¹ Niining panahona, ang tanang mga tawo sa tibuok kalibotan managsama pa ang pinulongan. ² Samtang namalhin ang mga tawo libot sa sidlakan, miabot sila sa patag sa rehiyon sa Babylonia ug nagpuyo sila didto. ³ Unya nagsultihanay sila sa usag-usa, "Maghimo kita ug mga tisa ug lutoon kini aron mogahi, alang sa pagtukod!" Busa gigamit nila ang mga tisa imbis nga mga bato, ug migamit sila ug alkitran imbis apog aron nga ipapilit. ⁴ Miingon sila, "Magtukod kita ug usa ka siyudad alang kanato! Kinahanglan magtukod usab kita ug taas kaayo nga tore nga sangko sa langit! Nianang paagiha ang mga tawo masayod kung kinsa kita! Kung dili nato kini buhaton, magkatibulaag kita sa tibuok kalibotan!" ⁵ Usa ka adlaw mikanaog si Yahweh aron tan-awon ang siyudad ug ang tore nga gitukod sa mga tawo. ⁶ Miingon si Yahweh, "Kining mga tawhana usa lang ka pundok nga nagasulti sa managsama nga pinulongan. Kung nakasugod na sila sa pagbuhat niini, mahimo na nila ang tanan nga gusto nilang buhaton! ⁷ Busa, manganaog kita didto ug himoon ang mga tawo nga makasulti sa nagkalainlaing mga pinulongan, aron dili sila makasabot sa sinultihan sa matag-usa." ⁸ Pinaagi sa paghimo niini, gipatibulaag ni Yahweh silang tanan sa tibuok kalibotan, ug gihunong na sa mga tawo ang pagtukod sa siyudad. ⁹ Gitawag ang siyudad nga Babel, tungod kay didto gihimo ni Yahweh nga dili na makasulti sa managsama nga pinulongan ang katawhan sa tibuok kalibotan. Ug gipatibulaag sila ni Yahweh sa tibuok kalibotan gikan niana nga dapit. ¹⁰ Mao kini ang kaliwat ni Sem. Duha ka tuig human ang lunop, sa dihang 100 na ang pangidaron ni Sem, nahimo siyang amahan ni Arpacsad. ¹¹ Human natawo si Arpacsad, nabuhi pa si Sem ug 500 pa ka tuig ug nahimong amahan sa lain pang mga anak. ¹² Sa dihang 35 na ang pangidaron ni Arpacsad, nahimo siyang amahan ni Sela. ¹³ Human natawo si Sela, nabuhi pa si Arpacsad ug 403 pa ka tuig ug nahimong amahan sa lain pang mga anak. ¹⁴ Sa dihang 30 na ang pangidaron ni Sela, nahimo siyang amahan ni Eber. ¹⁵ Human natawo si Eber, nabuhi pa si Sela ug 403 pa ka tuig ug nahimong amahan sa lain pang mga anak. ¹⁶ Sa dihang 34 na ang pangidaron ni Eber, nahimo siyang amahan ni Peleg. ¹⁷ Human natawo si Peleg, nabuhi pa si Eber ug 430 pa ka tuig ug nahimong amahan sa lain pang mga anak. ¹⁸ Sa dihang 30 na ang pangidaron ni Peleg nahimo siyang amahan ni Reu. ¹⁹ Human natawo si Reu, nabuhi pa si Peleg ug 209 pa ka tuig ug nahimong amahan sa lain pang mga anak. ²⁰ Sa dihang 32 na ang pangidaron ni Reu, nahimo siyang amahan ni Serug. ²¹ Human natawo si Serug, nabuhi pa si Reu ug 207 pa ka tuig ug nahimong amahan sa lain pang mga anak. ²² Sa dihang 30 na ang pangidaron ni Serug, nahimo siyang amahan ni Nahor. ²³ Human natawo si Nahor, nabuhi pa si Serug ug 200 pa ka tuig ug nahimong amahan sa lain pang mga anak. ²⁴ Sa dihang 29 na ang pangidaron ni Nahor, nahimo siyang amahan ni Tera. ²⁵ Human natawo si Tera, nabuhi pa si Nahor ug 119 pa ka tuig ug nahimong amahan sa lain pang mga anak. ²⁶ Human sa 70 na ka tuig ang pangidaron ni Tera, nahimo siyang amahan ni Abram, Nahor, ug Haran. ²⁷ Mao kini ang nahitabo mahitungod sa mga kaliwat ni Tera: Ang mga anak nga lalaki ni Tera, mao si Abram, Nahor, ug Haran. Ang anak nga lalaki ni Haran ginganlan ug Lot. ²⁸ Ang amahan ni Haran uban kaniya sa dihang namatay si Haran sa siyudad sa Ur, sa nasod sa Caldea. Mao kini ang yuta diin siya natawo. ²⁹ Nangaminyo na si Abram ug si Nahor. Ang asawa ni Abram ginganlan ug Sarai, ug ang asawa ni Nahor ginganlan ug Milca. Si Milca ug iyang igsoon nga si Isca mga anak nga babaye ni Haran. ³⁰ Dili makabaton ug anak si Sarai. ³¹ Nakahukom si Tera nga mobiya sa Ur ug mopuyo sa yuta sa Canaan. Busa gidala niya ang iyang anak nga si Abram ug ang iyang apo nga si Lot nga anak ni Haran, ug ang asawa ni Abram nga si Sarai uban kaniya. Apan imbis nga moadto sa Canaan, mihunong sila sa lungsod sa Haran ug nagpuyo didto. ³² Sa dihang 205 na ang pangidaron ni Tera, namatay siya didto sa Haran.