¹ Nakigdulog si Adan sa iyang asawa nga si Eva, ug namabdos siya ug nanganak ug batang lalaki nga iyang ginganlan ug Cain, nga nagpasabot "nakabaton," tungod kay siya miingon, "Tungod sa tabang ni Yahweh nakabaton ako ug anak nga lalaki." ² Human sa pipila ka panahon nakabaton na usab siya ug laing anak nga lalaki, ug ginganlan niya siya ug Abel. Sa pagkadako na sa mga bata, si Abel nag-atiman ug karnero ug mga kanding, ug si Cain nahimong mag-uuma. ³ Usa ka adlaw miani si Cain ug pipila sa iyang mga tinanom ug gidala niya kini kang Yahweh ingon nga halad ngadto kaniya, ⁴ ug mikuha si Abel ug pipila ka unang nati nga gianak sa mga karnero gikan sa panon ug gipatay kini, ingon nga halad, ug gihatag kang Yahweh ang pinakatambok nga bahin, nga mao ang pinakamaayong bahin. Nahimuot si Yahweh kang Abel ug sa iyang halad, ⁵ apan wala siya nahimuot kang Cain ug sa iyang halad. Busa nasuko pag-ayo si Cain, ug nagmug-ot. ⁶ Miingon si Yahweh ngadto kang Cain, "Dili ka angay nga masuko! Dili ka angay nga magmug-ot sama niana! ⁷ Kung imong gibuhat kung unsa ang insakto, dawaton ko ikaw. Apan kung wala nimo buhata kung unsa ang maayo, ang daotan nga buot nimong buhaton motukob kanimo, sama sa liyon nga naghulat sa gawas sa imong pultahan aron sa pag-ataki kanimo. Ang imong tinguha nga magpakasala buot nga modumala kanimo, apan kinahanglan nga pugngan mo kini." ⁸ Apan usa ka adlaw, miingon si Cain sa iyang manghod nga lalaki nga si Abel, "Kuyog kanako sa kaumahan." Busa miadto sila. Ug sa dihang anaa na sila sa kaumahan, dihadiha giataki ni Cain ang iyang igsoon nga si Abel ug gipatay siya. ⁹ Unya, bisan tuod ug nasayod na si Yahweh kung unsa ang gibuhat ni Cain, miingon siya ngadto kang Cain, "Nasayod ka ba kung hain ang imong manghod nga si Abel?" Mitubag si Cain, "Wala, wala ako masayod. Dili nako trabaho ang pagbantay sa akong manghod!" ¹⁰ Miingon si Yahweh, "Makalilisang ang imong gihimo! Ang dugo sa imong igsoon nga mituhop sa yuta naghukom nga ikaw sad-an. ¹¹ Imong gipatay ang imong manghod, ug karon ang yuta nga natuhopan sa dugo sa imong manghod dili na modawat kanimo ug ang imong kahago sa pag-uma mapakyas. ¹² Sa dihang modaro ka sa yuta aron sa pagtanom, gamay na lamang ang ihatag sa yuta kanimo. Magpadayon ka sa paglatagaw sa kalibotan, ug walay dapit nga kanunay mapuy-an." ¹³ Mitubag si Cain kang Yahweh, "Ang imong pagsilot kanako sobra ra sa akong makaya. ¹⁴ Imo akong papahawaon gikan sa yuta nga ako nang gidaro, ug dili na gayod ako makaduol sa imong presensiya. Dugang pa niana, kanunay ako nga maglatagaw sa kalibotan ug walay dapit nga kanunay mapuy-an, ug pagapatyon ako ni bisan kinsa nga makakita kanako." ¹⁵ Apan miingon si Yahweh kaniya, "Dili, dili kana mahitabo. Butangan ko ikaw ug patik aron sa pagpahimangno sa tanan nga makakita kanimo nga silotan nako siya pag-ayo kung iya kang patyon. Silotan ko kanang tawhana sa pito ka pilo labaw pa sa akong pagsilot kanimo." Unya gibutangan ni Yahweh si Cain ug patik. ¹⁶ Busa mibiya si Cain kang Yahweh ug miadto sa yuta nga ginganlan ug Nod ug didto mipuyo, nga nagpasabot 'naglatagaw,' nga anaa sa sidlakang bahin sa Eden. ¹⁷ Sa wala madugay, nakigdulog si Cain sa iyang asawa, ug namabdos siya ug nakaanak ug batang lalaki, nga iyang ginganlan ug Enoc. Unya misugod pagtukod si Cain ug siyudad, ug iyang ginganlan ang siyudad ug 'Enoc,' sama sa ngalan sa iyang anak nga lalaki. ¹⁸ Midako na si Enoc ug naminyo ug nahimong amahan sa anak nga lalaki nga ginganlan niya ug Irad. Sa dihang midako na si Irad nahimo siyang amahan sa anak nga lalaki nga ginganlan niya ug Mehujael. Si Mehujael midako ug nahimong amahan sa anak nga lalaki nga ginganlan niya ug Methushael. Midako si Methushael ug nahimong amahan ni Lamec. ¹⁹ Sa dihang midako na si Lamec nakaminyo siya ug duha ka babaye. Ang ngalan sa usa mao si Ada ug ang usa si Zila. ²⁰ Nanganak si Ada ug batang lalaki nga ginganlan ug Jabal. Sa wala madugay, si Jabal ang unang tawo nga nahimong mipuyo sa mga tolda tungod kay nagapanaw siya sa nagkalainlaing dapit sa pag-atiman sa mga kahayopan. ²¹ Ang iyang manghod nga lalaki ginganlan ug Jubal. Siya ang unang tawo nga mibuhat ug alpa ug plawta. ²² Ang laing asawa ni Lamec nga si Zila nanganak ug batang lalaki nga iyang ginganlan ug Tubal Cain. Sa wala madugay nakahibalo siya unsaon pagbuhat ug mga butang nga hinimo gikan sa bronse ug puthaw. Ang ngalan sa manghod nga babaye ni Tubal Cain mao si Naama. ²³ Usa ka adlaw giingnan ni Lamec ang iyang duha ka asawa, "Ada ug Zila, akong duha ka mga asawa, paminaw kamo pag-ayo sa kung unsa ang akong isulti. Usa ka batan-ong lalaki ang nagsumbag ug nagsamad kanako, busa ako siyang gipatay. ²⁴ Miingon si Yahweh sa dugay na nga panahon nga manimalos siya ug silotan niya ang si bisan kinsa nga mopatay kang Cain sa pito ka pilo labaw pa sa pagsilot niya kang Cain. Busa si bisan kinsa nga mosulay sa pagpatay kanako, mamahimong silotan siya labaw pa sa 77 ka pilo." ²⁵ Padayong nakigdulog si Adan sa iyang asawa, ug namabdos na usab siya ug nakaanak ug laing batang lalaki, nga iyang ginganlan ug Set. Siya miingon, "Nganlan ko siya ug Set tungod kay gihatagan ako sa Dios ug laing anak aron magpuli kang Abel, kay gipatay man siya ni Cain." ²⁶ Sa dihang midako na si Set, nahimo siyang amahan sa anak nga lalaki ug ginganlan niya kini ug Enos. Nianang panahona nagsugod ang mga tawo sa pagsimba kang Yahweh.