¹ Mao kini ang mga kaliwat ni Esau, nga ang laing ngalan mao ang Edom, ug ang nahitabo kanila. ² Naminyo si Esau ug tulo ka babaye nga taga-Canaan: si Ada, ang anak nga babaye ni Elon nga Hetihanon; si Oholibamah, anak nga babaye ni Ana ug apo ni Zibeon nga Hetihanon; ³ ug si Basemat, nga anak nga babaye ni Ismael ug igsoon nga babaye ni Nebaiot. ⁴ Nanganak si Ada nga asawa ni Esau kang Elifas. Nanganak si Basemath kang Reuel. ⁵ Nanganak si Oholibama kang Jeus, Jalam, ug Kora. Natawo kining tanan nga anak ni Esau samtang nagpuyo pa siya sa yuta sa Canaan. ⁶ - ⁷ Daghan kaayo ug kabtangan si Esau ug Jacob. Mao kini ang hinungdan, nanginahanglan sila ug luag nga yuta alang sa ilang mga mananap. Dili igo ang yuta nga ilang gipuy-an sa tanan nilang mga mananap. Busa si Esau, nga ang laing ngalan mao ang Edom, gidala ang iyang mga asawa ug mga anak nga lalaki ug babaye ug ang tanan nga miyembro sa iyang panimalay, ang iyang mga karnero ug mga kanding ug ang ubang mga mananap, ug ang tanan nga mga butang nga iyang napanag-iya gikan sa yuta sa Canaan, ug mibalhin sila sa dapit nga layo kang Jacob. ⁸ Nilakaw sila ug mipuyo sa kabungtoran sa Seir. ⁹ Mao kini ang kaliwat nga gikan kang Esau, ang katigulangan sa Edom nga mga tawo nga nagpuyo sa dapit sa Seir. ¹⁰ Nanganak si Ada nga asawa ni Esau kang Elifas, ug nanganak si Basemath nga asawa ni Esau kang Reuel. ¹¹ Ang mga anak ni Elifas mao si Teman, Omar, Zefo, Gatam, ug si Kenaz. ¹² Ang anak ni Esau nga si Elifas adunay puyopuyo usab. Timna ang iyang ngalan. Nanganak siya kang Amalek. Mao kadto ang unom nga mga apo ni Esau sa iyang asawa nga si Ada. ¹³ Ang mga anak ni Reuel mao si Nahat, Zera, Shama, ug si Miza. Mao kini ang mga apo ni Esau sa iyang asawa nga si Basemat. ¹⁴ Si Oholibama, nga anak ni Ana ug apo ni Zibeon, nanganak ug tulo ka mga lalaki: si Jeus, Jalam, ug Kora. ¹⁵ Mao kini ang pangulo sa mga kaliwat ni Esau. Ang kaliwat ni Elifaz nga iyang kamagulangang anak nga lalaki, mao kini ang mga pangulo sa pundok sa mga katawhan: Teman, Omar, Zefo, Kenaz, ¹⁶ Kora, Gatam, ug si Amalek. Mao kini ang mga pangulo nga kaliwat ni Elifaz nga nagpuyo sa Edom; mga apo sila ni Ada. ¹⁷ Ang mga anak ni Reuel nga anak ni Esau maoy katigulangan sa pundok sa katawhan nga mao ang Nahat, Zera, Shama, ug Miza. Mao kini ang kaliwat ni Esau sa iyang asawa nga si Basemat. Nagpuyo usab sila sa Edom. ¹⁸ Ang mga anak ni Esau kang Oholibama, nga ang inahan mao si Ana, maoy mga katigulangan sa mga pundok sa katawhan nga mao ang Jeus, Jalam, ug ang Kora. ¹⁹ Mao kana ang listahan sa mga anak ni Esau, ug ang pundok sa mga katawhan nga ilang mga kaliwat. ²⁰ Mao kini ang listahan sa mga kaliwat ni Seir, nga sakop sa Horhanon, ang unang mga tawo nga nagpuyo sa rehiyon sa Edom: Lotan, Shobal, Zibeon, Ana, ²¹ Dishon, Ezer, ug Dishan. Mao kadtong pito ka mga tawo ang nahimong mga katigulangan sa mga katawhan. Ang kada pundok sa mga tawo adunay managsamang ngalan sa ilang katigulangan. ²² Ang mga anak ni Lotan mao si Hori ug Heman. Si Timna ang igsoon ni Lotan. ²³ Ang mga anak ni Shobal mao si Alvan, Manahat, Ebal, Shefo, ug Onam. ²⁴ Ang mga anak nga lalaki ni Zibeon mao si Aya ug Ana. Si Ana mao ang nakakita sa init nga tubod didto sa kamingawan samtang nag-atiman siya sa mga asno sa iyang amahan nga si Zibeon. ²⁵ Adunay duha ka anak si Ana—Dishon ang lalaki ug Oholibama ang babaye. ²⁶ Ang mga anak ni Dishon mao si Hemdan, Esban, Itran, ug Keran. ²⁷ Ang mga anak ni Ezer mao si Bilhan, Zaavan, ug Akan. ²⁸ Ang mga anak ni Dishan mao si Uz ug Aran. ²⁹ - ³⁰ Ang mga kaliwat sa Horhanon nagpuyo sa yuta sa Seir. Ang ngalan sa pundok sa mga tawo mao si Lotan, Shobal, Zibeon, Ana, Dishon, Ezer, ug Dishan. ³¹ Mao kini ang mga ngalan sa mga hari nga nagdumala sa Edom sa wala pay hari ang mga Israelita. ³² Si Bela nga anak ni Beor nahimo nga unang hari sa Edom. Nagpuyo siya sa siyudad sa Dinhaba. ³³ Sa namatay na si Bela, si Zera nga anak ni Jobab ang nahimong hari. Gikan siya sa siyudad sa Bozra. ³⁴ Pagkamatay ni Jobab, si Husham ang nahimong hari. Gikan siya sa rehiyon sa taga-Teman. ³⁵ Pagkamatay ni Husham, si Bedad nga anak ni Hadan ang nahimong hari. Ang kasundalohan ni Husham ang nakig -away sa Midianhon nga anaa sa rehiyon sa Moab ug gibuntog nila. Sa siyudad sa Avit nagpuyo si Husham. ³⁶ Pagkamatay ni Husham, si Samla ang nahimong hari. Gikan siya sa Masreka. ³⁷ Pagkamatay ni Samla, si Shaul ang nahimong hari. Gikan siya sa Rehobot, duol sa suba sa Eufrates. ³⁸ Pagkamatay ni Shaul, si Acbor nga anak ni Baal Hanan ang nahimong hari. ³⁹ Pagkamatay ni Acbor, si Hadad ang nahimong hari. Nagpuyo siya sa siyudad sa Pau. Mehetabel ang ngalan sa iyang asawa. Anak siya ni Matred, nga anak ni Me Zahab. ^{40 41 42 43} Mao kini ang listahan sa tanang pundok sa katawhan nga mga kaliwat ni Esau: Timna, Alva, Jetet, Oholibama, Ela, Pinon, Kenaz, Teman, Mibzar, Magdiel, ug Iram. Nagpuyo sila sa yuta sa Edom. Ang yuta diin nagpuyo ang mga tawo nga adunay samang ngalan sa pundok sa katawhan.