¹ Mao kini ang mga kaliwatan sa mga anak ni Noe nga lalaki, nga sila si Ham, si Sem, ug si Jafet. Nahimo silang mga amahan sa daghan nga mga kabataan human sa lunop. ² Ang mga anak nga lalaki ni Jafet mao sila si Gomer, Magog, Madai, Javan, Tubal, Mesec, ug Tiras. ³ Ang mga anak ni Gomer nga lalaki mao sila si Askenas, Rifat, ug Togarma. ⁴ Ang mga anak ni Jaban nga lalaki mao sila si Elisha, Tarsis, Kittim, ug Dodanim. ⁵ Nagpuyo sa mga isla ug sa mga yuta nga duol sa dagat ang mga anak ni Jaban uban ang ilang mga pamilya. Ang ilang mga kaliwatan nahimong pundok sa katawhan, ang matag pundok adunay kaugalingong pinulongan, mga banay, ug nahisakopan. ⁶ Ang mga anak ni Ham nga lalaki mao sila si Cus, Ehipto, Put, ug Canaan. ⁷ Ang mga anak ni Cus nga lalaki mao sila si Seba, Habila, Sabata, Raama, ug Sabteca. Ang mga anak nga lalaki ni Ramaa mao sila si Seba ug Dedan. ⁸ Ang usa pa ka anak ni Cus nga lalaki mao si Nimrod. Si Nimrod maoy unang tawo nga nahimong kusgan nga manggugubat. ⁹ Nakita ni Yahweh nga labing bantogan siya nga mangangayam. Mao nga nag-ingon ang mga tawo ngadto sa labing bantogang mangangayam, "Nakita ni Yahweh nga labing bantogan ka nga mangangayam sama kang Nimrod." ¹⁰ Si Nimrod nahimong hari sa yuta sa Babilonia. Ang unang mga siyudad nga iyang gidumalahan mao ang Babel, Erec, Acad, ug Calne. ¹¹ Gikan didto miuban siya sa ubang mga katawhan paingon sa Assyria, ug didto gitukod nila ang mga siyudad sa Nineve, Rehobot Ir, Cala, ¹² ug Resen. Ang Resen usa ka dako nga siyudad taliwala sa Nineve ug Cala. ¹³ Ang anak ni Ham nga lalaki, nga si Ehipto, nahimong katigulangan sa Luditihanon, Anamihanon, Laabihanon ug Neftuhanon, ¹⁴ Petrusihanon, Casluhanon ug Caftorihanon nga pundok sa mga tawo. Ang Filistihanon nga mga tawo naggikan sa Casluhanon. ¹⁵ Ang kinamanghorang anak ni Ham nga lalaki, nga si Canaan, nahimong amahan nila ni Sidon, nga iyang kinamagulangang anak nga lalaki, ug ni Het, nga iyang kinamanghorang anak nga lalaki. ¹⁶ Si Canaan mao usab ang katigulangan sa Jebusihanon, Amorihanon, Girgasihanon, ¹⁷ Hibihanon, Arkihanon, Sinaihanon, ¹⁸ Arbedihanon, Semarihanon ug sa Hamatihanon nga pundok sa mga tawo. Sa wala madugay nagkatibulaag ang mga kaliwatan ni Canaan ngadto sa usa ka dakong luna. ¹⁹ Ang ilang yuta nilukop sa siyudad sa Sidon sa amihanan hangtod sa habagat sa Gasa nga duol sa Gerar, ug unya sa sidlakan paingon sa mga lungsod sa Sodoma, Gomora, Adma, ug sa Zeboim, hangtod sa lungsod sa Lasa. ²⁰ Kadto mao ang mga kaliwatan ni Ham. Nahimo silang pundok sa mga tawo nga adunay kaugalingon nga banay, adunay kaugalingon nga mga pinulongan, ug adunay kaugalingon nga mga yuta. ²¹ Si Sem, nga magulang ni Jafet, nakabaton usab ug mga anak nga lalaki, ug nahimo siya nga katigulangan sa tanang mga kaliwatan ni Eber. ²² Ang mga anak ni Sem nga mga lalaki mao sila si Elam, Asur, Arpacsad, Lud, ug Aram. ²³ Ang mga anak nga lalaki ni Aram mao sila si Uz, Hul, Geter, ug Mesec. ²⁴ Si Arpacsad nahimong amahan ni Sela. Si Sela nahimong amahan ni Eber. ²⁵ Si Eber nahimong amahan sa duha ka mga anak nga lalaki. Ang usa kanila ginganlan ug Peleg, nga nagpasabot ug "pagkabahin," tungod kay sa panahon nga buhi pa siya, ang mga tawo sa kalibotan nabahin ug nagkatibulaag bisan asa. Ang manghod ni Peleg mao si Joktan. ²⁶ Si Joktan nahimong amahan nila ni Almodad, Selep, Hasarmabet, Jera, ²⁷ Hadoram, Uzal, Dikla, ²⁸ Obal, Abimael, Seba, ²⁹ Opir, Habila, ug si Jobab. Silang tanan mga anak nga lalaki ni Joktan. ³⁰ Ang mga dapit nga gisugdan ug puyo sa mga banay nagsukad sa Mesa paingon sa Sefar, sa kabukiran nga anaa sa sidlakan. ³¹ Sila mao ang kaliwatan nga gikan sa mga anak ni Sem nga lalaki. Nahimo silang pundok sa mga tawo ug aduna silay kaugalingon nga banay, kaugalingon nga mga pinulongan, ug ilang kaugalingong yuta. ³² Kining tanan nga mga banay naggikan sa mga anak ni Noe nga lalaki. Ang matag banay adunay kaugalingon nga kagikan ug ang matag usa adunay nagkalahi nga pundok sa mga tawo. Kadto nga mga pundok sa mga tawo nahimo human sa baha ug mikaylap sa tibuok kalibotan.