¹ Sa sinugdanan, gibuhat sa Dios ang mga langit ug ang kalibotan. ² Sa dihang gisugdan niya pagbuhat ang kalibotan, kini walay porma ug labihan ka mingaw. Ang kangitngit nilukop sa ibabaw sa lawom nga tubig. Ug nagalihok ang Espiritu sa Dios ibabaw sa tubig. ³ Miingon ang Dios, ''Mandoan ko nga motungha ang kahayag," ug mitungha ang kahayag. ⁴ Nahimuot ang Dios sa kahayag. Unya gibuhat niya ang kahayag nga modan-ag sa pipila ka dapit nianang taknaa, samtang sa ubang dapit nagpabilin gihapon ang kangitngit. ⁵ Ginganlan niya ang kahayag ug "adlaw," ug ginganlan niya ang kangitngit ug "gabii." Mao kini ang kagabhion ug kabuntagon, ang unang adlaw. ⁶ Unya miingon ang Dios, "Mandoan ko nga motungha ang haw-ang nga sama sa dako nga dapit nga maoy magbahin sa tubig ngadto sa duha ka bahin." ⁷ Ug mao kana ang nahitabo. Gihimo sa Dios ang haw-ang nga sama sa dako nga dapit ug gibulag niini ang tubig nga anaa sa ibabaw gikan sa tubig sa kalibotan nga anaa sa ubos niini. ⁸ Ang maong haw-ang nga sama sa dako nga dapit ginganlan sa Dios ug "kawanangan." Mao kini ang kagabhion ug kabuntagon, ang ikaduhang adlaw. ⁹ Unya miingon ang Dios, "Mandoan ko ang tubig nga anaa sa ubos sa kawanangan nga mag-abot, ug motungha ang mala nga yuta ug mopaibabaw." Ug mao kana ang nahitabo. ¹⁰ Ginganlan sa Dios ang mala nga dapit ug "yuta," ug gihatagan niya ug ngalan ang nagtapok nga tubig nga mao ang "kadagatan." Nahimuot ang Dios sa yuta ug sa kadagatan. ¹¹ Unya miingon ang Dios, "Mandoan ko ang kalibotan nga mohatag ug daghang matang sa mga tanom nga magpadaghan sa ilang kaugalingon—mga tanom nga mohatag ug mga binhi ug kahoy nga mohatag ug bunga nga adunay binhi." Ug mao kana ang nahitabo. ¹² Unya ang mga tanom nanubo sa kayutaan. Ang matag matang sa mga tanom nagsugod sa paghatag sa ilang binhi, ug ang matag matang sa kahoy namunga ug bunga nga adunay liso. Nahimuot ang Dios sa mga tanom ug mga kahoy. ¹³ Mao kini ang kagabhion ug kabuntagon, ang ikatulo nga adlaw. ¹⁴ Unya miingon ang Dios, "Mandoan ko ang daghang kahayag nga modan-ag sa kawanangan. Sila ang maghatag ug kalahian sa adlaw gikan sa gabii. Pinaagi sa pag-usab sa ilang hulagway ilang itudlo ang panahon sa nagkalahilahi nga mga kapistahan ug sa uban nga mga butang nga ginabuhat sa katawhan sa kasamtangan nga panahon ug sa mga katuigan. ¹⁵ Buot ko usab nga kining kahayag sa kawanangan modan-ag sa kalibotan." Ug mao kana ang nahitabo. ¹⁶ Gihimo sa Dios ang duha kanila ingon nga dagkong mga kahayag. Ang pinakadako, mao ang adlaw, gihimo niya kini aron magdumala sa adlaw ug ang mas gamay, mao ang bulan, gihimo niya kini aron magdumala sa kagabhion. Gihimo usab niya ang kabituonan. ¹⁷ Gipahimutang silang tanan sa Dios sa kawanangan aron modan-ag sa kalibotan, ¹⁸ aron madumalahan ang adlaw ug ang gabii, ug sa pagbulag sa kahayag sa adlaw gikan sa kangitngit sa kagabhion. Nahimuot ang Dios sa mga kahayag. ¹⁹ Mao kini ang kagabhion ug kabuntagon, ang ika-upat nga adlaw. ²⁰ Unya miingon ang Dios, "Pun-a ang katubigan sa tanang matang sa mga buhing binuhat nga akong gihimo, ug pun-a ang kawanangan sa mga kalanggaman nga molupad ibabaw sa kayutaan." ²¹ Busa gibuhat sa Dios ang dagkong mga binuhat sa dagat ug ang ubang matang sa binuhat nga molangoy nga magapanon sa tubig, ug gihimo niya ang matag-usa nga mosanay. Gibuhat usab niya ang daghang matang sa mga kalanggaman nga adunay mga pako, ug gihimo niya ang matag-usa nga mosanay. Nahimuot ang Dios diha kanila. ²² Busa gipanalanginan sila sa Dios. Miingon siya, "Panaghan ug pagsanay kamo. Buot ko nga ang mga binuhat sa tubig magpuyo sa tanang bahin sa katubigan, ug managhan usab ang mga kalanggaman." ²³ Mao kini ang kagabhion ug ang kabuntagon, ang ikalimang adlaw. ²⁴ Unya miingon ang Dios, "Mandoan ko ang kalibotan nga maghatag ug nagkalainlaing matang sa mga mananap nga manganak ug magpuyo sa kalibotan. Motungha ang daghang matang sa mga binuhing mananap, binuhat nga nagakamang sa yuta, ug dagko nga ihalas nga mga mananap." Ug mao kana ang nahitabo. ²⁵ Gihimo sa Dios ang tanang matang sa mga ihalas nga mananap ug binuhing mga mananap ug tanang matang sa binuhat nga nagakamang sa yuta. Mosanay pa gayod ang mga mananap ug sama kanila. Nahimuot ang Dios diha kanila. ²⁶ Unya miingon ang Dios, "Buhaton nato ang mga tawo nga sama kanato. Buot ko nga sila ang magdumala sa mga isda sa dagat, sa kalanggaman sa kawanangan, sa tanang binuhi nga mga mananap, ug sa ubang mga binuhat nga nagalihok ibabaw sa yuta." ²⁷ Busa gihimo sa Dios ang tawo nga sama kaniya sa daghang paagi. Gihimo niya sila nga mahisama kaniya. Gihimo niya sila nga lalaki ug babaye. ²⁸ Gipanalanginan sila sa Dios, nga nag-ingon, ''Pagbaton kamo ug daghang kaanakan, nga mopuyo sa tibuok kalibotan ug magdumala niini. Buot ko nga dumalahan ninyo ang mga isda sa kadagatan ug ang kalanggaman sa kawanangan ug ang tanang binuhat nga nagalihok ibabaw sa yuta." ²⁹ Miingon ang Dios, "Tan-awa! Gihatag ko kaninyo ang tanang tanom nga mohatag ug binhi sa tibuok kalibotan, ug ang tanang kahoy nga mohatag ug bunga. Kining tanan nga mga butang alang kaninyo aron kan-on. ³⁰ Gihatag ko ang tanang lunhaw nga mga tanom aron mahimong pagkaon sa tanang ihalas nga mga mananap, alang sa mga kalanggaman, ug alang sa tanang binuhat nga nagalihok ibabaw sa yuta, aron nga ang tanan nga adunay kinabuhi mabuhi." Ug mao kana ang nahitabo. ³¹ Nahimuot ang Dios sa tanan nga iyang gihimo. Tinuod gayod nga kining tanan labihan ka maayo. Mao kini ang kagabhion ug ang kabuntagon, ang ika-unom nga adlaw.