¹ Busa mibiya si Jacob, dala niya ang iyang tibuok pamilya ug mga kabtangan. Sa dihang miabot sila sa Berseba, naghalad siya sa Dios nga gisimba sa iyang amahan nga si Isaac. ² Niadtong gabhiona, ang Dios nagtawag kang Jacob pinaagi sa usa ka panan-awon, nga nag-ingon, "Jacob, Jacob!" Mitubag siya, "Ania Ako!" ³ Ang Dios miingon "Ako ang Dios" nga gisimba sa imong amahan nga si Isaac. Ayaw kahadlok pag-adto sa Ehipto, tungod kay hatagan ko ikaw ug daghan nga mga kaliwat, ug mamahimo silang dakong nasod didto. ⁴ Mag-uban ako kanimo sa Ehipto, ug pagkahuman dad-on ko pagbalik sa Canaan ang imong mga kaliwat. Ug kauban nimo si Jose sa panahon nga ikaw mamatay." ⁵ Busa mibiya si Jacob sa Berseba, ug gidala sa iyang mga anak ang ilang amahan, ilang mga asawa, ug ang ilang mga kabataan, sakay sa karwahi nga gipadala sa hari alang sa ilang biyahe. ⁶ Niini nga paagi, si Jacob ug ang tibuok niyang pamilya miadto sa Ehipto. Gidala nila ang ilang mga kahayopan ug ang tanan nilang mga kabtangan nga ilang napanag-iya sa Canaan. ⁷ Miadto si Jacob sa Ehipto uban sa iyang mga anak nga lalaki, iyang mga anak nga babaye, mga apo nga lalaki, ug mga apo nga babaye---iyang kinatibuk-an nga pamilya. ⁸ Mao kini ang listahan sa mga ngalan sa miyembro sa pamilya ni Jacob nga miadto uban niya paingon sa Ehipto; Si Ruben, ang kamagulangan nga anak ni Jacob; ⁹ mga anak nga lalaki ni Ruben nga sila Hanoc, Palu, Hesron, ug Carmi; ¹⁰ si Simeon ug ang iyang mga anak nga lalaki nga sila Jemuel, Jamin, Ohad, Jakin, Zohar, ug Saul, nga mga anak sa babaye nga gikan sa pundok nga mga taga-Canaan; ¹¹ Si Levi ug iyang mga anak nga lalaki nga sila Gerson, Kohat, ug Merari; ¹² Si Juda ug iyang mga anak nga lalaki nga sila Sela, Peres; ug Sera (ang uban niyang mga anak nga lalaki, nga si Er, ug si Onan, namatay na sa yuta sa Canaan); ang duha ka anak nga lalaki ni Peres; sila Hesron ug Hamol; ¹³ si Isacar ug iyang mga anak nga lalaki nga sila Tola, Pua, Jasub, ug Simron; ¹⁴ si Zabulon ug iyang mga anak nga lalaki nga sila Sered, Elon, ug Jalel. ¹⁵ Mao kini ang mga anak ni Jacob ug Lea, nga natawo sa Paddan Aram, nga dugang pa kang Dina nga iyang anak nga babaye. Tanan-tanan, adunay 33 ka mga anak nga lalaki ug babaye si Jacob. ¹⁶ Si Gad ug iyang mga anak nga lalaki nga sila Sipion, Hagi, Suni, Esbon, Eri, Arodi ug Areli; ¹⁷ Aser ug iyang mga anak nga lalake nga sila Imna; Isba, Isbi, ug Beria; ug ilang igsoon nga babaye nga si Sera; mga anak nga lalaki ni Beria; sila Heber ug Malkiel; ¹⁸ (Mao kadto ang mga anak ug mga apo ni Jacob ug Zilpa, ang ulipong babaye nga gihatag ni Laban sa iyang anak nga si Lea. Silang tanan 16 ka mga tawo. ¹⁹ Si Jose ug si Benjamin nga mga anak sa asawa ni Jacob nga si Raquel. ²⁰ (Ephraim ug Manases mao ang duha ka mga anak ni Jose. Wala sila modulhog paingon sa Ehipto tungod kay sa Ehipto man sila gipaka-tawo. Mga anak sila ni Asenat, ang anak nga babaye ni Potifera, nga usa ka pari sa templo sa siyudad sa On.) ²¹ ug iyang mga anak nga lalaki nga sila Bela, Beker, Asbel, Gera, Naaman, Ehi, Ros, Mupim, Hupim ug si Ard; ²² (Mao kini ang mga anak nga lalaki ug mga apo nga lalaki ni Raquel ug ni Jacob. Katorse silang tanan ka mga tawo. ²³ Si Dan ug ang iyang anak nga si Husim; ²⁴ Si Neftali ug ang iyang mga anak nga lalaki nga sila Jasel, Guni, Jeser, ug Silem. ²⁵ (Mao kini ang mga anak ug mga apo nga lalaki ni Jacob ug ni Bilha, ang ulipon nga babaye nga gihatag ni Laban sa iyang anak nga si Raquel. Pito silang tanan ka mga tawo. ²⁶ Adunay 66 ka mga kaliwat ni Jacob nga mikuyog kaniya paingon sa Ehipto. Kadto nga ihap wala maglakip sa mga asawa sa iyang mga anak. ²⁷ Apil si Jacob ug si Jose ug ang duha ka mga anak ni Jose nga natawo sa Ehipto, adunay 70 ka mga miyembro sa pamilya ni Jacob sa dihang didto na silang tanan sa Ehipto. ²⁸ Unya gipalakaw ni Jacob si Juda pag-una kanila ngadto sa Ehipto aron makig-istorya kang Jose ug mangutana mahitungod sa dalan paingon sa Gosen. Unya mibalik si Juda ngadto sa iyang mga pamilya ug mibiyahi sila paingon sa dapit sa Gosen. Sa miabot na sila didto, ²⁹ Giandam ni Jose ang iyang karwahi ug miadto sa Gosen aron sa pagsugat sa iyang amahan. Sa pag-abot ni Jose, gigakos niya ang iyang amahan unya mihilak siya pag-ayo. ³⁰ Miingon si Jacob kang Jose, "Nakita ko na ikaw, ug nasayran nga buhi ka gayod! Busa andam na akong mamatay." ³¹ Unya miingon si Jose sa iyang mga igsoon ug sa tanan nga pamilya sa iyang amahan, "Moadto ako sa hari ug ingnon ko siya, 'Ang akong mga igsoon ug ang akong amahan ug ang tanan niyang pamilya, nga nagpuyo sa yuta sa Canaan, mianhi kanako. ³² Ang tanang kalalakin-an mga magbalantay. Nag-atiman sila sa ilang mga kahayopan, ug ilang gidala uban kanila ang ilang mga karnero, mga kanding, ug mga baka, ug uban pa nga ilang gipanag-iya. ³³ Kung ipatawag kamo sa hari ug mangutana, "Unsa man ang inyong mga trabaho? ³⁴ Tubaga siya sa pag-ingon, 'Gikan pa sa among pagkabatan-on, magbalantay na kami sa mga hayop, sama sa gibuhat sa among mga katigulangan.' Kung ingnon ninyo siya niana, tugotan niya kamo nga mopuyo sa dapit sa Gosen." Giingnan sila ni Jose nga isulti kadto tungod kay ginatamay sa mga Ehiptohanon ang mga magbalantay sa kahayopan.