¹ Unya gipanalanginan sa Dios si Noe ug ang iyang mga anak nga lalaki. Miingon siya kanila, "Gusto ko nga manganak kamo ug daghan nga maoy magpuyo sa tibuok kalibotan." ² Mangahadlok pag-ayo kaninyo ang tanang dagkong mga mananap sa kalibotan, ang tanang kalanggaman, ang tanang matang sa binuhat nga nagakamang sa yuta, ug ang tanang mga isda. Ibutang ko sila ilalom sa inyong katungod. ³ Kaniadto gitugotan ko kamo nga mokaon sa lunhaw nga mga tanom, apan karon mamahimo na kamong mokaon sa tanang buhi ug nagalihok. ⁴ Apan kinahanglan nga dili kamo mokaon sa karne nga adunay dugo niini, tungod kay ang kinabuhi anaa man sa dugo. ⁵ Silotan ko ang bisan unsang binuhat nga mopatay ug tawo—ug manubag sila kang Yahweh—bisan pa kung mananap kini o tawo. Gimando ko nga ang mga mopatay kinahanglan nga mag-antos alang sa ilang mga sala ug bayran kini sa ilang kaugalingong kinabuhi. Bisan pa ug mananap ang makapatay ug tawo, kinahanglang kuhaon usab ang kinabuhi nianang mananapa tungod kay gikuha man niini ang kinabuhi sa tawo. ⁶ Tungod kay gibuhat ko ang tawo aron mahisama sa akong kaugalingon. Busa ipatuman ko gayod nga kung adunay mopatay ug tawo, kinahanglan nga patyon usab siya sa lain pang tawo. Si bisan kinsa nga moula sa dugo sa uban kinahanglan nga mawad-an usab siya sa iyang kaugalingong dugo. ⁷ Alang kaninyo, gusto ko nga makabaton kamo ug daghang mga anak, aron nga sila ug ang ilang mga kaliwatan magpuyo sa tibuok kalibotan." ⁸ Miingon usab ang Dios kang Noe ug sa iyang mga anak nga lalaki, ⁹ "Paminaw pag-ayo. Magbuhat ako karon ug pakigsaad uban kaninyo ug sa inyong mga kaliwatan, ¹⁰ ug sa tanang buhing binuhat nga anaa uban kaninyo, nga buhi—lakip ang mga langgam, ang binuhi nga mga mananap, ug ang ihalas nga mga mananap—ang tanang binuhat nga mananap nga may kinabuhi sa kalibotan nga migawas uban kaninyo gikan sa arka. ¹¹ Mao kini ang pakigsaad nga akong pagabuhaton uban kaninyo: dili ko na gayod laglagon pag-usab ang tanang may kinabuhi pinaagi sa lunop, o laglagon ang tanang anaa sa kalibotan pinaagi sa lunop." ¹² Unya miingon ang Dios kaniya, "Mao kini ang timaan nga magpamatuod nga akong tumanon ang pakigsaad nga akong buhaton uban kaninyo ug uban sa tanang buhing binuhat, usa ka pakigsaad nga akong tumanon hangtod sa kahangtoran: ¹³ Sa matag karon ug unya magbutang ako ug bangaw sa kawanangan. Mao kini ang timaan sa akong pakigsaad uban kaninyo ug sa tanang anaa sa kalibotan. ¹⁴ Sa dihang akong paulanon, ug ang bangaw motungha sa kawanangan, ¹⁵ magpahinumdom kini kanako mahitungod sa saad nga akong gibuhat uban kaninyo ug sa tanang buhing binuhat, ang akong saad nga wala na gayo'y lunop nga molaglag sa tanang buhing binuhat. ¹⁶ Kung adunay bangaw sa kawanangan, makita ko kini, ug makahunahuna ako mahitungod sa pakigsaad nga akong gibuhat sa tanang buhing binuhat nga anaa ibabaw sa kalibotan, usa ka saad nga akong tumanon hangtod sa kahangtoran." ¹⁷ Unya miingon ang Dios kang Noe, "Ang bangaw maoy timaan sa pakigsaad nga akong gibuhat uban sa tanang buhing binuhat nga anaa sa kalibotan." ¹⁸ Ang mga anak ni Noe nga lalaki nga migawas gikan sa arka mao si Sem, si Ham, ug si Jafet. Si Ham nahimong amahan ni Canaan. ¹⁹ Ang tanang katawhan niining kalibotana naggikan sa tulo ka mga anak ni Noe nga lalaki. ²⁰ Nagsugod si Noe sa pag-uma sa yuta. Nagtanom siya ug ubas. ²¹ Human sila nakaani ug ubas, nagbuhat siya ug bino gikan niini. Usa ka adlaw, sa dihang nakainom siya ug daghang bino, nahubog siya, ug hubo siya nga naghigda didto sa iyang tolda. ²² Si Ham, nga amahan ni Canaan, nakita nga hubo ang iyang amahan nga naghigda sa tolda. Busa migawas siya ug iyang gisultihan ang iyang duha ka mga igsoon sa iyang nakita. ²³ Unya nagkuha si Sem ug Jafet ug dako nga panapton ug gibutang kini sa ilang likod ug naglakaw nga nagtalikod paingon sa tolda. Gitabonan nila ug panapton ang hubo nga lawas sa ilang amahan. Nilingi sila sa pikas bahin ug wala mitan-aw sa ilang amahan, busa wala nila siya nakita nga hubo. ²⁴ Sa dihang nakamata ug nahuwasan na si Noe, nahibaloan niya ang gihimo sa iyang kinamanghorang anak nga si Ham. ²⁵ Miingon siya, "Tungluhon nako ang anak nga lalaki ni Ham, nga si Canaan, ingon man ang iyang mga kaliwatan. Mahimo silang mga ulipon sa ilang mga uyoan. ²⁶ Gidayeg ko si Yahweh, nga maoy gidayeg ni Sem. Hinaot nga ang mga kaliwatan ni Canaan mahimong mga sulugoon sa mga kaliwatan ni Sem. ²⁷ Apan hinaot unta nga padak-on sa Dios ang nahisakopan ni Jafet. Tugotan unta niya ang mga kaliwatan ni Jafet nga mopuyo nga malinawon uban sa mga kaliwatan ni Sem. Hinaot nga ang mga kaliwatan ni Canaan mahimong ilang mga ulipon." ²⁸ Human sa baha nabuhi pa si Noe ug 350 ka tuig. ²⁹ Namatay siya sa dihang nagpangidaron siya ug 950 ka tuig.