¹ Adunay upat ka mga hari nga magkaabin. Sila mao si Haring Amrafel sa Babylonia, si Haring Ariok sa Ellasar, si Haring Kedorlaomer sa Elam, ug si Haring Tidal sa Goiim. ² Andam na sila sa pagsulong sa lima ka mga hari: si Haring Bera sa Sodoma, si Haring Birsa sa Gomora, si Haring Sinab sa Adma, si Haring Semeber sa Zeboiim, ug ang hari sa Bela, ang siyudad nga gitawag karon ug Soar. ³ Kadtong lima ka mga hari ug ang ilang mga kasundalohan nanagtigom sa walog sa Sidim, nga gitawag usab ug walog sa Patay nga Dagat, aron makig-away batok sa upat ka mga hari ug sa ilang mga kasundalohan. ⁴ Sulod sa ikanapulog duha ka tuig gidumalahan sila ni Haring Kedorlaomer. Apan sa ikanapulog tulo na ka tuig, nakigbatok sila kang Haring Kedorlaomer ug nagdumili na sa paghatag kaniya sa bisan unsa nga buhis. ⁵ Sa pagkasunod tuig, gitigom ni Haring Kedorlaomer ug sa uban nga mga hari nga uban kaniya ang ilang mga kasundalohan ug mipadulong ngadto sa dapit sa lima ka mga hari. Napildi nila ang Refaihanon nga mga tawo diha sa Astarot Karnaim, ang Susihanon nga mga tawo sa Ham, ug ang Emihanon nga mga tawo sa Shabeh Kiriataim. ⁶ Napildi usab nila ang Horitihanon nga mga tawo sa ilang dapit sa bungtod sa Seir nga ingon kalayo sa El Paran duol sa kamingawan. ⁷ Unya mibalik sila ug miadto sa En Mispat, nga gitawag karon nga Kades. Nabuntog nila ang tanang yuta nga gipanag-iyahan sa mga Amalekanhon nga mga tawo ug ang Amorihanon nga mga tawo nga nagpuyo sa Hasason Tamar. ⁸ Unya ang mga kasundalohan sa mga hari sa Sodoma, Gomora, Adma, Seboiim ug Bela nagmartsa paggawas aron makig-away sa mga kasundalohan sa upat ka mga hari sa Walog sa Sidim. ⁹ Nakig-away sila batok sa mga kasundalohan ni Kedorlaomer ang hari sa Elam, si Tidal ang hari sa Goiim, si Amrafel ang hari sa Sinar, ug si Ariok ang hari sa Elasar. Ang mga kasundalohan sa upat ka mga hari nakig-away batok sa mga kasundalohan sa lima ka mga hari. ¹⁰ Ang walog sa Sidim napuno ug mga lungag sa alkitran. Busa sa dihang ang mga kasundalohan sa mga hari sa Sodoma ug Gomora misulay sa pag-ikyas palayo, daghan sa iyang mga tawo ang nangahulog niini nga lungag. Ang uban nakaikyas ug midagan palayo paingon sa mga bungtod. ¹¹ Sa ilang pag-ikyas, nakuha sa ilang mga kaaway ang tanang bililhon nga mga butang sa Sodoma ug Gomora, lakip na ang tanan nga mga pagkaon. ¹² Gidakop usab nila ang pag-umangkon ni Abram nga si Lot ug ang iyang mga kabtangan, sanglit nagpuyo man siya diha sa Sodoma nianang panahona. ¹³ - ¹⁴ Nianang tungora, nagpuyo si Abram duol sa dako nga kahoy nga gipanag-iyahan ni Mamre, nga sakop sa Amorehanon nga banay. Si Abram nagbuhat ug kasabotan tali kang Mamre ug sa iyang duha ka mga igsoon nga si Escol ug Aner, nga magtinabangay sila sa usag usa kung adunay gubat. Usa sa mga tawo nga nakaikyas gikan sa gubat ang nagsumbong kang Abram, nga Hebreohanon, kung unsa ang nahitabo, nga nadakpan ang iyang pag-umangkon nga si Lot sa kaaway ug gidala nila siya. Busa gipatawag dayon ni Abram ang iyang 318 ka buok nga mga tawo nga iyang mga sulugoon, mga tawo nga uban ni Abram sukad pa sa ilang pagkahimugso ug nahibalo unsaon pagpakig-away ingon nga mga batid nga manggugubat. Miadto silang tanan ug ilang gigukod ang ilang mga kaaway nga ingon ka layo sa siyudad sa Dan. ¹⁵ Sa pagkagabii, gibahin ni Abram ang iyang mga tawo ngadto sa pipila ka mga pundok, ug gisulong nila ang ilang mga kaaway sa bisan asa nga direksiyon ug gibuntog nila sila. Gigukod nila sila ingon ka layo sa Hoba, nga mao ang amihanan sa siyudad sa Damascus. ¹⁶ Nabawi sa mga tawo ni Abram ang tanang mga butang nga ilang nakuha. Naluwas usab nila si Lot ug ang tanan niyang mga kabtangan ug ang mga babaye usab ug ang uban pa nga gikuha sa ilang mga kaaway. ¹⁷ Sa pagpauli na ni Abram sa iyang panimalay human niya ug sa iyang mga tawo napildi ang mga kasundalohan ni Haring Kedorlaomer ug ang ubang mga hari nga nakig-away uban kaniya, ang Hari sa Sodoma miadto sa amihanan aron himamaton siya didto sa Walog sa Shabeh, nga gitawag usab sa mga tawo nga Walog sa mga Hari. ¹⁸ Si Melquisedek, ang hari sa siyudad sa Salem, usa usab ka pari sa labing gamhanan nga Dios. Nagdala siya ug pipila ka pan ug bino ngadto kang Abram. ¹⁹ Unya gipanalanginan niya si Abram ug nag-ingon, "Hangyoon ko ang labing gamhanan nga Dios, ang nagbuhat sa langit ug sa yuta, sa pagpanalangin kanimo. ²⁰ Gidayeg ko ang labing gamhanan nga Dios, tungod kay gitugotan ka niya sa pagbuntog sa imong mga kaaway." Unya gihatagan ni Abram si Melquisedek sa ika napulo nga bahin sa tanang mga butang nga iyang nakuha. ²¹ Miingon ang Hari sa Sodoma ngadto kang Abram, "Makahimo ka sa pagkuha sa tanang butang nga imong nabawi. Tugoti lamang ako sa pagbawi sa mga tawo nga inyong nadakpan nga gikan sa akong siyudad." ²² Apan giingnan ni Abram ang Hari sa Sodoma, "Ligdong ako nga nakigsaad ngadto kang Yahweh, ang labing gamhanan nga Dios, ang usa nga nagbuhat sa langit ug sa yuta, ²³ nga dili ako mokuha bisan pa sa gamay nga tanod o higot sa sandalyas gikan sa bisan unsang mga butang nga imong gipanag-iyahan. Tungod niini, dili ka gayod makaingon, 'Ako ang hinungdan nga nadato si Abram.' ²⁴ Ang butang lamang nga akong pagadawaton mao ang pagkaon nga nakaon sa akong mga tawo. Apan si Aner, si Escol ug si Mamre nga mikuyog kanako sa pagpakig-away, maoy tugoti nga maka-angkon ug bahin sa mga butang nga among nabawi."