¹ Karon ang bitin mao ang pinakalimbongan sa tanang ihalas nga mga mananap nga gibuhat ni Yahweh nga Dios. Ang bitin miingon sa babaye, "Tinuod ba nga nagsulti ang Dios kaninyo, 'Ayaw pagkaon sa bisan unsa nga bunga sa kahoy nga anaa dinhi sa tanaman'?" ² Ang babaye mitubag, "Ang gisulti sa Dios, 'Ayaw pagkaon sa bunga nga gikan sa kahoy nga anaa sa tungatunga sa tanaman o sa paggunit niini. Kung inyo kanang pagabuhaton, mamatay kamo. ³ Apan makakaon kamo sa bunga sa ubang mga kahoy.'" ⁴ Ang bitin miingon ngadto sa babaye, "Dili, dili gayod kamo mamatay. ⁵ Gisulti lamang kana sa Dios tungod kay nasayod siya nga sa dihang mokaon kamo sa bunga gikan nianang kahoya, makasabot kamo sa bag-ong mga butang. Kini sama nga maabli ang inyong mga mata, ug masayod kamo kung unsa ang maayo nga buhaton ug kung unsa ang daotan nga buhaton, sama sa Dios." ⁶ Nakita sa babaye nga ang bunga niana nga kahoy lamiang kan-on, ug maanindot kaayo kini. Gitinguha niya kini tungod kay naghunahuna siya nga makahimo kini kaniya nga maalamon. Busa mipupo siya ug bunga ug gikaon kini. Unya gihatagan niya ang iyang bana, ug gikaon niya kini. ⁷ Dihadiha dayon daw naabli ang ilang mga mata, ug nasayran nila nga sila hubo, mao nga naulaw sila. Busa mikuha sila ug mga dahon sa igera ug gihimo nila kining tapis aron pangtabon sa ilang mga kaugalingon. ⁸ Sa pagkahapon, sa dihang mihaguros ang bugnaw nga hangin, nadunggan nila ang kasikas ni Yahweh nga Dios samtang nagalakaw siya sa tanaman. Busa mitago sa kasagbotan didto sa tanaman ang lalaki ug ang iyang asawa, aron nga dili sila makita ni Yahweh nga Dios. ⁹ Apan gitawag ni Yahweh nga Dios ang lalaki, nagaingon ngadto kaniya, "Nganong nagsulay ka man sa pagtago gikan kanako?" ¹⁰ Mitubag ang lalaki, "Nadungog ko ang kasikas sa imong paglakaw sa tanaman, ug hubo ako, mao nga nahadlok ako ug mitago gikan kanimo." ¹¹ Miingon ang Dios, "Giunsa man nimo pagkahibalo nga ikaw hubo? Tingali tungod kini kay mikaon ka sa bunga nga gikan sa kahoy nga akong gisulti kanimo, "Ayaw kaonon ang iyang bunga.' Mao ba kana ang imong gibuhat?" ¹² Miingon ang lalaki, "Gihatag mo kining babaye kanako aron akong makauban. Siya ang naghatag kanako sa bunga nga gikan nianang kahoya, busa gikaon ko kini." ¹³ Unya miingon si Yahweh nga Dios sa babaye, "Nganong gibuhat mo man kanang butanga?" Mitubag ang babaye, "Gikaon ko kini tungod kay ang bitin milimbong kanako." ¹⁴ Unya miingon si Yahweh nga Dios ngadto sa bitin, "Tungod kay imo kining gibuhat, sa tanan nga binuhing mga mananap ug ihalas nga mga mananap, ikaw lamang ang akong pagatunglohon. Tungod niini, ikaw ug ang tanang mga bitin mokamang sa yuta gamit ang inyong tiyan, ug mao nga samtang buhi ka pa ang imong pagakan-on adunay hugaw. ¹⁵ Akong himoon nga ikaw ug ang babaye magkaaway, ug ang imong mga kaliwatan ug ang iyang mga kaliwatan magkaaway. Paakon nimo ang tikod sa iyang tiil, apan dugmokon niya ang imong ulo." ¹⁶ Unya miingon si Yahweh ngadto sa babaye, "Himoon ko nga sakit kaayo alang kanimo ang pagpanganak. Gustohon nimo nga makauban ang imong bana, apan siya modumala kanimo." ¹⁷ Unya miingon siya ngadto sa lalaki, "Naminaw ka sa gisulti sa imong asawa, ug mikaon ka sa bunga sa kahoy nga gisugo ko kanimo, 'Ayaw kini kaonon.' Busa himoon ko nga lisod ang pagtubo sa mga tanom sa yuta tungod sa imong gibuhat. Maningkamot ka sa pagtrabaho aron makakuha ka ug abot gikan sa yuta aron makaon. ¹⁸ Ang mga sampinit ug mga kudyapa ug ang ubang mga sagbot motubo ug mopugong sa pagtubo sa imong gipangtanom. Ug sa pagkaon, mokaon ka lamang kung unsa ang mitubo diha sa imong kaumahan. ¹⁹ Sa tibuok nimong kinabuhi pagasington ka sa pagtrabaho aron makakaon. Ug ikaw mamatay, ug ang imong lawas ilubong sa yuta. Gihimo ko ikaw gikan sa yuta, busa ang imong lawas mahimong yuta pag-usab." ²⁰ Ang lalaki, nga ang ngalan Adan, ginganlan ang iyang asawa ug Eva, nga nagpasabot "buhi" tungod kay siya man ang nahimong katigulangan sa tanang mga tawo. ²¹ Unya mipatay si Yahweh nga Dios ug pipila ka mga mananap ug naghimo ug sinina gikan sa mga panit niini alang kang Adan ug sa iyang asawa. ²² Unya miingon si Yahweh nga Dios, "Tan-awa! Kadtong duha nahimo na nga sama kanato tungod kay nasayod na sila kung unsa ang maayo ug unsa ang daotan nga buhaton. Busa karon, dili na maayo kung sila makakab-ot ug makapupo ug makakaon sa bunga nga gikan sa kahoy nga makahimo sa mga tawo nga mokaon niini nga mabuhi sa kahangtoran!" ²³ Busa gipapahawa ni Yahweh nga Dios ang lalaki ug ang iyang asawa gikan sa tanaman sa Eden. Gibuhat ni Yahweh nga Dios si Adan gikan sa yuta, ug gipugos niya siya sa pagdaro sa yuta. ²⁴ Human sila gipapahawa ni Yahweh nga Dios, nagbutang siya ug kerubin ug nagadilaab nga espada nga nagtuyoktuyok didto sa sidlakang bahin sa tanaman, aron sa pag-atang sa agianan, aron nga ang mga tawo dili na makabalik sa kahoy nga makahimo sa tanan nga mokaon sa bunga niini nga mabuhi hangtod sa kahangtoran.