¹ Unya gitapok ni Jacob ang tanan niyang pamilya. Sa pagkataodtaod nianang adlawa nakita niya si Esau nga nagpadulong, ug adunay 400 nga mga kalalakin-an nga uban kaniya. Tungod niana nabalaka pag-ayo si Jacob, busa gilahi niya ang mga bata. Iyang gipauban kang Lea ang mga anak ni Lea, uban kang Raquel ang anak ni Raquel ug ang anak sa duha ka ulipon nga mga babaye gipauban sa ilang mga inahan. ² Iyang gipauna ang duha ka ulipon nga babaye uban sa ilang mga anak. Gisunod si Lea uban sa iyang mga anak. Ug iyang gibutang si Raquel ug Jose sa kinaulahian. ³ Nag-una siya kanilang tanan, ug mihapa siya sa yuta sa makapito ka higayon sa pagtagbo niya sa iyang magulang. ⁴ Apan midagan si Esau padulong kang Jacob. Gigakos niya siya, ug gihagkan siya sa aping. Ug naghinilakay sila. ⁵ Unya mihangad si Esau ug nakita ang mga babaye ug ang mga bata. Nangutana siya, "Si kinsa man kining mga tawo nga uban kanimo?" Mitubag si Jacob, "Mao kini ang mga asawa ug mga anak nga maluloy-ong gihatag sa Dios kanako." ⁶ Unya miduol ug miluhod ang mga ulipon nga mga babaye ug ang ilang mga anak sa atubangan ni Esau. ⁷ Unya miluhod si Lea ug ang iyang mga anak. Sa kataposan miduol ug miluhod si Jacob ug si Raquel. ⁸ Nangutana si Esau, "Unsa man ang buot ipasabot sa tanang mga mananap nga akong natagboan?" Mitubag si Jacob, "Sir, kadtong tanan akong ihatag kanimo, aron nga maulian na ang imong pagbati nganhi kanako." ⁹ Apan mitubag si Esau, "Igsoon ko, daghan na akog mga mananap! Imo na lamang kanang mga hayop nga anaa kanimo!" ¹⁰ Apan miingon si Jacob, "Dili, palihog lang, kung maayo na ang imong pagbati nganhi kanako, dawata kining akong mga gasa." Giabi-abi mo ako pag-ayo. Ang imong pagpahiyom kanako nagpasiguro nga imo na akong gipasaylo. Sama kini nga ako nakakita sa panagway sa Dios! ¹¹ Busa dawata intawon kining mga gasa nga akong gidala alang kanimo, tungod kay maayo ang Dios kanako, ug aduna pa akoy daghang mga mananap!" Nagpadayon si Jacob sa pagdani kaniya nga dawaton ang mga mananap, ug sa kataposan gidawat ra gayod kini ni Esau. ¹² Unya miingon si Esau, "Magpadayon ug magdungan na kita sa pagpanaw ug akoy maggiya kaninyo sa dalan." ¹³ Miingon si Jacob, "Sir, nasayod ka nga luya pa ang mga bata, ug kinahanglan nga atimanon pa nako ang mga anakan nga mga karnero ug mga baka nga nagtotoy pa sa gatas sa ilang inahan. Kung pugson nako sila sa pagpalakaw ug paspas sa layo bisan sa usa lamang ka adlaw, mangamatay ang tanang mga mananap. ¹⁴ Una lamang kamo kanako. Hinayhinayon lamang nako paggiya ang mga mananap, apan mag-agad lamang ako sa kapaspason sa lakaw sa mga bata ug mga mananap. Moapas lang ako kanimo didto sa Seir. ¹⁵ Miingon si Esau, "Tugoti nga magbilin ako ug pipila ka mga tawo nga uban kanako, aron sa pagpanalipod kanimo." Apan mitubag si Jacob, "Nganong buhaton mo man kana? Ang gusto ko lamang mao nga maulian na ang imong pagbati nganhi kanako." ¹⁶ Busa mibiya si Esau nianang adlawa aron sa pagbalik sa Seir. ¹⁷ Apan imbis nga moadto sa Seir, miadto hinuon si Jacob ug ang iyang pamilya sa dapit nga ginganlan ug Sucot. Ug didto nagtukod siya sa iyang balay ug kapasilongan sa iyang mga hayop. Mao kana ang hinungdan nga gitawag nila kini ug Sucot, nga sa ato pa "kapasilongan." ¹⁸ Ingon niini ang pagbiya ni Jacob ug sa iyang pamilya sa Padan Aram ug nagpanaw nga wala gayoy daotan nga nahitabo abot sa Canaan. Gitukod nila ang ilang mga tolda didto sa uma duol sa siyudad sa Siquem. ¹⁹ Usa sa mga pangulo sa mga katawhan nianang dapita ang ginganlag Hamor. Si Hamor adunay pipila ka mga anak nga lalaki. Gibayaran ni Jacob ug 100 ka plata ang mga anak ni Hamor alang sa dapit nga natukoran nila sa ilang tolda. ²⁰ Nagbuhat siya didto ug halaran nga bato ug ginganlan kini ug "El Elohe Israel, nga sa ato pa "Dios, ang Dios sa Israel."