¹ Usa ka adlaw niana si Dina, ang anak nga babaye ni Jacob ug ni Lea, mibisita sa pipila ka mga babaye niana nga lugar. ² Atua usab didto si Siquem nga usa sa mga anak nga lalaki ni Hamor nga kaliwat sa mga Hibitihanon. Sa pagkakita niya kang Dina, gipugos niya ug dala ug gilugos siya. ³ Nakagusto ug nadani siya pag-ayo kang Dina. Nahigugma usab siya kang Dina busa gialam-alaman niya ug istorya ang babaye. ⁴ Busa miingon si Siquem sa iyang amahan nga si Hamor, "Kuhaa kini nga babaye alang kanako. Gusto nako siyang maasawa!" ⁵ Sa dihang nasayran ni Jacob nga gidagit ug gilugos ni Siquem ang iyang anak nga si Dina, anaa pa sa kaumahan ang iyang mga anak nga lalaki uban ang ilang mga mananap, busa wala siya misulti mahitungod niini hangtod nga nakapauli sila sa balay. ⁶ Nianang tungora, ang amahan ni Siquem nga si Hamor miadto kang Jacob ug nakig-istorya. ⁷ Samtang nag-istoryahanay pa sila, miabot ang mga anak nga lalaki ni Jacob, nangakurat sila ug nasuko pag-ayo tungod kay nasayran nila kung unsa ang nahitabo. Miingon sila, "Makauulaw ang gihimo ni Siquem sa Israel sa dihang gilugos niya ang among igsoon, usa ka butang nga dili gayod unta angay niyang buhaton!" ⁸ Apan miingon si Hamor kanila, "Gusto kaayo sa akong anak nga si Siquem ang imong anak nga si Dina ug inyong igsoon. Palihog tugoti siya nga makigminyo kaniya. ⁹ Maghimo kita ug kasabotan: Ihatag ninyo ang inyong mga dalaga sa among mga ulitawo aron mamahimo nilang asawa, ug ihatag namo ang among mga dalaga sa inyong ulitawo aron mamahimo nilang asawa. ¹⁰ Makahimo kamo pagpuyo uban kanamo ug magpuyo bisan asa sa ninyo gusto nga bahin sa among yuta. Makapalit ug makabaligya kamo og mga butang. Kung makakaplag kamo og yuta nga gusto ninyo, makahimo kamo sa pagpalit niini." ¹¹ Unya miingon si Siquem sa amahan ug mga igsoon ni Dina, "Kung nagustohan ninyo ako ug buhaton ang akong gihangyo, ihatag ko bisan unsa ang inyong pangayoon. ¹² Sultihi ako unsa nga mga gasa ug unsa nga bugay ang inyong gusto, ug ihatag ko bisan unsa nga inyong pangayoon. Gusto lang nako nga ihatag ninyo ang babaye aron mamahimo nakong asawa." ¹³ Apan tungod kay nakahimo man si Siquem ug makauulaw nga butang sa ilang igsoon nga si Dina, gilingla sa mga anak nga lalaki ni Jacob si Siquem ug ang iyang amahan nga si Hamor. ¹⁴ Miingon sila kanila, "Dili, dili namo kana mabuhat. Dili namo ihatag ang among igsoon aron mapangasawa sa tawo nga dili tinuli, tungod kay makauulaw alang kanamo ang pagbuhat nianang butanga. ¹⁵ Makahimo lamang kami niana kung buhaton ninyo ang usa ka butang: kinahanglan mahisama kamo kanamo pinaagi sa pagtuli sa tanan nga mga lalaki nga anaa kaninyo. ¹⁶ Unya ihatag namo ang among mga anak nga babaye sa inyong mga ulitawo aron mamahimong mga asawa ug kuhaon namo ang inyong mga anak nga babaye aron mamahimong mga asawa sa sa among mga ulitawo. Magpuyo kami uban kaninyo, ug mamahimo kitang usa ka pundok sa katawhan. ¹⁷ Apan kung dili kamo mosugot nga matuli, kuhaon namo ang among igsoon ug mobiya." ¹⁸ Nakapahimuot kaayo kang Hamor ug sa iyang anak nga si Siquem ang ilang gisulti. ¹⁹ Gusto kaayo ni Siquem nga madala ang anak nga babaye ni Jacob aron mahimo nga iyang asawa; ug tungod kay labing tinahod man siya sa pamilya sa iyang amahan, miuyon dayon siya sa ilang gisugyot. ²⁰ Miadto si Siquem ug si Hamor sa dapit nga tigomanan sa ganghaan sa siyudad ug nakig-istorya sa mga pangulo sa siyudad. Miingon sila, ²¹ "Mahigalaon kining mga tawhana kanato. Kinahanglan tugotan nato sila sa pagpuyo dinhi ug mobiyahe bisan asa. Dako ra kaayo ang yuta ug igo nga makasuporta sa ilaha ug sa atoa. Ang atong mga ulitawo makaminyo sa ilang mga anak nga mga babaye, ug ang ilang mga ulitawo makaminyo sa atong mga anak nga mga babaye. ²² Apan kining mga lalaki mouyon lamang nga magpuyo uban kanato ug mahimong usa ka pundok sa katawhan uban kanato kung kitang tanan nga mga lalaki magpatuli, sama kanila. ²³ Apan kung buhaton nato kana, hunahunaa! Ang ilang mga baka, ang ilang mga kabtangan, ug ang tanan nilang mga mananap maatoa! Busa kinahanglan mouyon kita sa ilang giingon, ug unya mopuyo sila uban kanato!" ²⁴ Miuyon ang tanan nga mga lalaki nga anaa sa ganghaan sa siyudad sa giingon ni Hamor ug Siquem. Nagpatuli ang tanan nga mga lalaki nga anaa sa siyudad. ²⁵ Sa ikatulo ka adlaw human niana, sa dihang ang mga lalaki sa siyudad nag-antos pa sa ilang samad, ang duha ka anak nga lalaki ni Jacob, si Simeon ug Levi, mikuha sa ilang mga espada ug misulod sa siyudad nga walay nakamatikod kanila, ug gipamatay nila ang tanan nga mga lalaki. ²⁶ Gipatay nila bisan si Hamor ug ang iyang anak nga si Siquem. Unya gikuha nila si Dina sa balay ni Siquem ug mibiya sa siyudad. ²⁷ Unya ang ubang mga anak nga lalaki ni Jacob miadto sa siyudad kung asa ang mga patay nga lawas. Gikawatan nila ang siyudad sa pagpanimalos alang sa makauulaw nga butang nga gibuhat ngadto sa ilang igsoon. ²⁸ Gikuha nila ang mga karnero ug mga kanding sa mga tawo, ang ilang mga baka, ang ilang mga asno, ug ang tanan nga gusto nila sulod sa siyudad ug sa kaumahan. ²⁹ Gikuha nila ang tanang butang nga bililhon, bisan ang mga bata ug mga babaye. Gibihag nila ug gidala ang tanang butang nga anaa sa sulod sa mga balay. ³⁰ Unya miingon si Jacob kang Simeon ug kang Levi, "Nagdala kamo ug dakong kagubot kanako! Karon ang mga pundok sa mga tawo sa Canaan, ug ang mga Perisihanon, ug ang matag-usa nga nagpuyo niining nga yutaa magdumot kanako! Wala kitay igong mga tawo aron makig-away alang kanato, busa kung maghiusa sila ug moanhi kanako ug mosulong kanato, mangamatay kita ug ang tanan sa atong panimalay!" ³¹ Apan mitubag sila, "Unya tugotan lang ba nato nga tratohon ni Siquem ang among igsoon sama sa usa ka babaye nga tigbaligya ug dungog?"