungod kay gibati nimo nga makaluluoy ka. ¹² Apan ang imong anak mahisama sa ihalas nga asno nga walay makadumala. Supakon niya ang tanang tawo, ug supakon usab siya sa tanan. Magpuyo siya nga layo sa iyang mga paryente." ¹³ Miingon si Hagar sa iyang kaugalingon, "Nagpadayon akong buhi, bisan paman ug nakita ako ni Yahweh." Busa iyang gitawag si Yahweh nga, "Ang Dios, nga nakakita kanako." ¹⁴ Mao nga gitawag sa mga tawo ang atabay didto nga "Beer Lahai Roi," nga nagpasabot, "ang atabay sa usa nga buhi nga nakakita kanako!" Anaa gihapon kini didto, taliwala sa Kades ug Bered. ¹⁵ Busa sa kadugayan nanganak si Hagar ug anak nga lalaki alang kang Abram, ug ginganlan niya kini ug Ismael. ¹⁶ 86 na ang pangidaron ni Abram sa dihang gipakatawo ni Hagar si Ismael nga anak ni Abram.