¹ Sa pipila ka mga panahon paghuman niini may usa ka tawo nag-ingon kang Jose, "Nagsakit ang imong amahan." Sa dihang nadunggan niya kadto, iyang gidala ang iyang duha ka mga anak, si Manases ug Efraim, aron makita ang iyang amahan. ² Sa dihang adunay usa ka tawo nga nag-ingon kang Jacob, "Tan-awa, ang imong anak nga si Jose mianhi aron makita ka!" Si Jacob, nga gitawag usab ug Israel, naningkamot nga mibangon ug milingkod sa higdaanan, bisan lisod alang kaniya ang pagbuhat niadto. ³ Miingon siya kang Jose, "Sa dihang atua pa ako sa Luz sa yuta sa Canaan, ang Makakagahom nga Dios nagpakita kanako. Gipanalanginan niya ako ⁴ ug miingon siya kanako, 'Himuon ko ikaw nga amahan sa daghang mga kabataan. Makabaton ka ug daghang mga kaliwatan, ug mamahimo silang mga grupo sa katawhan. Ug ihatag ko kining yutaa sa imong mga kaliwatan aron ilang mapanag-iya hangtod sa hangtod.' ⁵ Ug karon akong ilhon ang imong duha ka mga anak nga lalaki, kansang natawo kanimo dinhi sa Ehipto sa wala pa ako naabot dinhi, mahisakop kanako. Mamahimo na nga si Efraim ug Manases ako nang mga anak, ug maka-panunod sila sa akong mga katigayonan, sama sa akong mga anak nga si Ruben ug Simeon ug ang uban usab. ⁶ Kung mamahimo kang amahan sa uban pang mga kabataan sa umaabot nga kapanahonan, dili sila isipon nga akong mga anak, apan hinuon ingon nga akong mga apo. Makadawat usab sila ug mga bahin sa kung unsa ang ilang mapanunod sa sakop nga yuta sama sa napanunod sa ilang mga igsoon. ⁷ Sa nilabay nga mga katuigan, sa dihang nibalik ako gikan sa Paddan Aram, samtang nagpanaw kami, dili halayo gikan sa lungsod sa Efrata,namatay ang imong inahan nga si Raquel sa yuta sa Canaan. Busa gilubong nako ang iyang lawas didto daplin sa dalan padulong sa Efrata (kansang gitawag karon nga Bethlehem)." ⁸ Sa dihang nakita ni Jacob ang mga anak ni Jose, nangutana siya, "Kinsa man kining mga bataa?" ⁹ Mitubag si Jose sa iyang amahan, "Sila ang mga anak nga gihatag sa Dios kanako dinhi sa Ehipto." Miingon si Jacob, "Paduola sila kanako aron mapanalanginan ko sila." ¹⁰ Hapit na mabuta si Jacob tungod sa iyang katigulangon. Dili na siya halos makakita pag-ayo. Busa gidala ni Jose ang iyang mga anak duol sa iyang amahan, ug gihagkan sila ni Jacob ug gigakos. ¹¹ Miingon si Jacob kang Jose, "Wala ako nagdahom nga makita ko pa ikaw pag-usab, apan tan-awa! Gitugot sa Dios nga makita ko pa ikaw, ug gitugotan pa gani niya ako nga makita usab ang imong mga anak" ¹² Gidala ni Jose ang iyang mga anak sa atubangan ni Jacob. Unya mihapa siya sa yuta. ¹³ Unya gikuha ni Jose ang iyang mga anak, gibutang niya sa iyang tuo nga kilid si Efraim paingon sa wala nga kamot ni Jacob, ug gibutang niya kang Manases sa iyang wala nga kilid paingon sa tuo nga kamot ni Jacob, ug gipaduol pag-ayo kang Jacob. ¹⁴ Apan wala buhata ni Jacob ang gusto ni Jose nga ipabuhat kaniya. Hinuon, gitapion niya ang iyang tuong kamot sa ulo ni Ephraim, bisan tuod siya ang kamanghoran nga anak. Iyang gisaylo ang iyang mga bukton ug gitapion niya ang iyang wala nga kamot sa ulo ni Manases, bisan tuod kamagulangan siya nga anak. ¹⁵ Unya gipanalanginan niya si Jose ug ang iyang mga anak, nga nag-ingon, "Ang akong apohan nga si Abraham ug ang akong amahan nga si Isaac naglakaw uyon sa tinguha sa Dios, ug hangtod niining adlawa ang Dios nag-giya kanako ug nag-atiman kanako ingon nga ang magbalantay nag-giya ug nag-atiman sa iyang mga Karnero. ¹⁶ Kanunayng nagbantay kanako ang anghel nga iyang gipadala gikan sa bisan unsang kakuyaw sa akong dalan. Nag-ampo ako nga ang Dios magpanalangin niining mga bataa. Naga-ampo ako nga ang mga tawo maghunahuna kanako ug sa akong mga katigulangan nga si Abraham ug si Isaac, tungod sa nahimo sa Dios kanila. Naga-ampo ako nga makabaton sila ug daghan nga mga kaliwat nga magapuyo sa tibuok kalibotan." ¹⁷ Sa dihang nakita ni Jose nga gibutang sa iyang amahan ang iyang tuo nga kamot sa ulo ni Ephraim ug dili sa ulo ni Manases, nasubo siya. Busa gikuha niya ang kamot sa iyang amahan gikan sa ulo ni Efraim ug gibalhin sa ulo ni Manases. ¹⁸ Miingon si Jose kaniya, "Amahan ko, dili kana husto! Ang usa nga kansang imong gibutangan sa imong wala nga kamot mao ang akong kamagulangan nga anak. Itapion ang imong tuo nga kamot sa iyang ulo." ¹⁹ Apan mibalibad ang iyang amahan, ug miingon, "Nasayod ako niana, akong anak; Nasayod ako kung unsa ang akong gibuhat. Ang mga kaliwat ni Manases mamahimo usab nga grupo sa mga katawhan, ug mamahimo sila nga mahinungdanon. Apan ang mga kaliwat sa iyang manghod nga igsoon mamahimong labaw sa iyang katungod. Ang iyang mga kaliwatan mamahimong daghan nga mga nasod." ²⁰ Busa iyang gipanalanginan silang duha niadtong adlawa, nga miingon, "Ang mga katawhan sa Israel mogamit sa inyong mga ngalan sa dihang sila magpanalangin sa mga tawo. Sila maga-ingon, 'Mag-ampo kami nga ang Dios magatabang kaninyo ingon sa iyang pagtabang kang Efraim ug Manases."' Sa ingon-niana nga pamaagi, gisulti ni Jacob nga si Efraim mamahimong pinaka-mahinungdanon kaysa kang Manases. ²¹ Unya miingon si Jacob kang Jose, "Hapit na ako mamatay. Apan nasayod ako nga ang Dios motabang kanimo. Moabot ang panahon nga iyang kuhaon ang imong mga kaliwatan balik ngadto sa yuta sa ilang mga katigulangan. ²² Alang kini kanimo, ug dili ngadto sa imong mga igsoon, nga akong ihatag ang tabunok nga bungtod sa dapit sa Shechem. Nailog ko kana nga yuta gikan sa mga grupo sa Amorihanon, nakig-away ako kanila pinaagi sa akong espada ug sa akong mga pana."