¹ Sa kasamtangan, gidala si Jose sa mga kaliwat ni Ismael palugsong sa Ehipto. Didto gipalit ni Potifar si Jose gikan kanila. Si Potifar usa ka Ehiptohanon nga usa sa mga opisyal sa hari ug kapitan sa mga guwardiya sa palasyo sa hari. ² Tungod kay gitabangan ni Yahweh si Jose, nahimo niya ang iyang trabaho pag-ayo. Nagtrabaho siya sa balay sa iyang agalon nga Ehiptohanon. ³ Nakita sa iyang agalon nga ginatabangan ni Yahweh si Jose ug naghimo kaniya nga malamposon sa tanan niyang gibuhat. ⁴ Gikahimut-an si Jose sa iyang agalon, busa gipili siya nga mahimong kaugalingon niyang sulugoon. Unya gihimo siyang piniyalan sa tanang butang nga anaa sa iyang panimalay ug sa tanan nga iyang mga gipanag-iyahan. ⁵ Sukad sa panahon nga gipili ni Potifar si Jose nga mamahimong piniyalan sa tanang butang nga anaa sa iyang panimalay ug sa tanan niyang gipanag-iyahan, gipanalanginan ni Yahweh ang mga tawo nga nagpuyo sa balay ni Potifar tungod kang Jose. Gipatubo usab niya og maayo ang tanom ni Potifar. ⁶ Gitugotan ni Potifar si Jose sa pag-atiman sa tanan niyang gipanag-iyahan. Walay nay laing hunahunaon si Potifar gawas lamang sa pagkaon nga iyang kaonon. Wala siya naghunahuna bahin sa bisan unsang butang nga anaa sa iyang panimalay. Karon si Jose usa ka lalaki nga maayo og pamarog ug ambongan. ⁷ Tungod niana, miabot ang panahon nga naibog ang asawa sa iyang agalon ngadto kang Jose. Busa usa ka adlaw niana miingon ang babaye kaniya, "Magdulog kita!" ⁸ Apan midumili si Jose, ug miingon sa asawa sa iyang agalon, "Paminaw! Ang akong agalon wala na maghunahuna sa bisan unsang butang nga anaa niining balaya. Gipiyal niya kanako ang tanan nga iyang gipanag-iyahan. ⁹ Walay bisan usa dinhi sa panimalay nga adunay mas labaw og katungod kay kanako. Ang usa lamang ka butang nga wala gayod niya gitugot nga maako mao ikaw, tungod kay asawa ka niya! Busa unsaon ko man pagbuhat niining daotang butang nga imong ipabuhat kanako? Makasala ako batok sa Dios kung buhaton ko kana!" ¹⁰ Kanunay niyang ginadani si Jose nga makigdulog kaniya, apan midumili siya. Bisan ang pagduol sa babaye dili niya buhaton. ¹¹ Usa ka adlaw niana misulod si Jose sa balay aron pagbuhat sa iyang buluhaton, ug walay laing sulugoon nga anaa sa balay. ¹² Gibira sa asawa ni Potifar ang iyang sinina ug miingon, "Magdulog kita!" Midagan si Jose pagawas sa balay, apan ang iyang sinina nahibilin sa kamot sa babaye! ¹³ Sa dihang nakita niya nga midagan si Jose pagawas nga nahibilin ang bisti sa iyang kamot, ¹⁴ gitawag niya ang mga sulugoon sa panimalay. Miingon siya kanila, "Tan-awa! Giinsulto kita niining Hebreohanon nga gidala sa akong bana kanato! Miduol siya kanako ug gipugos niya ako nga makigdulog kaniya, apan misinggit ako og kusog. ¹⁵ Sa pagkadungog niya nga misinggit ako, midagan siya pagawas ug nahibilin ang iyang bisti kanako!" ¹⁶ Gitagoan niya ang bisti ni Jose hangtod nga miuli sa ilang panimalay ang iyang bana, nga agalon ni Jose. ¹⁷ Unya gisultihan niya siya niini nga sugilanon: "Kanang ulipon nga Hebreohanon nga imong gidala dinhi miduol kanako ug gisulayan ako paglugos! ¹⁸ Sa dihang misinggit ako og kusog, midagan siya pagawas ug nabiyaan ang iyang bisti!" ¹⁹ Sa pagkadungog ni Potifar niining maong sugilanon nga gisulti sa iyang asawa, ug sa dihang siya miingon, "Mao kini ang pagtagad sa imong ulipon kanako," nasuko siya pag-ayo. ²⁰ Gikuha si Jose sa iyang agalon ug gipriso, sa dapit diin ginabutang ang tanan nga piniriso sa hari, ug didto nahimutang si Jose. ²¹ Apan naluoy si Yahweh kang Jose ug gitabangan siya tungod sa iyang saad sa iyang mga katigulangan; gihimo niyang mahimuot ang tigbantay sa prisohan ngadto kang Jose. ²² Busa gipiyal sa tigbantay sa prisohan kang Jose ang tanang mga piniriso, ug gipiyal kaniya ang tanan nga buluhaton didto. ²³ Wala na maghunahuna pa ang tigbantay sa prisohan sa bisan unsa nga ginabuhat ni Jose, tungod kay gitabangan man siya ni Yahweh sa pagbuhat sa tanan niyang buluhaton.