¹ Daghang katuigan ang milabay, gisulayan sa Dios si Abraham aron makita kung motuman ba gayod si Abraham kaniya. Gitawag niya si Abraham, ug mitubag si Abraham, "Ania ako." ² Miingon ang Dios, "Ang imong anak nga si Isaac, nga imong gihigugma pag-ayo, ang bugtong anak nga akong gisaad nga ihatag kanimo. Ubana siya ug adto kamong duha sa yuta sa Moria, ug tungas ngadto sa bukid nga akong ipakita kanimo, ug ihalad siya ingon nga halad sinunog." ³ Busa sa sayo sa kabuntagon mibangon si Abraham, gikargahan niya ang iyang asno, ug giuban niya ang iyang duha ka sulugoon uban ang iyang anak, nga si Isaac. Giputolputol usab niya ang ubang sugnod alang sa halad sinunog. Unya nanlakaw na sila padulong sa dapit nga gisulti sa Dios kaniya. ⁴ Sa ikatulo ka adlaw sa ilang panaw, mihangad si Abraham ug nakita niya ang dapit kung asa siya gusto paadtuon sa Dios. ⁵ Giingnan ni Abraham ang iyang mga sulugoon, "Paghulat lamang kamong duha uban ang asno samtang kaming duha sa batang lalaki motungas didto. Simbahon namo ang Dios didto, ug unya mobalik kami kaninyo" ⁶ Unya gikuha ni Abraham ang sugnod alang sa halad sinunog ug gihatag niya kini kang Isaac aron pas-anon. Gidala ni Abraham ang panghaling. Gidala usab niya ang punyal, ug nagpadayon sila sa paglakaw. ⁷ Unya nangutana si Isaac sa iyang amahan nga si Abraham, nga nag-ingon, "Amahan ko." Mitubag si Abraham, "Ania ako, anak ko!" Miingon si Isaac, "Tan-awa, aduna na kitay pangsugnod ug mga uling aron mapasiga ang kalayo, apan asa man ang karnero alang sa halad sinunog?" ⁸ Si Abraham mitubag, "Anak ko, ang Dios mismo ang maghatag sa karnero alang sa halad sinunog." Busa nagpadayon sila sa paglakaw. ⁹ Miabot sila sa dapit nga gisulti sa Dios kaniya. Didto, naghimo si Abraham ug altar nga bato ug gipatongpatong ang kahoy sa ibabaw niini. Unya gigapos niya ang iyang anak nga si Isaac ug gipahigda siya sa altar, ibabaw sa kahoy. ¹⁰ Unya gikuha ni Abraham ang punyal ug gitaas aron patyon ang iyang anak nga lalaki. ¹¹ Apan ang anghel ni Yahweh nga gikan sa langit nagtawag kaniya ug miingon, "Abraham! Abraham!" Mitubag si Abraham, "Ania ako!" ¹² Miingon ang anghel, "Ayaw pasipad-i ang batang lalaki, tungod kay karon nasayod na ako nga magtahod ug magtuman ka gayod sa Dios. Nasayod ako niini tungod kay wala ka man magdumili sa paghalad sa imong bugtong anak." ¹³ Unya mihangad si Abraham ug nakita niya ang laking karnero sa duol nga nasangit ang sungay sa kasampinitan. Busa giadto ni Abraham ug gibira ang laking karnero ug giihaw kini, ug gihalad didto sa halaran ingon nga halad sinunog, puli sa iyang anak. ¹⁴ Ginganlan ni Abraham ang maong dapit ug "Si Yahweh ang magahatag." Sa karon nga panahon ang mga tawo nagtawag niini ug, "Sa bukid ni Yahweh, magahatag siya." ¹⁵ Ang anghel ni Yahweh nagtawag kang Abraham gikan sa langit sa ikaduha nga higayon. ¹⁶ Miingon siya, "Ako, si Yahweh, magpahayag kanimo nga gibuhat mo kung unsa ang akong gisulti, ug wala mo gihikaw ang imong bugtong anak. Busa nanumpa ako, sa akong kaugalingon ingon nga akong saksi, ¹⁷ nga sa umaabot nga panahon ang imong mga kaliwatan mahisama kadaghan sa mga kabituonan sa langit ug sa mga balas sa baybayon. Pildihon sa imong mga kaliwatan ang ilang mga kaaway ug sakopon ang ilang mga siyudad. ¹⁸ Nagtuman ka kanako, busa pinaagi sa imong mga kaliwatan ang katawhan sa tanang kanasoran sa kalibotan mapanalanginan." ¹⁹ Unya mibalik si Abraham ug Isaac kung asa naghulat ang iyang mga sulugoon, ug namalik sila sa Beersheba, ug si Abraham ug ang iyang katawhan namuyo didto. ²⁰ Human nahitabo kining mga butanga, adunay tawo nga nagsulti kang Abraham, "Si Milca nga asawa sa imong igsoon nga si Nahor, nanganak usab." ²¹ Karon ang kamagulangan nga anak nga lalaki mao si Uz. Ang sunod mao si Buz. Sunod kang Buz mao si Kemuel, ang amahan ni Aram. ²² Sunod ni Kemuel mao sila si Chesed, unya si Hazo, si Pildash, si Jidlaph ug si Betuel. ²³ Si Betuel mao ang amahan ni Rebeca. Ug mao kadtong walo ka mga anak nga lalaki ni Milca, ang asawa sa igsoon ni Abraham, nga si Nahor. ²⁴ Aduna usab puyopuyo si Nahor, nga ginganlan ug Beumah. Nakaanak siya ug upat ka lalaki: sila si Tebah, si Gaham,si Tahash ug si Maacah.