¹ Mipadayon sa pagpuyo si Jacob sa yuta sa Canaan nga gipuy-an usab sa iyang amahan kaniadto. ² Mao kini ang nahitabo sa pamilya ni Jacob. Sa dihang ang iyang anak nga si Jose 17 anyos na, nag-atiman siya sa mga panon sa karnero ug kanding uban sa iyang mga igsoong lalaki. Mga anak sila sa puyopuyo sa iyang amahan, nga si Bilha ug si Zilpa. Gisultihan ni Jose ang iyang amahan mahitungod sa daotang mga butang nga ginabuhat sa iyang mga igsoong lalaki. ³ Gipangga pag-ayo ni Jacob si Jose labaw pa sa uban niyang mga anak, tungod kay natawo si Jose sa dihang tigulang na si Jacob. Gipabuhatan ni Jacob si Jose ug maanindot nga sinina nga adunay taas nga bukton. ⁴ Sa dihang namatikdan sa mga igsoon ni Jose nga gipangga siya pag-ayo sa ilang amahan labaw pa sa iyang paghigugma kang bisan kinsa kanila, gidumtan nila siya. Ug dili maayo ang ilang ginasulti kaniya. ⁵ Usa ka gabii niana nagdamgo si Jose. Giingnan niya ang iyang mga igsoong lalaki mahitungod sa iyang damgo, ug mao kini ang hinungdan nga gidumtan nila siya pag-ayo. Mao kini ang nahitabo: ⁶ Miingon siya kanila, "Paminaw sa akong damgo! ⁷ Sa maong damgo, namugkos kita ug mga trigo didto sa uma. Sa kalit lang ang akong binugkos nga trigo mitindog, ug ang inyong mga binugkos mipalibot ug miyukbo sa akong binugkos!" ⁸ Miingon ang iyang mga igsoon kaniya, "Naghunahuna ka ba nga sa umaabot magdumala ka nganhi kanamo? Mahimo ka ba nga among hari?" Misamot pa hinuon ang ilang pagdumot kaniya tungod sa iyang gisulti kanila mahitungod sa iyang damgo. ⁹ Ug unya nagdamgo na usab siya, ug giingnan na usab niya ang iyang mga igsoong lalaki mahitungod niini. Miingon siya, "Paminawa kini! Aduna akoy laing damgo. Niini nga damgo, ang adlaw ug ang bulan ug ang napulog usa ka mga bituon miyukbo kanako!" ¹⁰ Gisultihan usab niya ang iyang amahan mahitungod niini. Gibadlong siya sa iyang amahan, nga nag-ingon "Unsa ang imong ikasulti nianang damgoha? Naghunahuna ka ba nga kini nagpasabot nga ang imong inahan, ako ug ang imong mga igsoong lalaki moyukbo sa imong atubangan?" ¹¹ Nasina ang mga igsoong lalaki ni Jose kaniya, apan padayon nga naghunahuna ang iyang amahan mahitungod sa buot ipasabot sa maong damgo. ¹² Usa ka adlaw niana ang mga igsoong lalaki ni Jose milakaw aron sa pag-atiman sa mga karnero ug mga kanding sa ilang amahan didto sa uma duol sa Siquem. ¹³ Sa pagkataodtaod, miingon si Jacob kang Jose, "Ang imong mga igsoon nag-atiman sa mga karnero ug mga kanding didto duol sa Siquem. Ipadala ko ikaw didto aron sa pagsusi kanila." Mitubag si Jose, "Moadto ako." ¹⁴ Miingon si Jacob, "Lakaw ug susiha kung maayo ba ang ilang kahimtang ug kung maayo ang kahimtang sa mga panon sa mananap. Unya balik ug balitai ako." Busa gipadala ni Jacob si Jose gikan sa walog nga ilang gipuy-an, ang walog diin makita ang Hebron, aron sa pagpangita sa iyang mga igsoon. Unya nakaabot na duol sa siyudad sa Siquem si Jose. ¹⁵ Samtang naglakaw-lakaw siya libot sa uma sa pagpangita sa iyang mga igsoon, usa ka tawo ang nakakita kaniya ug nangutana kaniya, "Kinsa man ang imong ginapangita?" ¹⁶ Mitubag si Jose, "Gipangita ko ang akong mga igsoon. Masulti ba nimo kanako kung asa nila gipasabsab ang ilang mga karnero ug mga kanding?" ¹⁷ Mitubag ang tawo, "Wala na sila dinhi. Nadungog ko ang usa kanila nga miingon, 'Dad-on nato ang karnero ug mga kanding ug moadto sa lungsod sa Dotan.'" Busa mibiya si Jose didto ug miadto sa amihan, ug nakita ang iyang mga igsoong lalaki duol sa Dotan. ¹⁸ Apan nakita nila siya sa dihang anaa pa siya sa layo, ug nagplano sila nga patyon siya. ¹⁹ Nag-ingnanay sila sa matag-usa, "Ania na ang magdadamgo!" ²⁰ "Dali kamo, patyon nato siya ug ilabay ang iyang lawas ngadto sa usa sa mga atabay! Unya atong ingnon ang mga tawo nga giatake siya sa bangis nga mananap ug namatay siya ug gikaon. Ug unya tan-awon nato kung matinuod pa ba ang iyang mga damgo!" ²¹ Nadungog ni Ruben ang ilang gipanulti, busa gidani niya sila nga dili patyon si Jose. Miingon siya, "Ayaw, dili nato siya kinahanglang patyon. ²² Ayaw siya patya! Ato hinuon siyang ihulog sa atabay didto sa kamingawan, apan dili nato siya kinahanglan pasakitan." Gisulti niya kana ug unya mibiya kanila, kay nagplano diay siya nga luwason si Jose ug dalhon siya balik sa iyang amahan. ²³ Sa pag-abot ni Jose kung asa ang iyang igsoon, gidakop nila siya ug gihubo ang iyang sinina nga taas ug bukton. ²⁴ Unya gialsa nila siya ug gihulog siya sa atabay. Uga ang atabay; ug kini walay tubig. ²⁵ Sa nanglikod na sila aron mangaon, nakakita sila og usa ka panon sa mga negosyante, nga mga kaliwat ni Ismael, gikan sa dapit sa Gilead. Ang ilang mga kamelyo gikargahan sa mga lamas ug mahumot nga mga duga. Palugsong sila sa Ehipto aron ibaligya kadtong mga butanga didto. ²⁶ Miingon si Juda sa iyang mga igsoon, "Kung atong patyon ang atong manghod ug itago ang iyang lawas, unsa may makuha nato niana? ²⁷ Busa imbes nga pasakitan siya, ibaligya nalang nato siya niining mga kaliwat ni Ismael. Ayaw kalimti, atoa siyang kaugalingong manghod!" Busa nagkasinabot silang tanan sa pagbuhat niana. ²⁸ Sa dihang duol na ang mga mamaligyaay nga gikan sa dapit sa Midian, gikuha nila si Jose pagawas sa atabay. Unya gibaligya siya ngadto sa mga lalaki nga gikan sa Midian sa kantidad nga 20 ka buok plata. Unya gidala sa mga mamaligyaay si Jose sa Ehipto. ²⁹ Sa pagbalik ni Ruben sa atabay, nakita niya nga wala na didto ang iyang manghod. Sa hilabihang kaguol gigisi niya ang iyang sinina. ³⁰ Mibalik siya ngadto sa iyang mga manghod ug miingon, "Wala na sa atabay si Jose! Unsa man ang angay nakong buhaton karon?" ³¹ Dili sila makaako nga mosulti sa ilang amahan sa ilang gibuhat. Busa nakahukom sila sa pagbuhat og tinumotumo nga istorya mahitungod sa nahitabo. Gikuha nila ang taas og bukton nga sinina ni Jose. Unya nagpatay sila og usa ka kanding ug gituslob ang sinina didto sa dugo sa kanding. ³² Gikuha nila ang sinina ug gidala balik ngadto sa ilang amahan ug miingon, "Nakit-an namo kini! Tan-awa. Dili ba mao man kini ang sinina sa imong anak nga lalaki?" ³³ Nailhan niya kini, ug miingon siya, "Oo, sa akoa kining anak! Tingali pipila sa mga bangis nga hayop nag-ataki ug nagpatay kaniya! Sigurado ako nga ang mananap nagkuniskunis kang Jose!" ³⁴ Tungod sa hilabihang kaguol ni Jacob iyang gigisi ang iyang sinina. Nagsul-ob siya og sako ug nagbangotan siya. ³⁵ Nangadto ang tanan niyang mga anak aron sa paghupay kaniya, apan wala niya tagda ang ilang gipanulti. Miingon siya, "Dili, magpabilin akong magbangotan hangtod mamatay ako ug makig-uban na sa akong anak." Mao nga nagpadayon paghilak ang amahan ni Jose tungod sa nahitabo sa iyang anak. ³⁶ Nianang tungora, ang mga lalaki nga gikan sa Midian nagdala kang Jose padulong sa Ehipto ug nagbaligya kaniya ngadto kang Potifar, nga usa ka opisyal sa hari. Siya ang kapitan sa mga sundalo nga tigpanalipod sa Paraon.