¹ - ² Nagpili si Jose ug lima sa iyang mga igsoon nga mokuyog kaniya aron sa pagpakig-istorya sa hari. Gipaila-ila niya sila ngadto sa hari, ug unya miingon siya, "Mianhi ang akong amahan ug ang akong mga igsoon gikan sa yuta sa Canaan. Gidala nila ang ilang tanan nga mga karnero, mga kanding, mga baka, ug tanang mga kabtangan nga ilang gipanag-iyahan, ug sa pagkakaron nagpuyo sila sa rehiyon sa Goshen." ³ Nangutana ang hari sa mga managsoon, "Unsa man ang inyong mga trabaho?" Mitubag sila sa hari, "Magbalantay kami sa mga karnero sama sa among mga katigulangan." ⁴ Miingon usab sila kaniya, "Mianhi kami dinhi aron mopuyo sa makadiyot niining yutaa, tungod kay hilabihan na man ang kagutom didto sa Canaan, ug wala nay masibsiban ang among mga kahayopan didto. Busa, tugoti kami nga makapuyo sa rehiyon sa Goshen." ⁵ Miingon ang hari kang Jose, "Mianhi ang imong amahan ug mga igsoon kanimo. ⁶ Makapuyo sila bisan asa nimu gusto sa tibuok Ehipto. Hatagi ang imong amahan ug ang imong mga igsoon sa pinakamaayong bahin sa yuta. Makapuyo sila sa Goshen. Ug si bisan kinsa kanila nga imong nahibaloan nga adunay pinasahi nga abilidad aron sa pag-atiman sa mga kahayopan, tugoti usab sila nga magdumala sa akong mga kahayopan." ⁷ Unya gidala ni Jose ang iyang amahan ngadto sa palasyo ug gipaila-ila niya sa hari. Naghangyo si Jacob sa Dios nga panalanginan ang hari. ⁸ Unya nangutana ang Paraon kang Jacob, "Pila na man ang imong edad?" ⁹ Mitubag si Jacob, "130 na ang akong pangidaron. Wala ako nabuhi susama sa pangidaron sa akong mga katigulangan, apan ang akong kinabuhi puno sa kalisdanan." ¹⁰ Unya naghangyo pag-usab si Jacob sa Dios nga panalanginan ang hari ug mibiya. ¹¹ Mao kana ang pagtabang ni Jose sa iyang amahan ug sa iyang mga igsoon aron makapuyo sila sa Ehipto. Sumala sa gimando sa hari, gihatag niJose kanila ang pinakamaayong bahin sa yuta, sa Goshen, diin gitawag na karon nga Rameses. ¹² Gipahinagbo usab ni Jose ang pagkaon alang sa tibuok panimalay sa iyang amahan. Gihatagan niya sila sa panginahanglanon sumala sa gidaghanon sa mga kabataan nga anaa kanila. ¹³ Walay mitubo nga tanom sa tibuok nasod tungod sa hilabihang kainit. Nangaluya ang mga tawo sa Ehipto ug sa Canaan tungod kay wala na silay paigo nga pagkaon. ¹⁴ Nadawat ni Jose ang tanang kwarta sa mga tawo sa Ehipto ug sa Canaan nga gibayad alang sa trigo nga iyang gibaligya ug gidala niya kini sa palasyo sa hari. ¹⁵ Sa dihang nagasto na sa mga tawo sa Ehipto ug Canaan ang tanan nilang kwarta alang sa trigo, kanunay sila nga moadto kang Jose ug moingon, "Palihog hatagi kami ug diyutay'ng pagkaon! Kung dili mo kami hatagaan ug trigo, mangamatay kami! Nahurot na ang tanan namong salapi sa pagpalit ug pagkaon, ug wala nay nahabilin nga salapi kanamo!" ¹⁶ Mitubag si Jose, "Sanglit nahurot na ang tanan ninyong salapi, dal-a ang inyong mga kahayopan dinhi kanako. Kung inyo kanang himuon, akong ibaligya ang pagkaon kambyo sa inyong mga kahayopan." ¹⁷ Busa gidala nila ang ilang mga kahayopan ngadto kang Jose. Gihatagan niya sila ug pagkaon isip baylo sa ilang mga kabayo, mga karnero, mga kanding, mga baka, ug ilang mga asno. ¹⁸ Human niadtong tuiga, sa pagkasunod tuig mibalik sila kaniya ug miingon, "Dili namo matago kanimo: Nahurot na gayud ang among kwarta, ug karon ang tanan namong mga kahayopan anaa na kanimo. Among lawas ug among kayutaan na lamang ang among mahatag kanimo. Wala na gayoy nahabilin kanamo. ¹⁹ Kung dili mo kami hatagan ug pipila ka pagkaon, mangamatay kami! Kung dili mo kami hatagan ug mga binhi, ang among mga uma mamahimong walay bili. Palita kami ug ang among mga kayutaan isip baylo sa pagkaon. Unya mamahimo na kaming ulipon sa hari, ug siya na usab ang manag-iya sa among kayutaan. Hatagi kami ug mga binhi aron makatanom kami, aron sa ingon dili kami mangamatay, ug sa ingon ang among yuta dili mamahimong sama sa disyerto." ²⁰ Busa gipalit ni Jose ang tanang kaumahan sa Ehipto alang sa hari. Gibaligya sa mga tawo sa Ehipto ang ilang kayutaan ngadto kang Jose tungod kay hilabihan na kaayo ang kagutom ug wala na silay laing pamaagi aron makapalit ug pagkaon. Busa ang tanang kaumahan naangkon sa hari. ²¹ Ang resulta, nahimo ni Jose nga naulipon sa Paraon ang tanang tawo nga gikan sa utlanan sa nasod ngadto sa ubang nasod. ²² Apan wala niya gipalit ang yuta sa pari, tungod kay nagadawat sila kanunay ug pagkaon nga gikan sa hari. Mao kana ang hinungdan nganong wala nila gibaligya ang ilang yuta ngadto kaniya. ²³ Miingon si Jose sa mga tawo, "Paminaw kanako! Karon gipalit ko na kamo lakip ang inyong mga yuta alang sa hari. Busa ania ang mga binhi alang kaninyo aron inyo kining itanom sa yuta. ²⁴ Apan sa dihang mag-ani na kamo sa inyong tanom, kinahanglan ihatag ninyo ang ika-limang bahin sa ani ngadto sa hari. Ang nahibilin sa inyong ani mamahimo ninyong tipigan aron mahimong binhi nga igatanom sa uma ug aron mamahimo ninyong pagkaon ug sa inyong mga kabataan ug alang sa pagkaon sa matag-usa nga anaa sa inyong panimalay." ²⁵ Mitubag sila, "Giluwas nimo ang among kinabuhi! Gusto kami nga makapahimuot kanimo. Ug mamahimo na kaming ulipon sa hari." ²⁶ Busa naghimo ug balaod si Jose mahitungod sa tibuok yuta sa Ehipto, nga naga-ingon nga ang ika-limang bahin sa tanom nga ilang maani mapanag-iya sa hari. Kadto nga balaod nagpabilin pa sagihapon. Ang yuta lamang sa mga pari ang wala napanag-iyahan sa hari. ²⁷ Si Jacob ug ang iyang pamilya nagsugod sa pagpuyo sa Ehipto, sa rehiyon sa Goshen. Nakaangkon sila ug katigayonan didto. Daghang mga kabataan ang nahimugso kanila didto. Mao nga, ang ilang kaliwatan midaghan pag-ayo. ²⁸ Nagpuyo si Jacob sa Ehipto sulod sa 17 ka mga katuig. Sa kinatibuk-an nabuhi siya sulod sa 147 ka mga katuigan. ²⁹ Sa dihang hapit na siya mamatay, iyang gipatawag ang iyang anak nga si Jose ug miingon kaniya, "Kung nakapahimuot ako kanimo, ibutang ang imong mga kamot taliwala sa akong mga paa aron sa pagpakigsaad nga ikaw magmatinud-anon kanako ingon nga imong amahan ug buhata kung unsa ang akong isalig kanimo nga imong pagahimuon: Sa dihang mamatayna ako, ayaw ako ilubong dinhi sa Ehipto. ³⁰ Hinuon, kung ako mamatay ug makig-uban na sa akong mga katigulangan kansang nangamatay na kaniadto, dalha ang akong lawas gawas sa Ehipto, ug ilubong kini sa Canaan kung diin atua usab gilubong ang akong mga katigulangan." Mitubag si Jose, "Akong tumanon ang imong giingon." ³¹ Mitubag si Jacob, "Saari ako nga imo kining himuon!" Busa misaad si Jose nga himuon niya kini. Unya milingkod sa higdaan si Jacob, miduko, ug misimba sa Dios.