¹ Busa mibiya sa Ehipto si Abram ug si Sarai ug mibalik ngadto sa habagatang bahin sa kamingawan sa Judea. Gidala nila ang tanan nilang mga kabtangan, ug miuban usab si Lot kanila. ² Dato na kaayo si Abram. Nakapanag-iya siyag daghan nga mga kahayopan, plata, ug bulawan. ³ Nagpadayon sila sa pagpanaw gikan sa usa ka lugar padulong sa laing lugar gikan sa habagatang bahin sa kamingawan sa Judea padulong sa Betel, ngadto sa dapit taliwala sa Betel ug sa Ai diin gitukod ni Abram kaniadto ang ilang mga tolda. ⁴ Ug sa maong dapita usab mitukod si Abram sa iyang halaran; didto gisimba niya pag-usab si Yahweh. ⁵ Si Lot, nga nagpanaw uban ni Abram, aduna usab panon sa mga karnero, mga kanding, panon sa mga baka ug mga tolda. ⁶ Silang duha adunay daghan na kaayo nga mga mananap ug dili na sila mahimong mag-ipon ug puyo sa sama nga dapit. Dili na paigo ang yuta nga makahatag kanila ug tubig ug pagkaon alang sa tanan nilang mga mananap. ⁷ Dugang pa niana, ang mga tawo nga nag-atiman sa mga kahayopan ni Abram nagsugod na ug panag-away uban sa mga tawo nga nag-atiman sa mga kahayopan ni Lot. Ang mga kaliwat sa Canaanhon ug Perisihanon nagpuyo usab didto nga dapit. ⁸ Unya miingon si Abram kang Lot, "Sanglit suod man kita nga paryente, dili maayo alang kanato nga mag-away, o alang sa mga tawo nga nag-atiman sa imong mga mananap nga makig-away sa mga tawo nga nag-atiman sa akong mga mananap. ⁹ Adunay daghan nga yuta alang kanatong duha. Busa magbulag ta. Makapili ka sa bisan unsa nga bahin nga gusto nimo. Kung gusto nimo ang didto nga dapit, magpabilin ako dinhi. Kung gusto nimo ang dinhi nga dapit, moadto ako didto." ¹⁰ Gitan-aw ni Lot ang Soar ug nakita niya nga adunay daghang tubig sa tibuok patag duol sa Suba sa Jordan. Kini nga panahon wala pa gilaglag ni Yahweh ang Sodoma ug Gomora nga diin anaa sa maong patag. Niadtong mga panahona, nahisama kini sa tanaman ni Yahweh, sama sa yuta sa Ehipto duol sa Suba sa Nilo. ¹¹ Busa gipili ni Lot ang yuta diha sa patag nga dapit sa Suba sa Jordan. Gibiyaan ni Lot ang iyang uyoan nga si Abram, ug mibalhin sa sidlakan. ¹² Nagpabilin si Abram sa yuta sa Canaan, ug nagpuyo si Lot duol sa mga siyudad diha sa patag sa Suba sa Jordan, ug gitukod niya ang iyang mga tolda duol sa Sodoma. ¹³ Karon ang mga tawo nga nagpuyo sa Sodoma hilabihan na kaayo ang kadaotan batok kang Yahweh. ¹⁴ Human sa panagbulag ni Lot ug ni Abram, miingon si Yahweh kang Abram, "Tan-awa ang palibot niining tibuok dapit nga imong nahimutangan. Tan-awa ang amihanan ug ang habagatan, tan-awa ang sidlakan ug ang kasadpan. ¹⁵ Ihatag ko kanimo ug sa imong mga kaliwat ang tanang yuta nga imong nakita; mapanag-iya mo kini hangtod sa kahangtoran. ¹⁶ Himoon ko ang imong mga kaliwat sama kadaghan sa mga abog! Kung adunay usa ka tawo nga mosulay sa pag-ihap sa abog, ingon kini nga misulay siya pag-ihap sa imong mga kaliwat. ¹⁷ Lakaw ngadto sa tanang kayutaan sa matag direksyon, tungod kay ihatag ko kining tanan kanimo." ¹⁸ Busa gihipos ni Abram ang iyang mga tolda ug mibalhin sa Hebron ug nagpuyo didto sa dako nga kahoy ni Mamre. Nagtukod siya ug usa ka bato nga halaran didto aron sa pagbuhat ug mga paghalad kang Yahweh.