¹ Milabay ang pipila ka higayon, duha sa mga opisyal sa hari sa Ehipto ang nakabuhat og mga butang nga wala nakapahimuot kaniya. ² Ang usa pangulo sa iyang tigtagay sa bino ug ang usa pangulo sa iyang tigbuhat og tinapay. Nasuko ang hari niining duha. ³ Busa gipriso niya sila, ngadto sa balay sa kapitan sa mga guwardiya sa palasyo. Mao kadto ang dapit nga nahimutangan ni Jose. ⁴ Napriso ang duha ka mga lalaki sa dugay nga panahon. Nianang panahona, gipili si Jose sa kapitan sa mga guwardiya sa palasyo sa pagdala sa mga butang nga ilang gikinahanglan. ⁵ Usa ka gabii niana nakadamgo ang pangulong tigtagay sa bino sa hari ug ang pangulong tigbuhat og tinapay. Ang matag damgo adunay managlahi nga ipasabot. ⁶ Sa pagkabuntag, sa dihang miduol si Jose kanila, nakita niya nga masulub-on silang duha. ⁷ Busa nangutana siya kanila, "Nganong nagmasulub-on man kamo?" ⁸ Ang usa kanila mitubag, "Kagabii nakadamgo kaming duha, apan walay usa nga makasulti kanamo kung unsa ang buot ipasabot sa maong mga damgo." Miingon si Jose kanila, "Dios ang makasulti kung unsa ang ipasabot sa maong mga damgo. Busa sultihi ako kung unsa ang inyong nadamgohan, ug sultihan ako sa Dios sa buot nga ipasabot niini." ⁹ Busa gisulti sa pangulong tigtagay sa bino sa hari ang iyang damgo ngadto kang Jose. Miingon siya, "Sa akong damgo nakakita ako og paras sa akong atubangan. ¹⁰ Ang paras adunay tulo ka mga sanga. Ang mga sanga nanalingsing, unya namulak kini, ug unya namunga kini og pungpong sa ubas. ¹¹ Nagkupot ako og kupa sa hari, busa gipupo ko ang hinog nga mga ubas ug gipuga kini ngadto sa kupa. Unya gihatag ko sa hari ang kupa aron iyang imnon ang duga niini." ¹² Gisulti dayon sa Dios kang Jose ang buot ipasabot sa damgo. Busa miingon si Jose kaniya, "Mao kini ang ipasabot sa imong damgo: Ang tulo ka sanga sa paras nagpaila sa tulo ka adlaw. ¹³ Sulod sa tulo ka adlaw ipagawas ka sa hari gikan sa prisohan. Ipabalik ka niya sa imong trabaho kaniadto. Magdala ka na usab og kupa ngadto sa hari sama sa imong ginabuhat kaniadto, sa dihang ikaw pa ang iyang tigtagay sa bino. ¹⁴ Apan kung makagawas ka na sa prisohan ug maayo na ang imong kahimtang, palihog ayaw ako kalimti. ¹⁵ Gipugos ako pagkuha sa mga tawo gikan sa dapit nga gipuy-an sa akong isig ka mga Hebreohanon. Wala akoy gibuhat nga sayop didto, ug samtang ania na ako sa Ehipto, wala usab akoy nabuhat nga sayop aron angay akong prisohon. Busa kaluy-i ako ug sultihi ang hari mahitungod kanako, aron ipagawas niya ako gikan niining prisohan!" ¹⁶ Sa dihang nadungog sa pangulo sa tigbuhat og tinapay nga maayo ang buot ipasabot sa damgo sa tigtagay sa bino sa hari kaniya, miingon usab siya kang Jose, "Nakadamgo usab ako. Sa akong damgo natingala ako sa pagkakita sa tulo ka bukag sa tinapay nga nahimutang sa akong ulo. ¹⁷ Sa ibabaw sa bukag adunay daghang matang sa niluto nga pagkaon alang sa hari, apan gipangaon kini sa mga langgam gikan sa bukag nga anaa sa ibabaw sa akong ulo!" ¹⁸ Gisulti usab sa Dios kang Jose ang ipasabot sa damgo, busa miingon siya, "Ang tulo ka bukag nagpasabot usab sa tulo ka adlaw. ¹⁹ Sulod sa tulo ka adlaw magmando ang hari nga papunggotan ka. Unya ang imong lawas ibitay sa kahoy, ug kaonon sa mga langgam ang imong unod." ²⁰ Sa ikatulo ka adlaw human niana mao na ang adlaw nga natawhan sa hari. Nianang adlawa gidapit sa hari ang tanan niyang opisyal aron magsaulog sa iyang adlaw nga natawhan. Sa maong pagsaulog, samtang silang tanan nagtigom didto, gipatawag sa hari ang iyang pangulo sa tigtagay sa bino ug ang pangulo sa tigbuhat og tinapay gikan sa prisohan. ²¹ Miingon siya nga ang iyang pangulo sa tigtagay sa bino makabalik na sa iyang trabaho kaniadto, busa magsugod na usab siya sa pagdala sa kupa ngadto sa hari. ²² Apan nagmando siya nga ang pangulo sa tigbuhat og tinapay kinahanglan bitayon, sama sa giingon ni Jose nga mahitabo sa dihang gisulti niya sa duha ka lalaki ang buot ipasabot sa ilang mga damgo. ²³ Apan wala na maghunahuna ang pangulo sa tigtagay sa bino mahitungod kang Jose. Hinuon, nakalimtan na niya pagbuhat kung unsa ang gihangyo ni Jose kaniya nga iyang buhaton.