¹ Nianang panahona, mibiya si Juda sa iyang magulang ug manghod nga mga lalaki ug milugsong gikan sa kabungtoran ug nagpuyo didto kauban sa tawo nga ginganlan og Hiram nga taga-Adulam. ² Didto nakita niya ang usa ka babaye nga anak sa tawo nga taga-Canaan nga ginganlan og Sua. Giminyoan niya ang babaye ug nakigdulog kaniya. ³ Nabuntis siya ug milabay ang pipila ka panahon nanganak siya ug batang lalaki. Ginganlan sa iyang amahan ang bata og Er. ⁴ Milabay ang pipila ka panahon nabuntis na usab siya ug nanganak og laing batang lalaki, nga iyang ginganlan og Onan. ⁵ Milabay ang daghang mga katuigan, sa dihang si Juda ug ang iyang pamilya nagpuyo sa Chezib, nanganak na usab ang asawa ni Juda og laing batang lalaki. Ginganlan sa iyang asawa ang bata og Sela. ⁶ Sa dihang dako na ang kinamagulangang anak ni Juda nga si Er, nagkuha og pangasaw-onon si Juda alang kaniya, usa ka babaye nga ginganlan og Tamar. ⁷ Apan nakabuhat si Er og usa ka butang nga giisip ni Yahweh nga daotan kaayo, mao nga gipatay siya ni Yahweh. ⁸ Unya miingon si Juda kang Onan, "Namatay ang imong igsoon nga wala nakabaton og anak. Busa minyoi ang iyang balo ug pakigdulog kaniya. Kay mao kana ang atong nabatasan nga kinahanglan nimong buhaton." ⁹ Apan nasayod si Onan nga ang bata nga ihimugso dili ilhon nga iya. Busa sa matag higayon nga makigdulog siya sa balo sa iyang igsoon, ipagawas niya ang iyang similya didto sa yuta, aron dili mabuntis ang balo sa iyang igsoon ug dili makahatag og mga anak alang sa iyang igsoon. ¹⁰ Giisip ni Yahweh nga daotan ang gibuhat ni Onan, busa gipatay usab niya siya. ¹¹ Unya miingon si Juda sa iyang umagad nga babaye nga si Tamar, "Balik didto sa balay sa imong amahan, apan ayaw pagpakigminyo kang bisan kinsa. Kung maulitawo na ang akong kinamanghorang anak nga si Sela, minyoan ka niya." Apan ang tinuod dili gayod gusto ni Juda nga ipaminyo si Sela kaniya, tungod kay nahadlok siya nga tingali mamatay usab si Sela, sama nga ang iyang mga magulang nangamatay. Busa gituman ni Tamar si Juda ug mibalik pagpuyo sa balay sa iyang amahan. ¹² Milabay ang pipila ka mga katuigan, namatay ang asawa ni Juda, nga anak ni Sua. Sa dihang natapos na ang panahon sa pagbangotan alang kaniya, nakahukom si Juda nga motungas sa Timna, sa dapit kung asa nagtupi sa balhibo sa karnero ang iyang mga tawo. Ang iyang higala nga si Hiram, nga gikan sa Adulam mikuyog kaniya. ¹³ Adunay usa ka tawo nga miingon kang Tamar, "Ang imong ugangang lalaki padulong sa Timna aron tabangan ang iyang mga tawo sa pagtupi sa balhibo sa iyang karnero." ¹⁴ Nasayran ni Tamar nga ulitawo na karon si Sela, apan wala gihatag ni Juda ang iyang anak ngadto kaniya aron iyang untang minyoan. Busa gihubo niya ang iyang bisti sa pagkabalo, ug gitabonan og bilo ang iyang ulo aron dili siya mailhan sa mga tawo. Unya milingkod siya sa ganghaan sa Enaim, nga dalan padulong sa Timna. ¹⁵ Sa pagkakita ni Juda kaniya, nagtuo si Juda nga usa siya ka babaye nga nagabaligya og dungog, tungod kay gitabonan man niya ang iyang ulo ug milingkod sa ginalingkoran sa mga babaye nga nagabaligya og dungog. ¹⁶ Wala nakahibalo si Juda nga si Tamar kadto. Busa miingon siya kaniya, "Tugoti ako nga modulog kanimo." Mitubag siya, "Unsa man ang imong ihatag kanako isip bayad?" ¹⁷ Mitubag siya, "Padad-an ko ikaw og nating kanding gikan sa akong kahayopan." Nangutana siya, "Mahimo ba nga hatagan mo ako og usa ka butang karon aron akong kuptan hangtod maipadala mo ang kanding?" ¹⁸ Mitubag siya, "Unsa man ang buot mong ihatag ko kanimo? Mitubag si Tamar, "Ihatag kanako ang singsing imong gikwentas ug nga anaay ngalan nimo, ug ihatag usab kanako ang imong sungkod." Busa gihatag niya kini kaniya. Unya nakigdulog siya kaniya, ug nabuntis si Tamar. ¹⁹ Sa iyang pagbiya, gihubo niya ang bilo ug gisul-ob balik ang iyang bisti sa pagkabalo. ²⁰ Gihatag ni Juda ang nating kanding sa iyang higala nga gikan sa Adulam, aron dad-on ngadto sa babaye, sama sa iyang gisaad. Apan wala makit-i sa iyang higala ang maong babaye. ²¹ Busa gipangutana sa iyang higala ang mga tawo nga nagpuyo didto, "Asa na kadtong babaye nga nagabaligya og dungog dinhi nga naglingkod sa kilid sa dalan sa Enaim?" Mitubag sila, "Wala gayoy babaye nga nagabaligya og dungog dinhi!" ²² Busa mibalik siya ngadto kang Juda ug miingon, "Wala nako siya hikaplagi. Ug nag-ingon ang mga tawo nga nagpuyo sa lungsod, 'Wala gayoy babaye nga nagabaligya og dungog dinhi.'" ²³ Miingon si Juda, "Pasagdan nalang nato nga anaa kaniya ang mga butang nga gihatag ko kaniya. Kung mopadayon kita sa pagpangita kaniya, kataw-an kita sa mga tawo. Misulay ako sa pagpadala niining nating kanding kaniya, apan wala mo siya hikaplagi aron unta ihatag kini kaniya." ²⁴ Mga tulo ka bulan ang milabay, adunay nag-ingon kang Juda, "Ang imong umagad nga si Tamar nahimong babayeng nagabaligya og dungog, ug karon buntis na siya!" Mitubag si Juda, "Guyora siya pagawas sa siyudad ug sunoga!" ²⁵ Apan sa dihang gidala na nila siya sa gawas sa siyudad, gihatag niya ang singsing ug ang sungkod ngadto sa tawo, ug giingnan niya nga dad-on kini ngadto kang Juda, ug misulti siya, "Ang lalaki nga nanag-iya niining mga butanga maoy hinungdan sa akong pagbuntis." Miingon usab siya kaniya, "Tan-awa kining singsing, ug ang pisi nga nakahikot niini, ug kining sungkod. Si kinsa man ang nanag-iya niini?" ²⁶ Sa dihang gibuhat kana sa tawo, nailhan ni Juda ang singsing ug ang sungkod. Miingon siya, "Mas insakto siya kay kanako. Wala ko sultihi ang akong anak nga si Sela nga minyoan siya, sama sa akong gisaad nga akong buhaton." Ug wala na gayod midulog pag-usab si Juda kaniya. ²⁷ Sa panahon nga manganak na siya, nalipay siya tungod kay nasayran niya nga kaluha ang anaa sa iyang sabakan. ²⁸ Sa dihang manganak na siya, gipagawas sa usa sa kaluha ang iyang kamot. Busa gihigtan sa mananabang og pula nga tanod ang iyang kamot, nga nag-ingon, "Kini mao ang unang migawas." ²⁹ Apan gibira niya pabalik sa sabakan ang iyang kamot, ug ang iyang kaluha ang migula og una. Busa miingon siya, "Mao kini ang imong paagi sa pagula og una!" Mao nga ginganlan niya ang bata og Perez, nga mura bag sama sa Hebreo nga pulong nga nagpasabot "migula." ³⁰ Unya migula ang iyang manghod, ang usa nga adunay pula nga tanod sa iyang kamot. Ug ginganlan siya og Zera, nga mura bag sama sa Hebreo nga pulong nga nagpasabot "kapula sa kaadlawon."