¹ Mao kana ang paagi sa pagbuhat sa Dios sa kalangitan ug sa kayutaan ug sa mga buhing binuhat nagpuno niini. ² Sa panahon sa ikapito na ka adlaw, nahuman sa Dios ang tanan niyang buluhaton, busa wala na siya namuhat nianang adlawa. ³ Ang Dios nag-ingon nga ang ikapito nga adlaw mahimong alang kaniya. Gilahi niya kadtong mga adlawa aron mahimong pinasahi nga mga adlaw, tungod kay sa ikapito nga adlaw wala na namuhat ang Dios, paghuman niya ug buhat sa tanan niyang buluhaton sa paghimo sa tanang butang. ⁴ Ang mosunod mao kung giunsa pagbuhat sa Dios ang kalangitan ug ang kayutaan. ⁵ Ang Dios, nga ang ngalan Yahweh, maoy naghimo sa kalangitan ug sa kayutaan. Sa sinugdanan wala gayo'y mga tanom nga mitubo, tungod kay wala pa man gitugot ni Yahweh nga mobundak ang ulan sa yuta. Dugang pa niana, wala pay tawo nga modaro sa yuta aron sa pagtanom. ⁶ Hinuon, mitungha ang yamog gikan sa yuta, hinungdan nga aduna nay tubig sa tibuok kayutaan. ⁷ Unya nagkuha si Yahweh nga Dios ug yuta ug gihimo niya ang lalaki. Gihuypan niya ang ilong sa lalaki pinaagi sa iyang kaugalingong ginhawa nga nagahatag ug kinabuhi, ug nahimong buhing binuhat ang tawo. ⁸ Naghimo si Yahweh nga Dios ug usa ka tanaman sa dapit nga ginganlan ug Eden, nga nahimutang sa sidlakang bahin sa yuta sa Canaan. Didto niya gibutang ang tawo nga iyang gihimo. ⁹ Gipatubo ni Yahweh nga Dios diha sa yuta ang nagkalainlaing matang sa kahoy nga nindot tan-awon ug nagapamunga ug bunga nga lamian kaonon. Gibutang usab niya sa tunga sa tanaman ang punoan nga makahatag ug kinabuhi nga walay kataposan niadtong tawo nga mikaon sa bunga niini. Gibutang usab niya ang lain pang punoan nga makahatag ug kahibalo sa kung unsa ang buhat nga maayo ug kung unsa ang buhat nga daotan niadtong tawo nga mikaon sa bunga niini. ¹⁰ Midagayday gikan sa Eden ang usa ka suba aron maghatag ug tubig sa tanaman. Sa gawas sa Eden, ang suba nabahin sa upat ka mga suba. ¹¹ Pishon ang ngalan sa una nga suba. Kana nga suba midagayday paingon sa yuta sa Havila, diin adunay bulawan. ¹² Ug lunlon gayod kana nga bulawan. Aduna usab didto'y tagok nga humot kaayo nga ginatawag ug bedelyom ug mahalon nga mga bato nga ginatawag ug onise. ¹³ Ang ngalan sa ikaduha nga suba mao ang Gihon. Kana nga suba midagayday sa tibuok kayutaan sa Cus. ¹⁴ Ang ngalan sa ikatulo nga suba mao ang Tigris. Midagayday kini sa siyudad sa Asur. Ang ngalan sa ika-upat nga suba mao ang Eufrates. ¹⁵ Gikuha ni Yahweh nga Dios ang lalaki ug gibutang niya kini sa Eden aron mouma ug moatiman niini. ¹⁶ - ¹⁷ Apan miingon si Yahweh ngadto kaniya, "Dili ko ikaw tugotan nga mokaon sa bunga sa kahoy nga makahatag kanimo ug kahibalo sa buhat nga maayo ug sa buhat nga daotan. Kung mokaon ka sa bisan unsa nga bunga niana nga kahoy, sa adlaw nga mokan-on ka niini mamatay ka gayod. Apan tugotan ko ikaw sa pagkaon sa bisan unsa nga bunga sa ubang mga kahoy sa tanaman." ¹⁸ Miingon si Yahweh nga Dios, "Dili maayo alang niining tawhana ang mag-inusara. Busa buhatan ko siya ug kauban nga angay kaniya." ¹⁹ Nagkuha si Yahweh nga Dios ug yuta ug gihimo niya ang tanang matang sa mga mananap ug mga langgam, ug gidala niya sila ngadto sa tawo aron madungog kung unsang ngalana ang iyang ihatag ngadto kanila. Ug ginganlan sa lalaki ang tanang mananap nga gihimo ni Yahweh. ²⁰ Unya ginganlan sa lalaki ang tanang matang sa mga mananap, mga langgam, ug mga ihalas nga mga mananap, apan wala niining mga binuhat ang angayan aron makauban sa lalaki. ²¹ Busa gipakatulog pag-ayo ni Yahweh nga Dios ang lalaki. Samtang natulog ang lalaki, gikuha ni Yahweh ang usa ka gusok sa lalaki. Unya gisirad-an dayon niya ang naabri nga lawas ug giayo kini. ²² Unya gihimo ni Yahweh ang babaye gikan sa gusok nga iyang gikuha gikan sa lawas sa lalaki, ug gidala niya kini ngadto sa lalaki. ²³ Ang tawo miingon, "Karon ania na gayoy sama kanako! Ang iyang bukog gikan sa usa sa akong mga bukog, ug ang iyang unod gikan sa akong unod. Busa pagatawagon ko siya nga babaye, tungod kay gikan man siya kanako, nga usa ka lalaki." ²⁴ Ang una nga babaye gikuha gikan sa lawas sa lalaki, mao nga sa dihang magminyo ang lalaki ug ang babaye, kinahanglan nilang mobiya sa ilang mga ginikanan. Ang lalaki makig-ipon sa iyang asawa, aron nga silang duha mahimong usa ka tawo. ²⁵ Bisan tuod ang lalaki ug ang iyang asawa hubo, wala sila maulaw nga hubo sila.