¹ Sa pipila ka panahon human adto, adunay panan-awon si Abram diin nakigsulti si Yahweh kaniya ug miingon, "Ayaw kahadlok sa bisan unsa, panalipdan ko ikaw ug hatagan ko ikaw ug dakong ganti." ² Apan mitubag si Abram, "Ginoo nga Yahweh, unsaon nimo paghatag kanako sa akong gusto, nga wala man akoy anak, ug ang manununod sa tanan nakong gipanag-iyahan mao ang akong sulugoon nga si Eliezer, nga gikan sa Damascus!" ³ Miingon usab si Abram, "Wala mo ako hatagi ug mga anak, busa ang usa ka sulugoon sa akong panimalay maoy makapanunod sa tanan nga akong gipanag-iyahan!" ⁴ Mitubag si Yahweh, "Dili! Dili gayod siya ang tawo nga makapanunod niini. Hinuon, mahimo kang amahan sa tawo nga makapanunod sa tanang butang nga imong gipanag-iyahan." ⁵ Unya gipagawas ni Yahweh si Abram sa iyang tolda ug miingon, "Hangad sa kawanangan! Maihap ba nimo ang kabituonan? Dili, dili nimo kini maihap tungod kay daghan ra kaayo kini, ug ang imong mga kaliwat mahisama kadaghan sa kabituonan." ⁶ Mituo si Abram nga mahitabo ang giingon ni Yahweh. Tungod niana, giisip siya ni Yahweh nga matarong. ⁷ Miingon usab si Yahweh kaniya, "Ako si Yahweh. Ako ang nagdala kanimo gikan sa Ur diha sa yuta sa Chaldea. Gidala ko ikaw dinhi aron hatagan ka niining yuta nga imong panag-iyahan." ⁸ Apan mitubag si Abram, "Ginoo nga Yahweh, unsaon nako pagkahibalo nga mapanag-iya gayod nako kining yutaa?" ⁹ Miingon ang Dios kaniya, "Pagdala nganhi kanako ug dumalaga nga baka nga tulo na ka tuig ug usa ka kanding nga tulo na ka tuig, ug usa ka salampati ug usa ka tukmo." ¹⁰ Busa gidala ni Abram kining tanan. Gipatay niya kini ug gitunga ang matag mananap. Gihan-ay niya sa isigkakilid sa matag-usa ang mga katunga sa lawas. Apan wala niya gitunga ang tukmo ug ang salampati. ¹¹ Ang mga langgam nga mokaon ug patay nga mga mananap mikanaog aron sa pagkaon sa patay nga lawas sa mga mananap, apan giabog kini ni Abram. ¹² Sa dihang mosalopay na ang adlaw, nakatulog pag-ayo si Abram, ug dihadiha ang tanang butang sa iyang palibot mingitngit ug nakapalisang kaniya. ¹³ Unya miingon si Yahweh kang Abram, "Gusto ko nga masayod ka nga ang imong mga kaliwat mahimong mga langyaw sa yuta nga dili ilaha. Maulipon sila sa mga tag-iya niana nga yuta. Daogdaogon sila sa mga tag-iya sa yuta sulod sa 400 ka katuigan. ¹⁴ Apan silotan ko ang mga tawo niana nga nasod diin sila giulipon. Unya mobiya ang imong mga kaliwat niana nga nasod nga magdala ug daghang mga kabtangan. ¹⁵ Apan ikaw, mamatay ka nga malinawon ug ilubong ka sa dihang tigulang kana kaayo. ¹⁶ Human maulipon ang imong mga kaliwat sulod sa 400 ka katuigan, mobalik sila dinhi. Sila ang modumala niining yutaa ug pildihon ang mga Amorehanon. Dili pa kini mahitabo sa wala pa ang maong panahon, tungod kay wala pa nagpakasala ang mga Amorehanon sa punto nga silotan ko sila alang niini." ¹⁷ Sa dihang gabii na, wala damha nga ang usa ka nagdilaab nga sulo ug ang usa ka kulon nga yuta nga adunay baga nga nagkalayo ug nag-aso mitungha ug miadto sa taliwala sa katunga nga mga lawas sa mananap. ¹⁸ Nianang adlawa nagbuhat ug kasabotan si Yahweh kang Abram. Giingnan siya ni Yahweh, "Ihatag ko sa imong mga kaliwat ang tanan nga yuta taliwala sa suba nga anaa sa sidlakang bahin sa utlanan sa Ehipto padulong sa habagatan, ug sa amihanang bahin sa Suba sa Eufrates. ¹⁹ Mao kana ang yuta diin nagpuyo ang pundok sa mga katawhan nga mao ang Kenhanon, ang Keniznon, ang Kidmonhon, ang ²⁰ Hethanon, ang Pereznon, ang Refaimnon, ang ²¹ Amorehanon, ang Canaanhon, ang Girgasnon, ug ang pundok sa katawhan nga Jebusnon."