¹ Samtang nagpadayon sa pagpanaw si Jacob ug ang iyang pamilya, mitagbo kaniya ang pipila ka mga anghel gikan sa Dios. ² Sa pagkakita ni Jacob kanila, miingon siya, "Mao kini ang kampo sa mga sundalo sa Dios!" Busa ginganlan niya kadto nga dapit og Mahanaim. ³ Gisugo ni Jacob ang pipila ka mga tawo nga mouna kaniya ngadto kang Esau nga iyang magulang, nga nagpuyo sa Seir, nga mao ang yuta sa Edumea. ⁴ Misulti siya kanila, "Mao kini ang akong gusto nga inyong isulti kang Esau: 'Ako si Jacob, nga imong sulugoon ug ikaw ang akong agalon. Nagpuyo ako sa atong uyoan nga si Laban hangtod karon. ⁵ Karon nanag-iya na ako ug mga baka, mga asno, mga karnero, mga kanding, ug mga sulugoon nga lalaki ug babaye. Karon sir, gipadala ko kini nga mensahe kanimo, nanghinaot nga magmahigalaon ka kanako sa akong pag-abot.''' ⁶ Miadto ang mga mensahero ug gisulti kini ngadto kang Esau. Sa ilang pagbalik kang Jacob, miingon sila, "Nangadto kami sa imong igsoon nga si Esau. Padulong na siya kanimo, ug kuyog kaniya ang 400 ka mga kalalakin-an." ⁷ Nabalaka ug nahadlok pag-ayo si Jacob. Busa iyang gibahin ang mga tawo nga iyang kauban sa duha ka pundok. Gibahin usab niya lakip ang karnero ug mga kanding, ang mga baka, ug ang mga kamelyo sa duha ka pundok. ⁸ Kay naghunahuna siya, "Kung si Esau ug ang iyang mga kauban mosugat ug moataki kanato, usa sa mga pundok mahibilin ug makaikyas pa." ⁹ Unya nag-ampo si Jacob, "O Yahweh nga Dios, nga gisimba sa akong apohan nga si Abraham ug sa akong amahan nga si Isaac, miingon ka kanako, 'Balik sa imong kaugalingon nga yuta ug sa imong mga paryente, ug maghimo ako ug mga maayong butang nganha kanimo.' ¹⁰ Dili ako takos nga angay mong tumanon ang imong kasabotan sa matinud-anon ug masaligan nga mga pamaagi nganhi kanako, nga imong alagad. Aduna lamang akoy sungkod sa dihang mitabok ako sa Suba sa Jordan sa akong pagpadulong sa Haran, apan karon adunahan na kaayo ako nga adunay nay duha ka dakong pundok sa akong pamilya ug mga gipanag-iyahan. ¹¹ Busa nag-ampo ako karon nga imo akong luwason gikan sa gahom sa akong igsoon nga si Esau, tungod kay nahadlok ako nga moanhi siya ug ang iyang mga kalalakin-an aron atakihon ug patyon ako lakip ang mga bata ug ang ilang mga inahan. ¹² Apan ayaw kalimti nga miingon ka, 'Himoon ko gayod ikaw nga magmauswagon ug padaghanon ko ang imong mga kaliwatan sama kadaghan sa balas sa baybayon, ug walay makaihap kanila tungod sa ilang kadaghanon."' ¹³ Nianang gabhiona, didto ra nga dapit natulog si Jacob. Sa pagkabuntag niana nagpili siya og pipila ka mga mananap aron ihatag niya ngadto sa iyang igsoon nga si Esau. ¹⁴ Nagpili siya ug 200 ka mga baye ug 20 ka mga laki nga kanding, 200 ka mga baye ug 20 ka mga laki nga karneno, ¹⁵ 30 ka mga baye nga kamelyo ug ilang mga anak, 40 ka mga baka ug napulo ka mga turo, 20 ka mga baye ug napulo ka mga laki nga asno. ¹⁶ Gibahin niya sila sa gagmay nga panon, ug gipaatimanan ang matag panon sa usa sa iyang mga sulugoon. Miingon siya sa iyang mga sulugoon, "Pag-una kamo kanako, usa ka panon sa matag higayon, ug hatagig gilay-on ang matag panon." ¹⁷ Miingon siya sa sulugoon nga nag-uban sa unang panon, "Sa dihang matagboan ka sa akong igsoon nga si Esau, unya mangutana siya kanimo, 'Kang kinsa man ka nahisakop, asa ka man padulong, ug kang kinsa man nahisakop kining mga mananap sa imong atubangan?' ¹⁸ Tubaga siya, 'Nahisakop sila sa imong sulugoon nga si Jacob sir. Ug gipadala niya kining mga mananap ingon nga gasa alang kanimo. Ug nagsunod siya kanamo."' ¹⁹ Miingon usab siya sa samang mga pulong sa mga sulugoon nga nag-atiman sa ikaduha ug ikatulo nga panon, ug sa uban nga nagbantay sa mga panon. Miingon siya kanila, "Kung matagboan kamo ni Esau, gusto nako nga inyong isulti kaniya ang sama ra nga pulong nga akong gisulti sa unang sulugoon. ²⁰ Siguradoha gayod ang pagsulti nga 'Ang imong sulugoon nga si Jacob nagsunod na kanamo."' Gisulti kadto ni Jacob kanila kay naghunahuna siya nga tungod kay naghunahuna siya nga, "Tingali mahimoot siya kanako tungod niining mga gasa nga akong gipadala una kanako. Ug unya, sa among pagkita, ayohon niya ako pagtagad." ²¹ Busa nag-una ang mga sulugoon nga nag-atiman sa mga gasa, apan nagpabilin si Jacob sa kampo nianang gabhiona. ²² Unya sa pagkagabii, mibangon si Jacob. Gikuha niya ang iyang duha ka asawa, duha ka mga sulugoon, ug ang napulog usa niya ka mga anak, ug gipatabok niya sila ngadto sa tabokanan sa Suba sa Jabok. ²³ Ingon niini nga paagi nga gipalakaw niya ang tanang mga tawo ug ang tanan nga iyang mga gipanag-iyahan ngadto sa tabok sa suba. ²⁴ Busa nagpabilin si Jacob didto nga nag-inusara. Apan miabot ang usa ka tawo ug nakiglayog kaniya hangtod sa kaadlawon. ²⁵ Sa pagkaamgo sa tawo nga dili niya mapildi si Jacob, gisumbag niya ang dapidapi ni Jacob hinungdan nga nalisa ang bukog sa dapidapi. ²⁶ Unya miingon ang tawo, "Buhii na ako, kay hapit na mohayag." Mitubag si Jacob, "Dili ko ikaw buhian, kung dili ko nimo panalanginan!" ²⁷ Miingon ang tawo kaniya, "Unsa man ang imong ngalan?" ²⁸ Mitubag siya, "Jacob". Miingon ang tawo, "Dili na Jacob ang imong ngalan. Ang imong ngalan Israel na, nga nagpasabot 'nakigbugno ka sa Dios,' tungod kay nakigbugno ka man sa Dios ug sa mga tawo, ug midaog ka." ²⁹ Nangutana si Jacob, "Palihog sultihi ako karon sa imong ngalan?" Mitubag ang tawo, "Nganong nangutana ka man kung unsa ang akong ngalan?" Apan gipanalanginan niya si Jacob didto. ³⁰ Busa gitawag ni Jacob ang dapit ug Peniel, nga nagpasabot ''dagway sa Dios,'' nga nag-ingon, "Nakita ko gayod ang nawong sa Dios, apan wala ako mamatay sa pagbuhat niana." ³¹ Ningsubang na ang adlaw sa pagbiya ni Jacob sa Peniel, ug nagtakiang na siya tungod sa nahitabo sa iyang dapidapi. ³² Nabalda ang unod sa luta-lutahan sa iyang dapidapi. Busa hangtod karon nga panahon, tungod sa nahitabo kang Jacob, ang mga Israelita dili na mokaon sa dapidapi nga bahin sa mga mananap.