¹ Gipatawag ni Jacob ang tanan niyang mga anak ug giingnan sila, ² "Tapok kamong tanan ug libot duol kanako aron sultihan ko kamo kung unsay mahitabo sa umaabot. Akong mga anak, dali ug paminaw kanako. Ako ang inyong amahan nga si Jacob. ³ Ruben, ikaw ang kamagulangan nakong anak. Natawo ka sa dihang batan-on pa ako ug kusgan. Sa dihang hingkod na ako, ikaw mao ang akong unang anak. Mas magarbohon ka ug mas kusgan kaysa sa uban nakong mga anak. ⁴ Apan sama ikaw sa mga balod sa kadagatan nga dili makapuyo. Busa karon dili na ikaw ang mas mahinungdanon nako nga anak, tungod kay gihugawan mo man ang akong higdaanan ug nakigdulog sa akong puyo-puyo. Mao kana ang hinungdan nga naulawan ako, nga imong amahan. ⁵ Simeon ug Levi, kamong duha nga managsoon nagbuhat ug daw sama sa mga kriminal. Gigamit ninyo ang inyong mga espada sa pagbuhat ug dautan. ⁶ Dili ako gustong makig-uban kaninyo sa dihang maghimo kamo ug daotang mga plano. Dungganon ra kaayo ko sa pag-apil sa inyong panagtigom, tungod kay mipatay kamo ug tawo sa dihang kamo nasuko pag-ayo, ug gibunalan ninyo ang torong baka aron lamang sa paglingawlingaw. ⁷ Ang Dios miingon, 'Ako silang tunglohon tungod sa ilang sobra nga kasuko, sa ilang pagbuhat ug mapintas sa dihang sila napungot pag-ayo. Patibulaagon ko ang ilang mga kaliwatan sa tibuok yuta sa Israel.' ⁸ Juda, ang imong magulang ug ang imong manghod nga mga igsoon magadayeg kanimo. Moyukbo sila sa imong atubangan, tungod kay imong gibuntog sa hingpit ang imong mga kaaway. ⁹ Si Juda mahisama sa batan-ong liyon nga mibalik sa iyang lungag human siya mabusog sa mga hayop nga iyang gipatay. Sama siya sa liyon nga mihigda ug nagtuy-od sa iyang mga tiil human makakaon; wala gayoy bisan usa nga maka-ako sa pagtugaw niini. ¹⁰ May magdumala gayod kanunay gikan sa kaliwat ni Juda. Ang matag-usa maggunit ug baton aron sa pagpakita nga aduna siyay katungod ingon nga hari. Buhaton niya kini hangtod nga ang mga nasod maghatag kaniya ug buhis ug magpakita nga sila magtuman kaniya. ¹¹ Ang parasan sa iyang mga kaliwatan mohatag ug madagayaong ubas. Ingon nga resulta, sila dili magdumili nga higtan ang ilang mga nating asno ngadto sa parasan sa tuyo nga sila makakaon sa mga dahon niini. Ang bino mahimong arang kadaghan, hinungdan nga sila makahimo sa paglaba sa ilang mga bisti diha sa bino; ilang pagalabhan ang ilang mga kupo sa bino nga sama ka pula sa dugo. ¹² Ang ilang mga mata mamula pag-ayo tungod sa pag-inom ug sobrang bino, apan ang ilang mga ngipon mamahimong puti kaayo tungod sa pag-inom ug daghang gatas nga gikan sa mga baka. ¹³ Zabulon, ang imong mga kaliwatan magapuyo daplin sa dagat nga diin adunay luwas nga dunggoanan sa mga barko. Ang ilang yuta mosangko paingon ngadto sa amihanan sama kalayo sa siyudad sa Sidon. ¹⁴ Isacar, ang imong kaliwatan mahimong sama sa mga kusgang asno nga naghigda sa yuta taliwala sa ilang mga karga, gikapoy pag-ayo nga dili na makatindog! ¹⁵ Makita nila nga ang ilang pahulayanang lugar maayo ug ang maong yuta nakapahimuot kanila pag-ayo. Apan ilang pikoon ang ilang likod aron sa pagpas-an sa mga bug-at ug sa pagpugos sa pagpatrabaho alang sa uban. ¹⁶ Dan, bisan tuod ang imong banay diyutay, ang imong mga pangulo magdumala sa ilang mga katawhan sama sa mga pangulo sa Israel magadumala sa ilang katawhan. ¹⁷ Ang imong kaliwatan mahisama sa mga bitin nga anaa sa kilid sa dalan, sama sa makahilo nga mga bitin nga naghigda daplin sa agianan. Ilang paakon ang tikod sa mga kabayo nga moagi, hinungdan nga mangahulog ang mga nagkabayo sa dihang ialsa paitaas sa mga kabayo ang ilang mga tiil." ¹⁸ Unya nag-ampo si Jacob, "Yahweh, nagpaabot ako nga luwason mo ako gikan sa akong mga kaaway." ¹⁹ Mipadayon si Jacob sa pagsugilon sa iyang mga anak kung unsa ang mahitabo sa umaabot. Miingon siya, "Gad, ang imong banay atakihon sa pundok sa mga bandido, apan ang imong banay mogukod ug moataki kanila. ²⁰ Aser, ang imong kaliwatan magkaon ug lamiang pagkaon; magpatagbo sila ug pagkaon nga lami kaayo alang sa mga hari aron kaonon. ²¹ Neftali, ang imong kaliwatan mahisama sa binaw nga gawasnong nagdagan, ang binaw nga adunay matahom nga mga anak. ²² Jose, makabaton kag daghang kaliwatan. Ang ilang mga anak mahisama kadaghan sama sa mga bunga sa paras nga duol sa tuboran ug tubig, nga diin ang ilang mga sanga molugway saylo sa pader. ²³ Ang ilang mga kaaway mapintasong moataki kanila, ug pangtirahon sila ug mga pana ug panggukoron sila. ²⁴ Apan ilang pagagunitan ug hugot ang ilang mga pana ug magpabiling lig-on ang ilang mga kamot, tungod sa gahom sa akong gamhanang Dios, tungod kang Yahweh, nga naggiya ug nagpatagbo alang kanako, sama sa magbalantay ug karnero nga naggiya ug nagpatagbo ug pagkaon alang sa iyang karnero. Ang katawhan sa Israel mohangyo kang Yahweh nga panalipdan sila, sama sa katawhan nga modangop ibabaw sa habog nga bato. ²⁵ Ang Dios nga akong gisimba, magtabang sa imong kaliwatan. Ang Dios magpanalangin kanila pinaagi sa pagpadala ug ulan gikan sa langit ug pinaagi sa paghatag kanilag tubig gikan sa kinahiladman sa yuta. Maghatag siya kaninyog daghang mga anak ug mag-atiman kanila. ²⁶ Dagko nga mga panalangin ang akong gusto nga ihatag sa Dios kanimo. Mas dako sila kaysa sa mga panalangin nga naggikan sa walay kataposang mga bukid, kaysa niadtong naggikan sa matunhayong kabungtoran. Jose, nag-ampo ako nga kining mga panalangin mahatag kanimo, tungod kay ikaw mao ang pangulo sa imong mga igsoon. ²⁷ Benjamin, ang imong mga kaliwatan mahisama ka bangis sa mga lobo. Sa kabuntagon ilang pagapatyon ang ilang mga kaaway sama sa lobo nga motukob sa iyang tukbonon, ug sa kagabhion ilang bahin-bahinon uban sa ilang mga manggugubat ang mga nailog gikan sa ilang mga kaaway." ²⁸ Kadtong dose ka mga anak mao ang katigulangan sa dose ka banay sa Israel. Mao kadto ang giingon sa ilang amahan kanila samtang iya silang gipanalanginan, nga nagsulti alang sa matag-usa kanila. ²⁹ Unya si Jacob miingon sa iyang mga anak, "Hapit na ako mamatay ug motipon sa akong mga katigulangan nga patay na usab. Ilubong ang akong patayng lawas sa dapit kung asa ang akong katigulangan gilubong, sa langob nga anaa sa uma nga gipalit gikan kang Efron, nga nahisakop sa mga Hetihanon. ³⁰ Ang uma sa Macpela sa sidlakan sa Mamre, sa yuta sa Canaan. Gipalit kadto ni Abraham gikan kang Efron aron mahimong lubnganan. ³¹ Diin didto gilubong nila siya ug ang iyang asawa nga si Sara. Diin didto gilubong ang akong amahan nga si Isaac ug ang iyang asawa nga si Rebecca. Ug sa dapit diin usab nako gilubong ang akong asawa nga si Lea. ³² Ang uma ug ang langob niini gipalit gikan sa katawhan sa Het; buot ko nga didto usab ako ninyo ilubong." ³³ Sa nahuman na ug sulti si Jacob sa iyang mga tugon ngadto sa iyang mga anak, mihigda siya pag-usab sa iyang higdaanan. Unya namatay siya.