¹ Ningsamot pa gayod ang kagutom sa yuta sa Canaan. ² Sa kataposan, sa dihang nahurot na ni Jacob ug sa iyang pamilya pagkaon ang tanang trigo nga ilang nadala gikan sa Ehipto, miingon si Jacob ngadto kanila, "Balik sa Ehipto ug pagpalit ug dugang trigo alang kanato!" ³ Apan miingon si Juda kaniya, "Ang tawo nga nagbaligya kanamo sa trigo nagbahad kanamo sa walay tiaw-tiaw, 'Dili ko kamo tugotan nga makakita kanako pag-usab kung moanhi kamo ug dili ninyo kauban ang inyong kinamanghorang igsoon.' ⁴ Busa kung imong ipadala uban kanamo ang among kinamanghorang igsoon, molugsong kami paingon sa Ehipto ug mopalit ug trigo alang kanimo. ⁵ Apan kung dili nimo siya ipadala, dili kami molugsong didto, tungod kay ang tawo nag-ingon man kanamo, 'Dili ko kamo tugotan nga makakita kanako pag-usab kung dili ninyo kauban ang inyong kinamanghorang igsoon."' ⁶ Nangutana si Jacob, "Nganong inyo mang giingnan ang tawo nga aduna pa kamoy kinamanghorang igsoon hinungdan ning akong kahasol?" ⁷ Ang usa kanila mitubag, "Ang tawo nangutana mahitungod kanamo ug sa atong pamilya. Miingon siya, 'Buhi pa ba ang inyong amahan? Aduna pa ba kamoy laing igsoong lalaki?' Gikinahanglan namong tubagon ang iyang mga pangutana. Wala kami masayod nga moingon siya, "Sa sunod nga mobalik kamo dinhi, dad-a ninyo ang inyong igsoon!'" ⁸ Unya miingon si Juda sa iyang amahan nga si Jacob, "Ipadala uban kanako ang bata, ug molakaw na dayon kami sa walay paglangan, aron nga kami ug ikaw ug ang among mga anak makakuha ug trigo ug dili mangamatay gumikan sa kagutom. ⁹ Magpasalig ako nga makabalik siya ug makapaningil ka kanako sa unsa man nga akong ginasaad. Kung dili ko siya madala balik nganha kanimo nga luwas, makaingon ka nga ako ang mabasol hangtod sa kahangtoran. ¹⁰ Kung wala nato giusikan ang daghang mga panahon, nakaabot na unta kami karon didto ug nakabalik na sa ikaduhang higayon!" ¹¹ Unya ang ilang amahan nga si Jacob miingon kanila, "Kung wala nay laing pamaagi, himoa kini: Ibutang sa inyong mga sako ang pinakamaayong mga tanom niining yutaa, ug dad-a kini palugsong ngadto sa tawo ingon nga gasa. Pagdala ug diyutay nga lana ug dugos, mga lamas ug mira, diyutay nga pistasio nga mani, ug almendras nga mani. ¹² Pagdala usab ug doble nga kwarta kaysa gidala ninyo niadtong unang higayon, tungod kay gikinahanglan ninyong ibalik ang plata nga gibutang sa usa ka tawo sa sulod sa inyong mga sako. Tingali sayop lamang nga nabutang kini sa inyong mga sako. ¹³ Dad-a ninyo ang inyong kinamanghorang igsoon ug balik didto sa tawo. ¹⁴ Mag-ampo ako sa Dios nga Makagagahom nga kaluy-an kamo niadtong tawhana, aron tugotan niya ang usa pa ninyo ka igsoon, ingon man si Benjamin, nga makabalik dinhi uban kaninyo. Apan alang kanako, kung kuhaon gikan kanako ang akong mga anak, wala na gayod akoy mga anak!" ¹⁵ Unya gikuha sa iyang mga anak ang mga gasa nga giingon ni Jacob nga ilang pagadad-on, ug gidoble ang kantitad sa salapi kung unsa ang kantidad sa trigo. Gidala usab nila si Benjamin ug sa walay paglangan milugsong sila paingon sa Ehipto, ug mitindog sila sa atubangan ni Jose. ¹⁶ Sa dihang nakita ni Jose si Benjamin uban kanila, miingon siya sa tigdumala sa iyang balay, "Dad-a kining mga tawhana sa akong balay. Pag-ihaw ug hayop ug pag-andam ug pagkaon, tungod kay gusto nako nga mokaon sila uban kanako sa paniudto." Giingnan niya ang iyang sulugoon kung unsang han-ay sila manglingkod. ¹⁷ Gibuhat sa sulugoon ang gisulti ni Jose; gidala niya sila sa balay ni Jose. ¹⁸ Apan nangahadlok sila tungod kay gidala niya sila sa balay ni Jose. Nagtuo sila nga, "Gidala kita niya dinhi tungod sa plata nga nabutang sa atong mga sako sa unang higayon nga kita mianhi dinhi. Samtang kita mangaon ang iyang mga sulugoon moataki kanato, dakpon kita aron mahimong iyang mga ulipon, ug kuhaon usab ang atong mga asno." ¹⁹ Miuban sila sa tawo nga tigdumala sa balay ni Jose. Sa dihang nahiabot sila sa ganghaan sa balay, ²⁰ ang usa kanila miingon kaniya, "Palihog, sir, paminawa ako. Milugsong kami dinhi niadtong niaging higayon aron pagpalit ug diyutay nga trigo. ²¹ Apan samtang kami namauli sa among panimalay ug mihunong sa usa ka dapit aron magpalabay sa kagabhion, giablihan namo ang among mga sako. Nahibulong kami sa among pagkakita nganong ang kwarta sa ensaktong kantidad sa matag usa kanamo anaa sa sulod sa among mga sako nga mao man unta kini ang among gibayad alang sa trigo! Busa gidala namo kini pagbalik. ²² Nagdala usab kami ug dugang kwarta aron pagpalit ug dugang pagkaon. Wala kami masayod kung kinsa ang nagbutang sa kwarta sa among mga sako." ²³ Mitubag ang tawo, "Kalma lang! Ayaw kamo kabalaka mahitungod niini! Akong nadawat ang salapi nga inyong gidala. Ang inyong Dios, ang Dios nga gisimba sa inyong amahan mao ang nagbutang niini sa inyong mga sako." Unya gidala niya si Simeon ngadto kanila gikan sa bilanggoan. ²⁴ Unya gidala niya sila didto sa balay ni Jose. Gihatagan niya sila ug tubig aron ihugas sa ilang mga tiil ug pagkaon alang sa ilang mga asno. ²⁵ Giingnan niya sila nga modungan ug kaon kang Jose sa paniudto. Busa ilang giandam ang ilang mga gasa alang kang Jose sa iyang pag-abot. ²⁶ Sa dihang nakauli na si Jose sa iyang panimalay, gihatag nila kaniya ang mga gasa nga ilang gidala didto sa balay. Unya miyukbo sila diha sa iyang atubangan. ²⁷ Nangutana siya kanila kung maayo ba ang ilang kahimtang, ug unya nangutana siya pag-usab, "Kumusta man ang panglawas sa inyong tigulang na nga amahan, kadtong inyong gisugilon kanako? Buhi pa ba siya?" ²⁸ Ang usa kanila mitubag, "Oo, ang imong sulugoon nga among amahan buhi pa ug maayo ang iyang kahimtang." Unya miyukbo sila pag-usab diha sa iyang atubangan. ²⁹ Unya iyang nakita ang iyang manghod nga si Benjamin, ang usa pa ka anak sa iyang kaugalingong inahan. Nangutana siya kanila, "Mao ba kini ang inyong kinamanghorang igsoon, kadtong inyong gisugilon kanako?" Human sila nag-ingon ug "Oo," miingon siya kang Benjamin, "Batan-on, mag-ampo ako nga ang Dios maluoy kanimo." ³⁰ Mibiya dayon si Jose sa maong lawak. Iyang nabati nga kahilakon na siya tungod sa tumang kaluoy sa iyang kinamanghorang igsoon. Miadto siya sa iyang kaugalingong lawak ug mihilak didto. ³¹ Unya pagkahuman, gihilam-osan niya ang mga luha sa iyang nawong, migawas siya, ug gipugngan ang iyang gibati, miingon siya sa mga sulugoon, "Idalit ang pagkaon!" ³² Karon ang mga Ehiptohanon nagtuo nga makauulaw kanila nga mokaon kauban ang mga Hebreo, busa ang mga sulugoon nagdalit sa pagkaon alang lamang kang Jose, ug nagdalit sa ubang mga Ehiptohanon alang lamang kanila nga mikaon uban kaniya, ug ilang gidalitan ang mga magulang nga igsoon ni Jose ug ang iyang manghod nga alang lamang kanila. ³³ Nahibulong ang iyang mga igsoong lalaki nga gihan-ay ang ilang mga gilingkuran sumala sa ilang mga edad, gikan sa kinamanghoran hangtod sa kinamagulangan! ³⁴ Sa dihang gidalit na ang pagkaon alang kanila gikan sa lamesa ni Jose, ang bahin ni Benjamin adunay lima kapiloan ang kadaghan kaysa sa bahin sa uban! Unya nangaon sila ug miinom ug bino uban kang Jose ug nagmalipayon sila pag-ayo.