¹ Usa ka adlaw niana, adunay usa ka tawo nga misulti kang Jacob nga ang mga anak nga lalaki ni Laban nagbagulbol ug miingon, "Si Jacob nahimong adunahan pag-ayo tungod sa pagkuha sa tanan nga gipanag-iyahan sa atong amahan." ² Nakamatikod si Jacob nga si Laban dili na mahigalaon ngadto kaniya dili sama sa iyang ginabuhat kaniadto. ³ Unya giingnan ni Yahweh si Jacob, "Balik sa imong nasod ug sa imong mga paryente, ug tabangan ko ikaw didto." ⁴ Busa nagpadala ug mensahe si Jacob ngadto kang Raquel ug kang Lea nga moadto sila didto sa sibsibanan sa panon sa iyang mga karnero ug kanding. ⁵ Sa dihang miabot na sila, miingon siya kanila, "Namatikdan nako nga dili na maayo ang tinagdan sa inyong amahan nganhi kanako dili sama sa iyang ginabuhat kaniadto. Apan gitabangan ko sa Dios nga gisimba sa akong amahan. ⁶ Nasayod kamong duha nga naghago ako pag-ayo alang sa inyong amahan, ⁷ apan sa gitikasan niya ako sa makadaghan nga higayon pinaagi sa pagkunhod sa akong sweldo. Apan wala siya gitugotan sa Dios nga pasakitan ako. ⁸ Sa dihang miingon si Laban, 'Ang mga kabang nga mananap mao lang ang akong ihatag kanimo isip imong sweldo,' ang tanang mananap nanganak ug mga kabang. Sa dihang nausab ang iyang huna-huna ug miingon, 'Ang mananap nga adunay itom ug puti nga badlis diha kanila ang mahimo nimong sweldo,' ang tanang mananap nanganak og adunay badlis-badlis. ⁹ Ingon niana nga paagi, gikuha sa Dios ang mga mananap nga gipanag-iyahan sa inyong amahan ug gihatag sila nganhi kanako. ¹⁰ Usa ka higayon niana, sa panahon sa tingsanay sa mga mananap, nagdamgo ako. Sa akong damgo nagtan-aw ako ug natingala sa akong nakita nga pipila sa mga laking kanding ming-upa sa bayeng kanding nga adunay itom ug puti nga badlis-badlis, pipila ka mga kabang, ug pipila ka mga puntik-puntikon. ¹¹ Sa maong damgo, miingon kanako ang usa ka anghel nga gikan sa Dios, 'Jacob!' mitubag ako, 'Ania ako!' ¹² Miingon siya kanako, 'Tan-awa ug makita nimo nga ang tanang mga laking kanding nga ming-upa sa kanding adunay itom ug puti nga badlis, o mga kabang o puntik-puntikon. Nahitabo kini tungod kay nakita nako ang tanan nga gihimo ni Laban kanimo. ¹³ Ako ang Dios nga mipakita kanimo didto sa Betel, diin nag-ugbok ka ug usa ka bato, gibuboan mo kini ug lana ug mihimo ka og pakigsaad nganhi kanako. Busa karon biyai dayon kining yutaa ug balik ngadto sa yuta nga imong natawhan.''' ¹⁴ Mitubag si Raquel ug si Lea kaniya, "Dili gayod mohatag ang among amahan kanamo ug bisan unsa sa dihang siya mamatay. ¹⁵ Gitagad niya kami nga daw mga langyaw! Ang imong gitrabaho hangtod niining tuiga mao ang imong gibayad kaniya alang kanamo, apan dili nato mapanunod ang bisan unsang katigayonan nga imong gipadaghan alang kaniya. Gigasto niya kining tanan! ¹⁶ Sa pagkatinuod ang tanan nga bahandi nga gikuha sa Dios gikan sa among amahan amoa ug sa among mga anak. Busa buhata ang bisan unsa nga gisulti sa Dios nga imong buhaton!" ¹⁷ Unya gipasakay ni Jacob ang iyang mga anak ug iyang mga asawa sa mga kamelyo. ¹⁸ Gigiyahan niya ang tanan niyang mga mananap una kaniya sa ilang pagpanaw. Gidala usab niya ang uban nga iyang gipanag-iyahan ug mga kabtangan nga nadugang sa tanan niyang katigayonan samtang nagpuyo pa siya sa Padan Aram. Mao kini ang pagsugod sa ilang pagpanaw balik sa iyang amahan nga si Isaac, nga nagpuyo sa yuta sa Canaan. ¹⁹ Sa dihang mibiya si Laban aron sa pagpanupi sa iyang karnero. Kay wala man siya didto, gikawat ni Raquel ang mga gagmay nga diosdios nga kahoy nga anaa sa tolda sa iyang amahan. ²⁰ Dugang pa niana, gilimbongan ni Jacob si Laban nga Arameanhon tungod kay wala siya misulti nga aduna silay plano nga mobiya. ²¹ Busa si Jacob ug ang iyang pamilya mikalagiw nga dala ang ilang mga katigayonan. Milatas sila sa Suba sa Eufrates ug mipanaw sa habagatang bahin paingon sa kabungtoran sa rehiyon sa Gilead. ²² Sa ikatulo ka adlaw sukad sa ilang pagbiya, adunay tawo nga misugilon kang Laban nga si Jacob ug ang iyang pamilya wala na. ²³ Busa gidala niya ang pipila sa iyang mga paryente aron gukoron si Jacob. Mipanaw sila ug pito ka adlaw. ²⁴ Unya sa pagkagabii nagpakita ang Dios kang Laban pinaagi sa usa ka damgo. Miingon siya kaniya, "Kung maapsan nimo si Jacob, pag-amping gayod sa imong isulti kaniya." ²⁵ Sa pagkasunod adlaw, sa dihang naapsan na ni Laban si Jacob, mao usab ang higayon nga nagtaod sila sa ilang mga tolda uban ang iyang panimalay didto sa bungtod sa Gilead. Busa nagtaod usab si Laban ug ang iyang mga paryente sa ilang mga tolda didto. ²⁶ Unya miadto si Laban kang Jacob ug miingon kaniya, "Nganong gibuhat man nimo kini? Gilimbongan nimo ako pinaagi sa pagdala sa akong mga anak nga babaye nga daw sila imong dinakpan sa pakiggubat! ²⁷ Nganong milayas ka man ug gilimbongan ako? Nganong wala man nimo ako sultihi nga manglakaw diay kamo, aron maglipay unta kami ug mag-awit samtang ang mga tawo nagtugtog sa mga tamborin ug alpa sa dili pa ako makapanamilit kaninyo? ²⁸ Wala man lang nimo ako gipahalok sa akong mga apo ug sa akong mga anak nga babaye sa wala pa sila mibiya! Binuang kining imong gibuhat! ²⁹ Ako ug ang akong mga paryente adunay gahom sa pagpasakit kaninyo, apan sa ming-aging gabii giingnan ako sa Dios nga gisimba sa imong amahan pinaagi sa usa ka damgo, 'Pag-amping pag-ayo sa imong isulti kang Jacob.' ³⁰ Karon akong nasayran nga milakaw ka tungod kay buot ka mobalik sa imong panimalay. Apan nganong gikawat man nimo ang akong mga diosdios?" ³¹ Mitubag si Jacob kang Laban, "Wala ko ikaw gisultihan nga nagplano kami sa pagpanaw, tungod kay nahadlok ako nga pugson nimo pagkuha ang imong mga anak gikan kanako. ³² Apan kung aduna kay makit-an dinhi nga anaa kaniya ang imong diosdios, pagapatyon namo kanang tawhana. Samtang magtan-aw ang atong mga paryente, pangitaa ninyo kung aduna bay bisan unsa nga inyohang gipanag-iyahan ang anaa dinhi kanako. Kung makakita kamo sa bisan unsa, kuhaa ninyo kini!" Sa pag-ingon ni Jacob niana, wala siya masayod nga si Raquel diay ang nagkawat sa mga diosdios sa iyang amahan. ³³ Unya misulod si Laban sa tolda ni Jacob, unya sunod ngadto sa tolda ni Lea, ug unya ngadto sa tolda sa duha ka mga sulugoong babaye ug gipangita ang mga diosdios, apan wala niya kini makit-i. Human siya mibiya sa ilang mga tolda, misulod siya sa tolda ni Raquel. ³⁴ Apan gikuha nang daan ni Raquel ang mga diosdios ug gibutang kini sa usa ka sakang sa kamelyo, ug gilingkoran niya ang sakang. Busa sa pag-utingkay ni Laban sa tibuok tolda ni Raquel, wala niya kini hikaplagi. ³⁵ Miingon si Raquel sa iyang amahan, "Sir, ayaw kasuko kanako, kay dili ako makatindog sa imong atubangan aron sa pagpakitag pagtahod kanimo, tungod kay giregla ako." Busa bisan nga gipangita na pag-ayo ni Laban ang iyang mga diosdios, wala niya kini hikaplagi. ³⁶ Unya nasuko si Jacob. Miingon siya kang Laban, "Unsa man nga sala ang akong nabuhat nga gigukod mo man ako? ³⁷ Karon gisusi na nimo ang tanan nakong kabtangan, ug wala kay nakita nga imoha! Kung aduna kay nakit-an nga bisan unsa, ibutang kini dinhi sa atubangan sa akong mga paryente ug sa imong mga paryente, aron makahukom sila kung kinsa ang husto, ikaw ba o ako! ³⁸ Nakig-uban ako kanimo sulod sa 20 ka tuig. Nianang panahona, wala nakuhai sa ilang pagburos ang imong karnero ug mga kanding. Wala ako nag-ihaw ug nagkaon sa bisan unsang karnero nga laki sa imong mga mananap. ³⁹ Kung ang usa sa imong mga mananap gisulong ug gidagmalan sa usa ka halas nga mananap, wala ko na kini dad-a nganha kanimo. Giilisan ko ang patay nga mananap ug usa ka buhi nga gikan sa akong kaugalingong mga mananap. Kung kawaton ang usa sa imong mga mananap, sa adlaw man o sa panahon sa gakabhion, mobungat ka kanako nga akong kadtong pulihan gikan sa akong kaugalingong mga mananap. ⁴⁰ Nag-antos ako sa kainit sa adlaw ug sa katugnaw sa kagabhion. Kanunay ako nga halos walay tulog! ⁴¹ Nagpuyo ako sa imong panimalay sulod sa 20 ka tuig. Nagtrabaho ako kanimo sa napulog upat ka tuig aron sa pagpangasawa sa imong duha ka mga anak nga babaye, ug laing unom ka tuig aron pagpalit sa pipila sa imong mga karnero ug mga kanding. Sulod nianang panahona, gipaubsan ug ginausab-usab nimo ang akong sweldo sa napulo ka higayon. ⁴² Kung wala pa miuban ug mitabang kanako ang Dios nga gisimba sa akong apohan nga si Abraham ug nga gikahadlokan sa akong amahan nga si Isaac kaniadto, tingali gipalayas mo na ako nga walay dala! Apan nakita sa Dios nga nag-antos ako pag-ayo ug naghago sa akong pagtrabaho, busa kagabii gisultihan ka niya nga sayop ang imong gihimo kanako." ⁴³ Mitubag si Laban, "Kining duha ka babaye akong mga anak, ug ang ilang mga anak akong mga apo, ug ang mga mananap akong mga mananap. Tanan nga imong nakita dinhi akoa! ⁴⁴ Wala na akoy mahimo aron sa pagkuha kanila, busa kinahanglan nga magbuhat kita ug kasabotan sa kalinaw. Mahimo kining usa ka saksi tali kanimo ug kanako." ⁴⁵ Busa mikuha si Jacob ug usa ka dakong bato ug giugbok niya kini. ⁴⁶ Unya miingon si Jacob sa iyang mga paryente, "Pagtigom ug pipila ka mga bato." Busa nagtigom sila ug pipila ka mga bato ug gitapok nila kini, ug nangaon sila didto duol sa gitapokan. ⁴⁷ Ginganlan ni Laban sa Aramaic ang batong tinapok ug Jegar Saha Dutha, apan ginganlan ni Jacob ang batong tinapok sa Hebreo nga Galeed. ⁴⁸ Miingon si Laban kang Jacob, "Kini nga mga gipatong-patong nga bato nga gibutang nato diri karong adlawa motabang kanato sa paghinumdom sa atong kasabotan." Mao nga gitawag kini ni Jacob nga Galeed. ⁴⁹ Ginganlan usab ang dapit ug Mizpa, nga kung paminawon daw pulong nga Hebreo nga nagpasabot "Nagabantay nga tore," tungod kay nag-ingon si Laban, "Hangyoon nato si Yahweh sa pagbantay kanimo ug kanako samtang layo kita sa usag usa, aron dili kita makabuhat ug daotan sa usag usa. ⁵⁰ Kung dili nimo ayohon pagtagad ang akong mga anak nga babaye, o kung mangasawa ka man ug laing babaye, bisan kung walay mosulti kanako bahin niini, ayaw kalimot nga ang Dios nakakita sa atong mga binuhatan!" ⁵¹ Miingon usab si Laban kang Jacob, "Nakita nimo kining dakong bato ug kining mga gipatong-patong nga bato nga atong gipahimutang tali kanato. ⁵² Kining mga gipatong-patong nga bato ug kining dakong bato ang magpahinumdom kanato, nga dili ko molapas niining mga batoha aron paghimo ug daotan kanimo, ug dili ka molapas niining mga batoha aron pagbuhat ug daotan kanako. Hangyoon nato ang Dios nga gisimba ni Abraham ug sa akong amahan nga si Nahor aron nga silotan ang usa kanato, kung magbuhat kita ug daotan sa usag usa." ⁵³ Busa misaad si Jacob nga buhaton kung unsa ang gisulti nila sa ilang kasabotan sa kalinaw. Ug naghangyo siya sa Dios, nga gikahadlokan ni Isaac, sa pagpaminaw sa ilang gisaad. ⁵⁴ Naghalad siya sa Dios didto sa bungtod, ug gidapit niya ang iyang mga paryente sa pagkaon kauban niya. Human sa ilang pagpangaon, nangatulog sila didto nianang gabhiona. ⁵⁵ Sa pagkabuntag na gihagkan ni Laban ang iyang mga apo ug ang iyang mga anak nga babaye, ug naghangyo siya sa Dios nga panalanginan sila. Unya siya ug ang iyang mga kauban milakaw ug mibalik sa ilang panimalay.