¹ Unya miingon si Yahweh kang Noe, "Nakita ko nga sa tanang mga tawo nga buhi karon, ikaw lang ang kanunay nagbuhat ug matarong. Busa buot nako nga ikaw ug ang imong tibuok pamilya mosulod sa arka. ² Pagdala ug pito ka parisan sa matag matang sa mananap nga akong giingon nga akong dawaton ingon nga halad. Pagdala ug pito ka mga laki ug pito ka mga baye. Pagdala usab ug usa ka laki ug usa ka baye gikan sa tanang matang sa mga mananap nga akong giingon nga dili nako dawaton ingong nga halad. ³ Pagdala usab ug pito ka pares sa matag matang sa langgam aron magpabilin nga buhi ang ilang kaliwat sa tibuok kalibotan. ⁴ Buhata kini tungod kay pito ka adlaw gikan karon paulanon ko ang tibuok kalibotan. Paulanon ko kini sulod sa 40 ka adlaw ug gabii. Niini nga paagi, pagalaglagon ko ang tanang butang nga akong gibuhat dinhi sa kalibotan." ⁵ Gibuhat ni Noe ang tanan nga gisugo ni Yahweh nga iyang buhaton. ⁶ Nagpangidaron si Noe ug 600 ka tuig sa dihang miabot ang lunop sa kalibotan. ⁷ Sa wala pa miulan, misulod na sa arka si Noe ug ang iyang asawa ug ang iyang mga anak nga lalaki ug ang mga asawa sa iyang mga anak aron makalingkawas sa lunop. ⁸ Managpares sa mga mananap, kadtong giingon sa Dios nga iyang dawaton sa paghalad ug kadtong dili niya dawaton sa paghalad, ug managpares sa mga langgam ug managpares sa tanang matang sa binuhat nga nagakamang sa yuta, ⁹ mga laki ug baye, miduol kang Noe ug misulod sa arka, sumala sa gisugo sa Dios nga ilang buhaton. ¹⁰ Human sa pito ka adlaw, misugod na ang ulan ug misugod na ang paglunop sa kalibotan. ¹¹ Sa dihang nagpangidaron si Noe ug 600 ka tuig, sa ika-17 nga adlaw sa ikaduhang bulan, mibuhagay ang tanang tubig nga gikan sa kinahiladman sa yuta, ug misugod na ang hilabihan kakusog nga ulan nga daw sama kini nga adunay naabri nga tinubdan sa tubig ngadto sa langit. ¹² Nagpadayon ang ulan sulod sa 40 ka adlaw ug gabii. ¹³ Sa adlaw nga misugod na ang ulan, misulod si Noe sa arka uban ang iyang asawa, ug ang iyang tulo ka anak nga mao sila Sem, si Ham, ug Jafet, ug ang ilang mga asawa. ¹⁴ Sila ug ang pipila ka matang sa mga ihalas nga mananap, ug matag matang sa binuhing mga mananap, ug matag matang sa binuhat nga nagakamang sa yuta, ug matag matang sa mga langgam, ug uban pang mga binuhat nga adunay mga pako, silang tanan misulod sa arka. ¹⁵ Miduol kang Noe ang matag pares sa tanang matang sa mga mananap ug nanulod sila sa arka. ¹⁶ Adunay laki ug baye sa matag matang sa binuhat ang miduol kang Noe, sama sa giingon sa Dios nga ilang buhaton. Sa dihang anaa na silang tanan sa arka, gisirad-an na ni Yahweh ang pultahan. ¹⁷ Mipadayon ang pag-ulan sulod sa 40 ka adlaw ug midako ang lunop ug milutaw ang arka ibabaw sa yuta. ¹⁸ Naghaguros ang tubig sa kayutaan ug nagkaanam-anam kini ug kalawom, ug milutaw ang arka ibabaw sa tubig. ¹⁹ Hilabihan gayod ang pagtaas sa tubig ug gilapawan niini ang kabukiran ug ang tanan nga anaa ilalom sa kalangitan. ²⁰ Nalapawan usab bisan pa ang kinatas-ang kabukiran ug milapas kini sa unom ka metros nga tubig. ²¹ Tungod niini, nangamatay ang tanang may kinabuhi sa kalibotan. Lakip na niini ang mga langgam, ang binuhi nga mga mananap, ang ihalas nga mga mananap, ug ang tanang mga binuhat nga nagakamang sa yuta, lakip na ang tanang katawhan. ²² Nangamatay ang tanang binuhat nga may gininhawa nga nagpuyo sa yuta. ²³ Sa ingon niini nga paagi nangahanaw ang tanang binuhat nga may kinabuhi sa kalibotan—ang mga tawo, ang dagko nga mga mananap, ang mga binuhat nga nagakamang, ug ang mga langgam. Si Noe lamang ug ang iyang mga kauban didto sa arka ang nahibilin nga buhi. ²⁴ Nagpabilin ang lunop sa kalibotan sulod sa 150 ka adlaw.