¹ Wala na gayod napugngan ni Jose ang iyang gibati. Dili siya gusto nga mohilak atubangan sa iyang mga sulugoon, busa miingon siya kanila sa makusog, "Gawas kamong tanan!" Human sila makagawas, walay mga Ehiptohanon nga nagpabilin uban kang Jose sa dihang nagpaila siya sa iyang kaugalingon ngadto sa iyang mga igsoon. ² Mihilak siya sa makusog nga bisan ang mga tawo nga anaa sa gawas nakadungog niini, ug bisan ang mga tawo nga anaa sa palasyo sa Paraon nakadungog usab niini. ³ Miingon si Jose sa iyang mga igsoon, "Ako si Jose! Buhi pa ba ang atong amahan?" Apan wala makatubag ang iyang mga igsoon, tungod kay nangahadlok sila mahitungod sa iyang giingon. ⁴ Miingon si Jose sa iyang mga igsoon, "Duol kamo kanako!" Sa dihang miduol sila kaniya, miingon siya, "Ako si Jose nga inyong igsoon! Ako kadtong inyong gibaligya sa mga negosyanti nga nagdala kanako dinhi sa Ehipto. ⁵ Apan karon, ayaw kamo kasubo, ug ayaw kasuko sa inyong mga kaugalingon tungod sa pagbaligya ninyo kanako ingon nga ulipon. Ang Dios mao ang nagpadala kanako dinhi una kaninyo aron pagluwas kaninyo gikan sa kamatayon tungod sa kagutom. ⁶ Aduna nay kagutom niini nga nasod sa duha ka tuig, ug magpadayon pa kini sa dugang pa nga lima ka mga katuigan. Niining panahona, walay makadaro sa yuta, ug walay abot nga maani. ⁷ Gipadala ako sa Dios dinhi una kaninyo aron dili kamo magutman, ug sa pag-siguro nga ang inyong mga kaliwatan makalahutay. ⁸ Busa, dili kamo ang nagpadala kanako dinhi; ang Dios mao ang nagpadala kanako dinhi! Gihimo niya ako ingon nga amahan sa hari. Ako ang tinugyanan sa tanan nga anaa sa iyang palasyo ug ang gobernador sa tibuok Ehipto. ⁹ Karon balik dayon ngadto sa akong amahan ug ingna siya, 'Mao kini ang giingon sa imong anak nga si Jose: "Gihimo ako sa Dios nga gobernador sa tibuok yuta sa Ehipto. Anhi kanako sa walay paglangan! ¹⁰ Makapuyo ikaw sa rehiyon sa Gosen. Ikaw ug ang imong mga anak ug ang imong mga apo, imong mga karnero, mga kanding ug mga baka, ug ang tanan nga imong gipanag-iya, mapaduol kanako. ¹¹ Sanglit aduna pay lima ka mga tuig sa kagutom, akong sigurohon nga aduna kamoy pagkaon. Kung dili ka moanhi dinhi, ikaw ug ang imong pamilya lakip ang tanan nimong mga sulugoon mag-antos sa kagutom.'" ¹² Kung kamo- ug si Benjamin usab- motutok pag-ayo kanako, makita ninyong tanan nga ako gayod kini si Jose nga nakig-sulti kaninyo. ¹³ Lakaw ug suginli ninyo ang akong amahan mahitungod sa akong pagka-tinahod dinhi sa Ehipto. Suginli siya sa tanan nga inyong nakita. Dad-a ang akong amahan dinhi sa walay paglangan!" ¹⁴ Unya gigakos ni Jose ang iyang manghod nga si Benjamin ug mihilak. Migakos usab si Benjamin kaniya ug mihilak. ¹⁵ Unya gihalokan ni Jose ang iyang mga magulang sa ilang mga aping, ug mihilak siya. Human niana, ang iyang mga igsoon nakipagsultihanay uban kaniya. ¹⁶ Adunay usa ka tawo nga miadto sa palasyo ug gisugilon niini ang balita mahitungod sa pag-abot sa mga igsoon ni Jose. Nahimuot niini ang hari ug ang tanan niyang mga opisyal. ¹⁷ Ang hari miingon kang Jose, "Isulti kini sa imong mga igsoon: 'Kargahi ug trigo ang inyong mga hayop ug balik sa yuta sa Canaan. ¹⁸ Unya dad-a ang inyong amahan ug ang inyong mga pamilya balik dinhi. Ihatag ko kaninyo ang pinaka-maayong yuta sa Ehipto, ug kamo makakaon sa pinakalamian nga pagkaon sa tibuok yuta. ¹⁹ Sultihi usab ang imong mga igsoon niini: 'Pagkuha ug pipila ka mga karwahi gikan sa Ehipto aron kasakyan sa inyong mga kabataan ug sa inyong mga asawa, kuhaa sila ug ang inyong amahan unya balik dinhi sa walay paglangan. ²⁰ Ayaw kamo kabalaka mahitungod sa pagdala sa inyong mga kabtangan, tungod kay ang pinaka-maayong mga butang sa Ehipto mainyoha na man. Tungod niana, dili na kinahanglan nga magdala pa kamo ug mga butang gikan sa Canaan."' ²¹ Gibuhat sa mga anak ni Jacob ang gimando sa hari. Gihatagan sila ni Jose ug mga karwahi ug mga pagkaon nga ilang kan-on sa ilang panaw, sumala sa gisugo sa hari. ²² Ang matag-usa kanila gihatagan niya ug bag-o nga bisti, apan gihatagan niya ug 300 ka plata si Benjamin ug lima ka parisan nga bag-ong mga bisti! ²³ Mao kini ang iyang gipadala sa iyang amahan: Napulo ka mga laki nga asno, nga gikargahan sa pinakamaayong mga butang gikan sa Ehipto, ug napulo ka mga baye nga asno nga puno sa trigo, tinapay, ug uban pa nga mga pagkaon alang sa pagbiyahe sa iyang amahan paingon sa Ehipto. ²⁴ Unya gipalakaw niya ang iyang mga igsoon, ug miingon kanila "Ayaw kamo pag-away sa dalan!". ²⁵ Busa ang mga managsuon mibiya sa Ehipto ug miadto sa ilang amahan nga si Jacob sa yuta sa Canaan. ²⁶ Usa kanila miingon kaniya, "Buhi pa si Jose! Sa pagkatinuod, gobernador na siya sa tibuok Ehipto!" Nahibulong pag-ayo si Jacob; dili siya makatuo nga tinuod kini. ²⁷ Apan gisugilon nila kaniya ang tanan nga gisulti ni Jose kanila, ug nakita ni Jacob ang mga karwahi nga gipadala ni Jose aron magdala kaniya sa iyang pamilya ug sa tanan niyang mga kabtangan ngadto sa Ehipto. Unya naundang ang kahibulong ni Jacob. ²⁸ Miingon siya, "Ang inyong gisulti igo na aron motuo ako! Buhi pa gayod diay ang akong anak nga si Jose, moadto ako aron makita ko siya sa dili pa ako mamatay!"