¹ Pagkahuman sa duha ka mga tuig, nagdamgo ang hari sa Ehipto. Sa iyang damgo, nagtindog siya daplin sa sapa sa Nilo. ² Sa kalit lang mitungha ang pito ka mga baka nga tambok. Misabsab sila sa kasagbotan nga anaa daplin sa sapa. ³ Unya adunay lain pang pito ka mga baka nga mga masakiton ug niwang, ang misunod kanila sa pagtungha gikan sa sapa sa Nilo. Nagtindog sila tapad sa tambok nga mga baka nga anaa daplin sa sapa. ⁴ Unya gikaon sa mga masakiton ug niwang nga mga baka ang mga himsog ug tambok nga mga baka, unya nakamata ang hari. ⁵ Mibalik siya sa pagtulog ug nagdamgo na usab siya. Niining taknaa nakita niya ang pito ka mga trigo nga bus-ok ang lusok ug timgas ang lugas, ug ang tanan mitubo sa usa lang ka punoan. ⁶ Pagkahuman niana, nakita sa hari nga adunay lain pang pito ka mga trigo ang mitubo niadtong punoan. Mga niwang kini ug nalawos tungod sa init nga hangin sa sidlakan. ⁷ Unya gilamoy sa pito ka niwang nga mga trigo ang pito ka timgas ug bus-ok nga mga trigo, unya nakamata pag-usab ang hari. Nasayran niya nga nagdamgo lang siya. ⁸ Apan sa pagkabuntag nabalaka siya mahitungod sa kahulogan sa iyang damgo. Busa gipatawag niya ang tanang mga salamangkero ug ang mga maalamong tawo nga nagpuyo sa Ehipto. Gisuginlan niya sila sa iyang damgo, apan wala gayoy makahubad kanila sa duha niya ka mga damgo. ⁹ Unya ang pangulo sa tigtagay ug bino miingon sa hari, "Aduna akoy nahinumdoman nga angay kong isulti kanimo! Nasayop ako tungod kay nakalimot ako sa pagsulti niini kanimo. ¹⁰ May usa ka higayon nga ikaw nasuko kanamong duha. Busa gipapriso mo ako ug ang pangulo sa tigbuhat ug tinapay sa balay sa kapitan sa palasyo sa mga guwardiya. ¹¹ Samtang atua kami didto, usa ka gabii niana ang matag-usa kanamo nagdamgo, ug ang mga damgo adunay managlahi nga kahulogan. ¹² Adunay batan-ong Hebrohanon nga kauban namo didto. Usa siya ka sulugoon sa kapitan sa palasyo sa mga guwardiya. Gisugilon namo kaniya kung unsa among nadamgohan, ug gisaysay niya sa matag-usa kanamo ang kahulogan sa among mga damgo. ¹³ Pagkahuman nahitabo gayod kadto nga insakto sama sa paghubad niya sa among mga damgo: Miingon ka nga mahibalik ako pag-usab sa akong trabaho, apan ang laing tawo gipatay pinaagi sa pagbitay." ¹⁴ Sa pagkadungog niana sa hari, giingnan niya ang pipila sa iyang mga ulipon nga dad-on si Jose ngadto kaniya, ug dali-dali nilang gipagawas si Jose sa prisohan. Namalbas si Jose ug misul-ob sa pinaka-maayo nga bisti, ug unya miadto siya ug mitindog atubangan sa hari. ¹⁵ Miingon ang hari kang Jose, "Aduna akoy duha ka mga damgo, ug wala gayoy makasugilon kanako kung unsa ang kahulogan niini. Apan adunay nagsulti kanako nga sa dihang madungog mo ang tawo nga magsulti sa iyang gidamgo, makahimo ka sa pagsaysay kaniya kung unsa ang kahulogan sa iyang damgo." ¹⁶ Apan mitubag si Jose sa hari, "Dili, dili ako makahimo niana. Ang Dios lang ang nasayod sa kahulogan sa mga damgo, apan makasaysay ako sa kahulogan niini pinaagi sa iyang lamdag ug ang buot ipasabot niini maayo." ¹⁷ Miingon ang hari kang Jose, "Sa nahauna kong damgo nagtindog ako daplin sa sapa sa Nilo. ¹⁸ Sa kalit lang mitungha gikan sa sapa ang pito ka mga himsog ug tambok nga mga baka ug misibsib sila sa kasagbotan nga anaa daplin sa sapa. ¹⁹ Sa wala madugay adunay lain pang pito ka mga baka, ang misunod pagtungha gikan sa sapa, mga maot ug mga niwang kini. Wala pa gayod ako makakita ug sama nila kamaot nga mga baka sa tibuok kayutaan sa Ehipto! ²⁰ Gikaon sa mga niwang ug maot nga mga baka ang nahaunang nitungha nga pito ka tambok nga mga baka. ²¹ Apan pagkahuman niana, dili mailhan nga ang mga niwang nga mga baka mikaon kanila, tungod kay mga niwang gihapon sila sama kaniadto. Unya nakamata ako. ²² Unya nagdamgo na usab ako. Nakita ko ang pito ka mga trigo. Bus-ok ug timgas ang mga lugas niini, ug kining tanan mitubo sa usa lang ka punoan. ²³ Unya nahibulong ako sa akong nakita nga may laing pito ka mga trigo ang miturok. Mga piyasot kini ug nalawos tungod sa init nga hangin sa sidlakan. ²⁴ Gilamoy sa pito ka mga piyasot nga mga trigo ang pito ka mga maayong trigo. Gisugilon ko kining mga damgo ngadto sa mga salamangkero, apan walay usa kanila nga makapasabot kanako sa kahulogan niini." ²⁵ Unya si Jose miingon ngadto sa hari, "Ang imong duha ka mga damgo managsama lang ang kahulogan. Ang Dios nagpadayag kanimo sa imong mga damgo kung unsa ang iyang pagabuhaton. ²⁶ Ang pito ka himsog nga mga baka nagpasabot sa pito ka mga katuigan. Ang pito ka maayong mga trigo nagpasabot usab sa pito ka mga katuigan. Ang duha ka mga damgo managsama lang ang buot ipasabot. ²⁷ Ang pito ka niwang nga mga baka nga mitungha sunod kanila ug ang pito ka mga walay bili nga mga trigo nga nalawos tungod sa init nga hangin sa sidlakan nagpasabot sa pito ka mga katuigan nga kagutom. ²⁸ Mahitabo kini sama sa akong gisugilon kanimo, tungod kay ang Dios nagpadayag kanimo sa iyang pagabuhaton. ²⁹ Adunay pito ka mga katuigan nga daghan ug pagkaon sa tibuok yuta sa Ehipto, ³⁰ apan pagkahuman niana adunay pito usab ka mga katuigan sa kagutom ang moabot. Mahikalimtan sa katawhan ang mga katuigan nga adunay daghang pagkaon, tungod sa hilabihang kainit nga modaot unya sa nasod. ³¹ Ang katawhan mahikalimot kung unsa kadaghan ang ilang pagkaon kaniadto, tungod sa hilabihan nga kagutom. ³² Ang katuyoan nga gihatagan ka sa Dios ug duha ka mga damgo tungod kay nakahukom na siya nga kini mahitabo gayod, ug buhaton gayod niya kini sa dili madugay. ³³ Karon magsugyot ako kanimo nga kinahanglan magpili ka ug tawong maalamon nga makahimo ug maayong mga desisyon. Magsugyot ako nga himuon mo siya nga modumala sa mga buluhaton sa tibuok nasod. ³⁴ Kinahanglan usab nga mopili ka ug mga tigdumala sa tibuok nasod, aron nga mahan-ay ang pagkolekta sa ikalimang bahin sa tanang trigo nga maani sulod sa pito ka mga katuigan nga daghan ang pagkaon. ³⁵ Kinahanglan nga kolektahon nila ang pipila ka trigo atol sa pito ka mga katuigan nga moabotay, sa dihang daghan pa kaayo ang pagkaon. Kinahanglan imo silang bantayan samtang ila kining tipigan sa mga siyudad ug samtang ila kining pagabantayan. ³⁶ Kinahanglan matipigan ang trigo aron adunay makaon atol sa pito ka mga katuigan nga adunay kagutom dinhi sa Ehipto, aron nga dili mangamatay ang katawhan niining siyudad tungod sa hilabihang kagutom." ³⁷ Nakahunahuna ang hari ug ang iyang mga opisyal nga maayo kini nga plano. ³⁸ Busa miingon siya kanila, "Makakaplag pa ba kita ug laing tawo nga sama kang Jose, kansang gihatagan sa Dios sa iyang espiritu? ³⁹ Unya miingon ang hari kang Jose, "Tungod kay gipadayag sa Dios kining tanan diha kanimo, alang kanako wala nay lain pang mas maalamon nga sama kanimo ug maalamong modesisyon mahitungod sa mga butang. ⁴⁰ Busa piyalan ko ikaw sa tanang butang sa akong palasyo. Ang tanang katawhan dinhi sa Ehipto kinahanglang motuman sa imong mando. Tungod kay ako man ang hari ako lang ang adunay mas dakong pagbuot kaysa kanimo." ⁴¹ Unya miingon ang hari kang Jose, "Karon ikaw na ang magdumala sa tibuok nasod sa Ehipto." ⁴² Gikuha sa hari ang singsing gikan sa iyang tudlo nga may silyo niya niini, ug gisul-ob niya kini sa tudlo ni Jose. Gipasul-oban siya ug bisti nga hinimo sa lino, ug gikwentasan niya siya ug bulawan. ⁴³ Unya gipaandaman niya si Jose ug karwahe nga iyang pagasakyan libot sa nasod aron ipaila nga siya ang ikaduhang pinakamahinungdanong tawo sa nasod. Sa dihang nagsakay si Jose sa karwahe, ang mga tawo nga nag-una kaniya nagsinggit ngadto sa katawhan, "Pangyukbo kamo!" Busa gipiyalan sa hari si Jose sa tanang butang sa nasod. ⁴⁴ Miingon ang hari kang Jose, "Ako ang hari, apan walay si bisan kinsa sa tibuok yuta sa Ehipto ang makahimo sa bisan unsa kung dili mo sila tugotan sa pagbuhat niini." ⁴⁵ Gihatagan siya ug bag-ong ngalan sa hari nga Zaphenath Paneah. Gihatag usab kaniya si Asenat ingon nga iyang asawa. Anak siya ni Potifera, nga pari sa templo sa siyudad sa On. Niini nga pamaagi nahimong inila si Jose sa tibuok yuta sa Ehipto. ⁴⁶ Nagpangidaron si Jose ug 30 sa dihang nagsugod siya sa pagtrabaho alang sa hari sa Ehipto. Gibiyaan niya ang palasyo sa Paraon ug mipanaw sa tibuok Ehipto aron sa pagbuhat sa iyang trabaho. ⁴⁷ Atol sa pito ka katuigan, ang yuta naghatag ug madagayaon nga ani, busa aduna silay daghang pagkaon. ⁴⁸ Sa pagdumala ni Jose kanila, ang iyang mga kaabag nagkolekta sa ikalimang bahin sa tanang trigo nga naani niadtong mga tuiga, ug gitipigan kini sa mga siyudad. Sa matag siyudad, aduna siyay kaabag sa pagtipig sa trigo nga mitubo sa mga uma nga naa nakapalibot niini. ⁴⁹ Adunay daghang natigom nga trigo si Jose. Sama kini kadaghan sa balas sa baybayon. Adunay daghan kaayong trigo nga sa kasamtangan mihunong sila sa paglista kon unsa na kadaghan ang natipig, sanglit kadaghan na kaayo ang trigo nga dili na nila masukod. ⁵⁰ Sa wala pa misugod ang pito ka tuig sa kagutom, nanganak ang asawa ni Jose nga si Asenat ug duha ka mga lalaki. ⁵¹ Ginganlan ni Jose ang nahauna niyang anak ug Manases, nga ang buot ipasabot sa Hebrohanon "kalimot," tungod kay siya nag-ingon, "Gitugot sa Dios nga makalimtan ko ang tanang kalisod ug ang tanang pamilya sa akong amahan." ⁵² Ginganlan niya ang ikaduha niyang anak ug Efraim, nga ang ipasabot "nga makabaton ug mga anak," tungod kay siya nag-ingon, "Ang Dios naghatag kanako ug mga anak dinhi sa yuta kung diin ako nag-antos." ⁵³ Sa kataposan nahuman na ang pito ka mga tuig nga adunay daghang pagkaon. ⁵⁴ Unya misugod na usab ang pito ka tuig sa kagutom, sama sa gitagna ni Jose. May kagutom usab sa tanang kasikbit nga mga dapit, apan bisan wala makatubo ang mga tanom, adunay pagkaon sa bisan asa nga dapit sa Ehipto, tungod kay nagtipig man sila ug pagkaon sa mga siyudad. ⁵⁵ Sa dihang nahurot na sa katawhan ang kaugalingon nilang pagkaon ug sila gipanggutom, nagpakiluoy sila sa hari alang sa pagkaon. Busa giingnan sa hari ang tanang katawhan sa Ehipto, "Adto kamo kang Jose ug buhata kon unsa ang iyang ipabuhat kaninyo." ⁵⁶ Sa dihang hilabihan na kaayo ang kagutom sa tibuok nasod, nagsugo si Jose sa iyang mga kaabag sa pag-abli sa mga balay tipiganan. Unya gipamaligya nila ang trigo nga anaa sa balay tipiganan ngadto sa mga tawo sa Ehipto, tungod kay ang kagutom hilabihan na man kaayo nga mikaylap sa tibuok Ehipto. ⁵⁷ Ang mga tawo nga gikan sa nagkalain-laing kasikbit nga nasod sa Ehipto miadto aron sa pagpalit ug trigo gikan kang Jose, tungod kay ang kagutom mikaylap na man sa tanang dapit.