¹ Apan wala hikalimti sa Dios si Noe, ug ang tanang mga ihalas nga mananap ug tanang matang sa binuhi nga mga mananap nga kauban niya sa arka. Busa usa ka adlaw gipahuros sa Dios ang hangin sa tibuok kalibotan, hinungdan nga naghinay-hinay ug kahubas ang tubig. ² Gipahunong sa Dios ang pagbugwak sa mga tubig nga anaa sa kinahiladman sa yuta, ug gisirad-an usab niya ang tuboran sa tubig gikan sa langit busa mihunong na ang pag-ulan. ³ Naghinay-hinay ug kahubas ang tubig sa kalibotan. Sa ika-150 ka adlaw human nagsugod ang lunop, daghang tubig na ang nawala. ⁴ Sa ika-17 nga adlaw sa ikapitong bulan, nakapatong na ang arka sa usa sa kabungtoran sa rehiyon sa Ararat. ⁵ Nagpadayon sa paghubas ang tubig hangtod nga nakita na ang tumoy sa mga kabukiran, sa unang adlaw sa ika-10 nga bulan nianang tuiga. ⁶ Paglabay sa 40 ka adlaw, giablihan ni Noe ang bintana sa arka nga iyang gibuhat sa kilid sa arka ug gibuhian niya ang uwak. ⁷ Naglupad-lupad ang uwak hangtod nga nahubas na ang tubig nga anaa ibabaw sa yuta. ⁸ Busa gibuhian ni Noe ang salampati aron mahibaloan niya kung mihubas na ba gayod ang tanang tubig sa yuta. ⁹ Apan walay nakit-ang lugar ang salampati aron iyang matugpahan, busa mibalik siya kang Noe ngadto sa arka, tungod kay nalukop pa gihapon sa tubig ang tibuok kalibotan. Busa gipatugdon ni Noe ang salampati sa iyang kamot ug gisulod kini ug balik sa arka. ¹⁰ Naghulat si Noe ug pito pa ka adlaw. Unya gibuhian niya pag-usab ang salampati. ¹¹ Sa pagkagabii nianang adlawa mibalik ang salampati kaniya ug sa wala damha adunay dahon sa olibo sa sungo niini. Busa nahibaloan ni Noe nga nahubas na gayod ang tubig nga anaa sa yuta. ¹² Naghulat na usab si Noe ug lain pang pito ka adlaw. Unya gibuhian niya pag-usab ang salampati, apan niadtong higayona wala na kini mibalik kaniya. ¹³ Karon si Noe 601 na ka tuig. Mihubas na sa hingpit ang tubig sa unang adlaw sa unang bulan nianang tuiga. Gikuha ni Noe ang tabon sa arka, ug natingala siya sa pagkakita niya nga nagsugod na ug kauga ang yuta. ¹⁴ Ug sa ika-27 nga adlaw sa ikaduhang bulan, hingpit na nga nauga ang yuta. ¹⁵ Unya miingon ang Dios kang Noe, ¹⁶ "Gawas na sa arka, uban sa imong asawa, sa imong mga anak, ug sa ilang mga asawa. ¹⁷ Pagawasa uban kaninyo ang tanang mga langgam, ang binuhing mga mananap, ug ang tanang matang sa binuhat nga nagakamang sa yuta, aron managhan sila pag-ayo ug malukop nila ang tibuok kalibotan." ¹⁸ Busa mibiya si Noe sa arka, uban sa iyang asawa, sa iyang mga anak, ug sa ilang mga asawa. ¹⁹ Unya ang tanang mga binuhat, lakip na ang tanang matang sa mananap nga nagakamang sa yuta, ang tanang mga langgam, ug ang tanang matang sa mananap nga nagalihok sa kalibotan. Nanggawas sila nga nagkapundok sumala sa ilang matang. ²⁰ Unya nagbuhat si Noe ug halaran alang kang Yahweh. Mikuha siya ug pipila ka mga mananap ug mga langgam nga takos aron ihalad ug gipatay kini. Unya gisunog niya kini nga tibuok ngadto sa halaran. ²¹ Sa dihang nasimhotan ni Yahweh ang kahumot niini, nahimuot siya sa halad. Unya miingon siya sa iyang kaugalingon, "Dili ko na pagalaglagon ang tanang butang nga anaa sa kalibotan tungod sa daotang binuhatan sa mga tawo. Bisan pa ug daotan ang anaa sa hunahuna sa tanang tawo gikan pa sa ilang pagkabata, dili ko na laglagon pag-usab ang tanang buhing binuhat, sama sa akong gibuhat karon. ²² Hangtod anaa pa ang kalibotan, ang panahon sa tingtanom ug ang panahon sa ting-ani, ang panahon sa katugnaw ug sa kainit, ang panahon sa ting-init ug ting-tugnaw, ug ang adlaw ug gabii magpadayon."