¹ Milabay ang pipila ka adlaw, miingon ang Dios kang Jacob, "Tungas sa siyudad sa Betel ug puyo didto. Pagtukod ug halaran sa pagsimba kanako, ang Dios, nga nagpakita kanimo sa dihang miikyas ka gikan sa imong magulang nga si Esau." ² Busa giingnan ni Jacob ang iyang panimalay ug ang tanan nga kuyog kaniya, "Isalikway ang mga diosdios nga inyong gidala gikan sa yuta sa Mesopotamia. Usab, limpyohi ang inyong kaugalingon, ug pagsul-ob ug hinlo nga mga bisti. ³ Unya mangandam kita ug motungas sa Betel. Magtukod ako didto ug halaran aron sa pagsimba sa Dios. Gitabangan niya ako sa panahon nga nagkalisod-lisod ako ug nahadlok, ug uban siya kanako bisan sa ako." ⁴ Busa gihatag nila kang Jacob ang tanan nga diosdios nga ilang gidala, ug tanan nilang mga ariyos. Gilubong kini ni Jacob sa yuta ilalom sa tugas nga kahoy nga duol sa siyudad sa Siquem. ⁵ Sa nangandam na sila sa ilang pagbiya didto, gihimo sa Dios nga mahadlok ang mga tawo nga nagpuyo sa siyudad libot kanila sa pamilya ni Jacob, busa wala na nila sila gukda. ⁶ Miadto sa Luz si Jacob ug ang tanan nga kuyog kaniya, nga gitawag karon ug Betel, sa yuta sa Canaan. ⁷ Ug naghimo siya ug halaran didto. Ginganlan niya ang dapit ug El Betel, nga nagpasabot "Ang Dios sa Betel," tungod kay didto nagpakita ang Dios kang Jacob sa dihang miikyas siya gikan sa iyang magulang nga si Esau. ⁸ Niining panahona, tigulang na kaayo si Debora, nga nagbantay sa asawa ni Isaac nga si Rebeka samtang gamay pa siya. Namatay siya ug gilubong ilalom sa tugas nga kahoy sa habagatang bahin sa Betel. Busa ginganlan ang maong dapit ug Allon Bacut, nga nagpasabot "ang kahoy sa panaghilak." ⁹ Human mipauli si Jacob ug ang iyang pamilya gikan sa Padan Aram, samtang anaa pa sila sa Betel, mipakita pag-usab ang Dios kang Jacob ug gipanalanginan siya. ¹⁰ Miingon ang Dios kaniya pag-usab, "Dili na Jacob ang imong ngalan. Kondili Israel na." Busa gitawag na siya ug "Israel." ¹¹ Unya miingon ang Dios kaniya, "Ako ang Dios nga gamhanan. Padaghana ang imong mga anak. Ang imong kaliwat mahimong daghang nasod, ug ang uban sa imong mga kaliwat mahimong mga hari. ¹² Ihatag ko kanimo ang yutang saad nga gihatag ko kang Abraham ug kang Isaac. Ihatag ko usab sa imong mga kaliwat." ¹³ Sa dihang nahuman na ang Dios sa pag-istorya kang Jacob didto, mibiya siya kaniya. ¹⁴ Nagpatindog si Jacob og dakong bato sa dapit diin nakig-istorya ang Dios kaniya. Gibuboan niya kini og gamay nga bino ug gamay nga lana sa olibo aron ihalad kini sa Dios. ¹⁵ Ginganlan ni Jacob ang maong dapit og Betel, nga nagpasabot "balay sa Dios," tungod kay didto nakig-istorya ang Dios kaniya. ¹⁶ Mibiya si Jacob ug ang iyang pamilya sa Betel ug miadto sa habagatang bahin nga padulong sa lungsod sa Efrata. Sa dihang layo-layo pa sila sa Efrata, nagbati si Raquel ug naglisod pag-ayo. ¹⁷ Sa dihang sakit na gayud kaayo, miingon ang mananabang kang Raquel, "Ayaw kahadlok, tungod kay manganak ka na usab ug laing lalaki!" ¹⁸ Apan kamatyonon na siya, sa iyang kataposang gininhawa miingon siya, "Nganli siya ug Benoni," nga nagpasabot "anak sa akong kasub-anan," apan ginganlan siya sa iyang amahan og Benjamin, nga nagpasabot "anak nga akong kaabag." ¹⁹ Human mamatay si Raquel, gilubong siya sa daplin sa dalan nga paingon sa Efrata, nga gitawag na karon ug Betlehem. ²⁰ Nagpatindog si Jacob ug dakong bato ibabaw sa iyang lubong, nga naa pa didto hangtod karon, aron makita kung asa gilubong si Raquel. ²¹ Si Jacob, nga ang bag-ong ngalan Israel, nagpadayon sa pagpanaw uban ang iyang pamilya, ug naghimo siya og mga tolda sa habagatang bahin sa bantayanang tore sa Eder. ²² Samtang nagpuyo pa sila nianang dapita, nakigdulog si Ruben nga anak ni Jacob kang Bilha, usa sa mga puyo-puyo sa iyang amahan. Adunay misulti niini kang Jacob, ug nakapasuko kini kaniya pag-ayo. Karon adunay dose ka mga anak nga lalaki si Jacob. ²³ Ang mga anak ni Lea mao si Ruben, nga kamagulangang anak ni Jacob, si Simeon, Levi, Juda, Isacar, ug Zebulon. ²⁴ Ang mga anak ni Raquel mao si Jose ug Benjamin. ²⁵ Ang mga anak ni Bilha nga sulugoon ni Raquel mao sila Dan ug Naftali. ²⁶ Ang mga anak ni Zilpa nga sulugoon ni Lea mao si Gad ug Asher. Mao kadto ang tanan nga mga anak ni Jacob, gawas kang Benjamin, nga natawo samtang nagpuyo pa sila sa Padan Aram. ²⁷ Mibalik si Jacob sa Mamre nga ginganlan usab ug Kiriatarba ug ginganlan na karon og Hebron aron makita ang iyang amahan nga si Isaac. Nakapuyo usab didto ang amahan ni Isaac nga si Abraham. ²⁸ Nabuhi si Isaac hangtod sa 180 ka tuig. ²⁹ Tigulang na siya kaayo sa dihang namatay siya ug gitipon siya sa iyang katigulangan nga unang nangamatay. Gilubong siya ni Esau ug Jacob nga iyang mga anak.