¹ Mao kini ang listahan sa mga kaliwat nga gikan kang Adan. Sa dihang gibuhat sa Dios ang mga tawo, gibuhat niya sila nga sama kaniya sa daghang pamaagi. ² Nagbuhat siya ug usa ka lalaki ug usa ka babaye. Gipanalanginan niya sila, ug sa adlaw nga gibuhat niya sila, gitawag niya sila nga 'mga tawo.' ³ Sa dihang nagpanuigon na si Adan ug 130, nahimo siyang amahan sa usa ka anak nga lalaki nga sama kaniya. Mao kana ang anak nga lalaki nga ginganlan niya ug Set. ⁴ Human matawo si Set, nagkinabuhi pa si Adan ug dugang 800 ka tuig, ug niadtong mga tuiga nahimo pa siyang amahan sa uban pang anak nga mga lalaki ug mga babaye. ⁵ Nagkinabuhi si Adan ug 930 ka tuig, ug unya namatay siya. ⁶ Sa dihang nagpanuigon na si Set ug 105, nahimo siyang amahan ni Enos. ⁷ Human matawo si Enos, nagkinabuhi pa si Set ug dugang 807 ka tuig, ug nahimong amahan sa uban pang anak nga mga lalaki ug mga babaye. ⁸ Nagkinabuhi si Set ug 912 ka tuig, ug unya namatay siya. ⁹ Sa dihang nagpanuigon na si Enos ug 90, nahimo siya nga amahan ni Kenan. ¹⁰ Human matawo si Kenan, nagkinabuhi pa si Enos ug dugang 815 ka tuig ug nahimo pa siyang amahan sa uban pang anak nga mga lalaki ug mga babaye. ¹¹ Nagkinabuhi si Enos ug 905 ka tuig, ug unya namatay siya. ¹² Sa dihang nagpanuigon na si Kenan ug 70, nahimo siyang amahan ni Mahalalel. ¹³ Human matawo si Mahalalel, nagkinabuhi pa si Kenan ug dugang 840 ka tuig ug nahimong amahan sa uban pang anak nga mga lalaki ug mga babaye. ¹⁴ Nagkinabuhi si Kenan ug 910 ka tuig, ug unya namatay siya. ¹⁵ Sa dihang nagpanuigon na si Mahalalel ug 65, nahimo siyang amahan ni Jared. ¹⁶ Human matawo si Jared, nagkinabuhi pa si Mahalalel ug dugang 830 ka tuig ug nahimong amahan sa uban pang anak nga mga lalaki ug mga babaye. ¹⁷ Nagkinabuhi si Mahalalel ug 895 ka tuig, ug unya namatay siya. ¹⁸ Sa dihang nagpanuigon na si Jared ug 162, nahimo siyang amahan ni Enoc. ¹⁹ Nagkinabuhi pa si Jared ug 800 ka tuig human matawo si Enoc, ug nahimo siyang amahan sa uban pang anak nga mga lalaki ug mga babaye. ²⁰ Nagkinabuhi si Jared ug 962 ka tuig, ug unya namatay siya. ²¹ Sa dihang nagpanuigon na si Enoc ug 65, nahimo siyang amahan ni Metusela. ²² Nagkinabuhi si Enoc nga adunay suod nga relasyon sa Dios sulod sa 300 ka tuig human matawo si Metusela, ug nahimo siyang amahan sa uban pang anak nga mga lalaki ug mga babaye. ²³ Nagkinabuhi si Enoc ug 365 ka tuig. ²⁴ Aduna siyay suod nga relasyon sa Dios, ug usa ka adlaw niana nahanaw siya, tungod kay gikuha man siya sa Dios aron makig-uban kaniya. ²⁵ Sa dihang nagpanuigon na si Metusela ug 187, nahimo siyang amahan ni Lamec. ²⁶ Nagkinabuhi pa si Metusela ug 782 ka tuig human matawo si Lamec, ug nahimo siyang amahan sa uban pang anak nga mga lalaki ug mga babaye. ²⁷ Nagkinabuhi si Metusela ug 969 ka tuig, ug unya namatay siya. ²⁸ Sa dihang nagpanuigon na si Lamec ug 182, nahimo siyang amahan sa usa ka anak nga lalaki, ²⁹ nga ginganlan niya ug Noe, tungod kay, sama sa iyang giingon, "Magdala siya kanato ug kahupayan gikan sa tanang hilabihang buluhaton nga atong ginabuhat aron makakuha kita ug pagkaon gikan sa yuta nga gitunglo ni Yahweh." ³⁰ Nagkinabuhi pa si Lamec ug 595 ka tuig human matawo si Noe ug nahimong amahan sa uban pang anak nga mga lalaki ug mga babaye. ³¹ Nagkinabuhi si Lamec ug 777 ka tuig, ug unya namatay siya. ³² Sa dihang nagpanuigon na si Noe ug 500, nahimo siyang amahan sa mga anak nga lalaki nga ginganlan ug Sem, Ham, ug Jafet.