¹ Unya giingnan ni Yahweh si Abram, "Biyai kini nga nasod diin ikaw nagpuyo karon. Biyai ang banay sa imong amahan ug ang iyang pamilya, ug adto sa yuta nga akong ipakita kanimo. ² Himoon ko ang imong mga kaliwat nga dako nga nasod. Panalanginan ko ikaw ug himoon ko ikaw nga bantogan. Kung unsa ang akong pagabuhaton alang kanimo mahimong usa ka panalangin sa uban. ³ Panalanginan ko kadtong magapanalangin kanimo, ug tunglohon ko kadtong maghimo ug daotang mga butang kanimo. Panalanginan ko ang tanang banay sa kalibotan pinaagi kanimo." ⁴ Busa mibiya si Abram sa Haran, ingon sa gisulti ni Yahweh kaniya nga pagabuhaton. 75 na ang pangidaron ni Abram sa dihang mibiya siya didto uban sa iyang pamilya ug pamilya ni Lot. ⁵ Gidala ni Abram ang iyang asawa nga si Sarai ug ang iyang pag-umangkon nga si Lot; gidala usab niya ang tanan niyang mga kabtangan ug mga ulipon nga napanag-iya nila didto sa Haran. Mibiya sila gikan didto ug miadto sa yuta sa Canaan. ⁶ Didto sa Canaan mipanaw sila hangtod sa Shekem ug mipahimutang pinaagi sa taas nga kahoy nga gitawag ug kahoy sa More. Sa dihang nahitabo kini, ang Canaanhon nga mga tawo mao ang nagpuyo nianang yutaa. ⁷ Unya mipakita si Yahweh kang Abram ug miingon kaniya, "Ihatag ko kining yuta sa imong mga kaliwat." Unya nagtukod ug halaran si Abram aron sa paghalad ug usa ka halad kang Yahweh, nga mipakita kaniya. ⁸ Gikan sa Shekem, si Abram ug ang iyang pamilya mipanaw sa mga bungtod nga sidlakan sa Betel. Ang Betel atua sa kasadpan diin gitukod nila ang ilang tolda, ug ang Ai atua sa sidlakan. Didto nagtukod na usab siya ug laing halaran ug naghalad ug usa ka halad ug misimba kang Yahweh didto. ⁹ Unya mibiya sila didto ug mipadayon sa pagpanaw sa habagatan paingon sa kamingawan sa Negeb. ¹⁰ Adunay kagutom nianang yutaa, mao nga milakaw sila unahan sa habagatan aron sa pagpuyo sa makadiyot didto sa yuta sa Ehipto, tungod kay ang kakulang sa pagkaon nianang yutaa nga ilang nahimutangan hilabihan gayod. ¹¹ Sa dihang haduol na sila sa yuta sa Ehipto, miingon si Abram sa iyang asawa nga si Sarai, "Paminaw, nasayod ako nga maanyag ka kaayo nga babaye. ¹² Sa dihang ang mga tawo sa Ehipto makakita kanimo, moingon sila, 'Kining bayhana iyang asawa!' ug patyon nila ako, apan dili ka nila patyon. ¹³ Busa hangyoon ko ikaw nga sultihan nimo sila nga igsoon ko ikaw, aron maluwas ako, ug aron dili ko nila patyon tungod kanimo." ¹⁴ Ug mao kana ang nahitabo. Sa pag-abot gayod nila sa Ehipto, nakita sa mga tawo sa Ehipto nga ang iyang asawa maanyag gayod kaayo. ¹⁵ Sa dihang ang mga opisyal sa hari nakakita kaniya, giingnan nila ang hari kung unsa siya kamaanyag. Unya gikuha siya sa hari ngadto sa iyang palasyo. ¹⁶ Gitagad pag-ayo sa hari si Abram tungod kang Sarai, ug gihatagan niya si Abram ug karnero, baka, mga asno, lalaki ug babaye nga mga sulugoon ug mga kamelyo . ¹⁷ Apan tungod kay gikuha man sa hari si Sarai, ang asawa ni Abram, mipahamtang ug makalilisang nga mga sakit si Yahweh sa hari ug ang uban sa iyang panimalay. ¹⁸ Busa gipatawag sa hari si Abram ug miingon kaniya, "Nakahimo ka ug makalilisang nga butang nganhi kanako! ¹⁹ Nganong wala man ko nimo gisultihan nga imo diay siyang asawa? Nganong miingon ka man nga imo siyang igsoon, aron mamahimo nako siyang asawa? Wala unta kana nimo buhata! Busa karon kuhaa ang imong asawa, biya dinhi ug lakaw!" ²⁰ Unya gimandoan sa hari ang iyang mga opisyal nga dalhon si Abram ug ang iyang asawa ug ang tanan niyang kabtangan pagawas sa Ehipto.