¹ Migakos si Jose sa iyang amahan mihilak ug mihalok ngadto kaniya. ² Gisugo ni Jose ang iyang mga sulugoon nga maoy nag-andam alang sa paglubong sa patay sa pagbalsamar sa lawas sa iyang amahan. ³ Niabot sa 40 ka adlaw ang pagbalsamar sa lawas ni Jacob, tungod kay mao man kadto ang kadugayon sa panahon nga gikinahanglan nila aron sa pagbalsamar sa lawas. Ang mga katawhan sa Ehipto mihilak sulod sa 70 ka mga adlaw tungod sa kamatayon ni Jacob. ⁴ Sa dihang nahuman na ang panahon sa pagbangotan, miingon si Jose sa mga opisyal sa hari, "Kung nahimuot ka kanako, palihog dad-a kini nga mensahe ngadto sa hari: ⁵ 'Sa hapit na mamatay ang akong amahan, aduna siyay gitugon kanako nga sa kaligdong ako manaad nga ipalubong ko ang iyang patayng lawas didto sa yuta sa Canaan, sa lubnganan nga siya mismo ang nag-andam. Busa tugoti ako sa pag-adto sa Canaan aron nga ilubong ko siya didto. Mobalik ra unya ako.'" ⁶ Pagkahuman nila ug hatag sa mensahe ngadto sa hari, mitubag siya, "Ingna si Jose, 'Subida ug ilubong ang lawas sa imong amahan sumala sa imong gisaad.'" ⁷ Busa si Jose misubida sa Canaan aron sa paglubong sa lawas sa iyang amahan. Ug mikuyog kaniya ang tanang opisyales sa hari, ang tanang mananambag sa Paraon, ug ang tanang katigulangan sa Ehipto. ⁸ Ang gagmay nga mga bata nga sakop sa iyang pamilya ug ang ilang mga karnero, mga kanding ug ang ilang mga baka nagpabilin sa rehiyon sa Gosen. Apan ang tanan sa pamilya ni Jose miuban kaniya lakip ang iyang mga igsoon ug pamilya sa iyang amahan. ⁹ Ang mga tawo nga nagsakay sa mga karwahe ug mga nagkabayo miuban usab. Dako kadto nga pundok. ¹⁰ Miadto sila sa sidlakang bahin sa suba sa Jordan ug nahiabot sa Atad. Adunay dapit didto nga kung diin ang mga tawo naggiok ug mga trigo aron sa paglain sa mga lugas gikan sa uhay. Nagbangotan sila pag-ayo didto alang kang Jacob sa dugay nga panahon. Si Jose naghimo ug mga seremonyas sa pagbangotan alang sa iyang amahan sulod sa pito ka mga adlaw. ¹¹ Sa dihang ang mga pundok sa katawhan sa Canaan nga mipuyo didtong dapita nakakita kanila nga nagbangotan sama niadto, miingon sila, "Mao kining dapita ang masulob-ong pagbangotan sa mga katawhan sa Ehipto!" Busa gipanganlan nila kadtong lugara ug Abel Misraim, nga nagpasabot sa Hebreo nga pinulongan "pagbangotan sa mga Ehiptohanon." ¹² Unya gibuhat sa mga anak ni Jacob ang iyang gisugo kanila. ¹³ Mitabok sila sa suba sa Jordan ug gidala ang lawas ni Jacob sa yuta sa Canaan. Ilang gilubong kini sa langob sa uma didto sa Macpela, sidlakan sa lungsod sa Mamre. Mao kadto ang uma nga napalit ni Abraham gikan kang Efron, nga sakop sa pundok sa katawhan sa Het, aron gamiton ingon nga lubnganan. ¹⁴ Pagkahuman niyag lubong sa iyang amahan, si Jose ug ang iyang mga igsoon ug ang tanan nga mikuyog kaniya sa Canaan mibalik sa Ehipto. ¹⁵ Human namatay si Jacob, nabalaka ang mga igsoon ni Jose. Nakaamgo sila sa posibleng mahitabo. Sila miingon, "Unsay mahitabo kung si Jose adunay pagdumot kanato ug panimaslan kita, tungod sa tanang daotang gibuhat nato kaniya sa dugay na nga mga panahon?" ¹⁶ Busa nagpadala silag usa ka tawo aron suginlan si Jose mahitungod niini alang kanila: "Sa hapit na mamatay ang atong amahan, miingon siya kanamo mahitungod niini: ¹⁷ 'Ingna si Jose, Palihog pasayloa ang imong mga maguwang sa daotan nilang nabuhat kanimo, sa ilang mga sala batok kanimo nga hilabihan kaayo, tungod kay mali kaayo ang ilang nabuhat kanimo.' Busa karon kami nga mga sulugoon sa Dios sa imong amahan, naghangyo kanimo, palihog pasayloa kami sa among nabuhat kanimo." Mihilak si Jose sa dihang nadawat niya ang ilang mensahe. ¹⁸ Unya ang iyang mga magulang nga igsoon miabot ug mihapa ngadto sa yuta sa atubangan ni Jose, ug usa kanila miingon, "Palihog paminaw: mamahimo nimo kaming mga sulugoon." ¹⁹ Apan si Jose mitubag kanila, "Ayaw kamo kahadlok! Ang Dios mao ang magsilot sa katawhan; Dios ba ako? ²⁰ Kay alang kaninyo, oo, nagtinguha kamo sa pagbuhat ug daotan alang kanako. Apan ang Dios nagbuhat ug maayo gikan niadto! Gusto niya nga luwason ang daghang mga tawo gikan sa kamatayon tungod sa kagutom, ug mao gayod kadto ang nahitabo! Karon sila mga buhi! ²¹ Busa isulti ko pag-usab, ayaw kahadlok! Sigurohon ko nga kamo ug ang inyong mga anak adunay paigo nga pagkaon." Pinaagi niana iyang gipasaligan sila ug gihupay ang ilang mga kasingkasing nga magmalinawon. ²² Busa mipuyo si Jose sa Ehipto uban sa pamilya sa iyang amahan hangtod sa nagpanuigon siya ug 110 ka tuig. ²³ Nabuhi siya ug igong kadugayon hangtod nga nakita niya ang mga anak ni Efraim ug iyang mga apo. Natawo usab ang mga anak ni Makir nga anak ni Manases sa wala pa mamatay si Jose, ug sila giila ingon nga iyang mga kaliwatan. ²⁴ Usa ka adlaw niana si Jose miingon sa iyang mga magulang nga igsoon, "Hapit na ako mamatay. Apan sigurado ako nga ang Dios magtabang kaninyo. Moabot ang panahon nga pangulohan ninyo ang inyong mga kaliwatan pagawas niini nga lugar ug dalhon sila sa Canaan, ang yuta nga maligdong niyang gisaad nga ihatag kang Abraham, Isaac ug kang Jacob." ²⁵ Busa si Jose miingon, "Sa dihang ipabuhat na kini sa Dios kaninyo, kinahanglan ninyong dalhon gikan dinhi ang akong lawas paingon didto sa Canaan." Ug gipapanumpa niya ang iyang mga igsoon sa pagbuhat niini. ²⁶ Busa namatay si Jose sa Ehipto sa dihang 110 na ang iyang panuigon. Ang iyang lawas gibalsamar ug gibutang sa lungon didto .