¹ Nakaamgo si Raquel nga dili na gayod siya magmabdos pa. Busa nasina siya sa iyang magulang nga si Lea, tungod kay si Lea nakaanak na man ug upat ka mga batang lalaki. Miingon siya kang Jacob, "Himoa ako nga magmabdos aron nga makabaton ako ug mga anak. Kung dili nimo kana buhaton, mamatay gayod ako!" ² Nasuko si Jacob kang Raquel ug miingon, "Dili ako Dios! Siya mao ang nagpugong kanimo nga dili ka mamabdos!" ³ Unya siya miingon, "Tan-awa, ania ang akong ulipon nga si Bilha. Pakigdulog kaniya aron nga makabaton siya ug mga anak alang kanako. Sa ingon niana nga paagi makabaton ako ug mga anak." ⁴ Busa gihatag niya kaniya ang iyang ulipon nga si Bilha, aron mahimo usab niya nga asawa, ug si Jacob nakigdulog kaniya. ⁵ Nagmabdos siya ug gipanganak niya ang anak ni Jacob nga lalaki. ⁶ Miingon si Raquel, "Gihatag kanako sa Dios ang kaangayan. Gidungog niya ang akong pag-ampo kaniya, ug ang iyang kaangayan mao ang paghatag kanako ug anak nga lalaki." Ginganlan niya siya ug Dan, nga sama sa Hebreohanong pulong nga nagpasabot, "gihatagan niya ako ug kaangayan." ⁷ Sa wala madugay, namabdos pag-usab si Bilha ug nanganak ug laing batang lalaki alang kang Jacob. ⁸ Unya miingon si Raquel, "Nakigbisog ako nga makaanak sama sa akong magulang nga babaye, apan sa pagkatinuod aduna na akoy anak nga lalaki." Busa ginganlan niya siya ug Nephtali, nga nga sama sa Hebreohanong pulong nga nagpasabot "nakigbisog." ⁹ Sa nakaamgo na si Lea nga dili na siya makaanak pa, gikuha niya ang iyang ulipon, nga si Zilpa, ug gihatag niya kang Jacob aron mahimo niya nga asawa. ¹⁰ Sa wala madugay namabdos si Zilpa ug nanganak ug batang lalaki alang kang Jacob. ¹¹ Miingon si Lea, "Palaran gayod ako!" Busa ginganlan niya kini ug Gad, nga nagpasabot "palaran." ¹² Sa wala madugay ang ulipon ni Lea nga si Zilpa, nanganak ug laing batang lalaki alang kang Jacob. ¹³ Si Lea miingon, "Ug karon malipayon kaayo ako, ug ang mga tawo magatawag kanako nga malipayon." Ug ginganlan niya siya ug Aser, nga nagpasabot "malipayon." ¹⁴ Sa panahon na sa ting-ani ug trigo, miadto si Ruben sa kaumahan ug nakakita siya ug pipila ka mga mandragora. Gidala niya ang pipila niini ngadto sa iyang inahan nga si Lea. Apan sa pagkakita ni Raquel niini miingon siya ngadto kang Lea, "Palihog hatagi ako ug pipila niadtong tanom nga gidala sa imong anak nga lalaki nganha kanimo!" ¹⁵ Apan miingon si Lea ngadto kaniya, "Dili! Dili maayo nga gikuha nimo ang akong bana! Ug karon kuhaon na usab nimo ang mandragora nga tanom nga gidala sa akong anak?" Busa miingon si Raquel, "Sige, si Jacob makadulog kanimo karong gabhiona, kung hatagan mo ako ug pipila ka tanom nga mandragora." Busa misugot si Lea sa gihangyo ni Raquel. ¹⁶ Sa pagpauli ni Jacob gikan sa iyang uma nianang gabhiona, misugat si Lea kaniya. Miingon siya, "Kinahanglan nga makigdulog ka kanako karong gabhiona, tungod kay gibayad ko kang Raquel ang pipila ka mandragora nga tanom aron sa pagtugot kanato sa pagbuhat niana." Busa nakigdulog si Jacob kaniya nianang gabhiona. ¹⁷ Gitubag sa Dios ang mga pag-ampo ni Lea, ug namabdos siya ug nanganak sa ikalima nga batang lalaki alang kang Jacob. ¹⁸ Miingon si Lea, "Gigantihan ako sa Dios tungod sa paghatag ko sa akong ulipon ngadto sa akong bana aron mahimo niyang laing asawa." Busa ginganlan niya siya ug Isacar, nga sama sa Hebreohanong pulong nga nagpasabot "ganti." ¹⁹ Namabdos pag-usab si Lea ug nanganak sa ikaunom nga batang lalaki alang kang Jacob. ²⁰ Miingon si Lea, "Gihatag sa Dios kanako ang usa ka bililhon nga gasa. Kining higayona pasidunggan na ako sa akong bana, tungod kay nakaanak na man ako ug unom ka batang lalaki alang kaniya." Busa ginganlan niya siya ug Zebulun. ²¹ Sa wala madugay nanganak siya ug batang babaye ug ginganlan niya siya ug Dina. ²² Unya naghunahuna ang Dios kung unsa ang gusto ni Raquel. Gidungog niya ang iyang mga pag-ampo ug namabdos siya. ²³ Namabdos siya ug nanganak ug batang lalaki. Miingon siya, "Ang Dios nagkuha sa akong kaulawan sa dili pagbaton ug mga anak." ²⁴ Ginganlan niya siya ug Jose, nga sama sa Hebreohanong pulong nga nagpasabot, "Si Yahweh naghatag kanako ug lain pang anak nga lalaki." ²⁵ Human gianak ni Raquel si Jose, miingon si Jacob kang Laban, "Karon tugoti ako sa paghunong na sa pag-alagad kanimo ug tugoti ako sa pagbalik ngadto sa akong kaugalingong yuta. ²⁶ Nasayod ka sa buluhaton nga akong nabuhat diha kanimo. Busa tugoti ako nga dad-on ang akong mga asawa ug akong mga anak nga akong gialagaran alang kanimo, ug palakwa kami." ²⁷ Apan miingon si Laban ngadto kaniya, "Kung nakapahimuot pa ako kanimo, pabilin dinhi, tungod kay nahibal-an nako pinaagi sa panagna nga gipanalanginan ako ni Yahweh tungod sa imong gibuhat alang kanako. ²⁸ Sultihi ako kung unsa ang gusto mong ibayad ko kanimo aron nga mopadayon ka sa pag-alagad kanako, ug mao kana ang akong igabayad kanimo." ²⁹ Miingon si Jacob kaniya, "Nasayod ka kung giunsa nako apg-alagad alang kanimo, ug nasayod ka usab nga midaghan pag-ayo ang imong kahayopan tungod kay giatiman ko man sila. ³⁰ Diyutay lamang ang imong kahayopan sa wala pa ako miabot dinhi. Apan karon midaghan na pag-ayo ang imong kahayopan, si Yahweh maoy hinungdan nganong midaghan sila pag-ayo bisan asa nako sila dad-on. Apan karon kinahanglan nga mosugod na ako sa pag-atiman alang sa panginahanglan sa akong pamilya." ³¹ Mitubag si Laban, "Unsa may gustong ibayad ko kanimo?" Si Jacob mitubag, "Dili nako gusto nga bayaran mo pa ako sa bisan unsa. Kay kung buhaton mo pa kining mga butanga alang kanako, magpadayon ako sa pag-atiman sa imong mga panon sa kahayopan ug magpanalipod kanila. ³² Tugoti ako nga molakaw ug motan-aw sa tanan nimong mga kahayopan karong adlawa ug lainon gikan kanila ang ang tanang kabang nga mga karnero, ang tanang puntik-puntik nga karnero, ug ang matag itom nga karnero, ang tanang mga kabang nga kanding, ug ang tanang puntik-puntik nga kanding. Gusto ko nga maakoa na sila. Ug sila ang akong mga suhol. ³³ Niana nga pamaagi, sa umaabot nga panahon, masayran nimo kung nagmatinud-anon ako mahitungod sa gibayad mo kanako. Kung ang pipila sa akong mga kanding dili puntik-puntik o kabang, o kung ang uban sa akong mga karnero dili itom, masayran nimo nga kinawat ko sila gikan kanimo." ³⁴ Miuyon si Laban ug miingon, "Sige, atong buhaton ang imong giingon." ³⁵ Apan niana gayong adlaw, gilain ni Laban ang tanang mga lake nga kanding nga adunay itom ug puti nga mga badlis o ang mga puntik-puntikon, ug ang tanang baye nga mga kanding nga puntik-puntikon o kabang, ug ang tanang kanding nga adunay puti, ug ang tanang mga karnero nga mga itom. Gilain niya sila gikan sa ubang kahayopan ug gipaatiman niya sa iyang mga anak nga lalaki. ³⁶ Unya gidala ni Laban ug sa iyang mga anak nga lalaki kining mga kahayopan ug gipapanaw sulod sa tulo ka adlaw gikan sa nahimutangan ni Jacob. Ug nagpadayon si Jacob sa pag-atiman sa uban pang kahayopan ni Laban. ³⁷ Unya miputol si Jacob ug pipila ka mga sanga sa poplar, almona, ug palano nga kahoy. Gibadlis niya ang pagpanit sa gamay nga sanga. Sa niini nga pamaagi, moputi ang pinanitan nga bahin sa mga sanga. ³⁸ Unya gibutang niya ang mga sanga sa pasungan kung asa moinom ang mga kahayopan aron nga makita kini sa panon sa dihang moinom sila ug tubig. ³⁹ Nag-upahay usab ang kahayopan atubangan sa maong mga sanga, ug unya sa wala madugay nanganak ang maong kahayopan ug puntik-puntikon, o mga kahayopan nga kabang, o mga kahayopan nga adunay itom ug puti nga badlis. ⁴⁰ Sa sulod sa pipila ka mga katuigan, ginalain kanunay ni Jacob ang mga baye nga karnero sa panon sa kahayopan ni Laban gikan sa laing karnero ug mga kanding. Sa dihang mag-upahay sila, ipaatubang niya sila sa mga mananap nga adunay itom ug puti nga badlis, ug ngadto sa itom nga mga mananap. Busa nanganak sila nga adunay susamang mga timailhan. Unya malain niya kining mga mananapa gikan sa panon sa kahayopan ni Laban ug giamoma kini alang sa iyang kaugalingon. ⁴¹ Dugang pa niana, kung ang himsog nga bayeng karnero andam na sa pagpaupa, ibutang ni Jacob ang pipila niadtong pinanitan nga mga sanga ngadto sa pasungan diha sa ilang atubangan, aron nga mag-upahay sila atubangan sa mga sanga sa kahoy. ⁴² Apan sa dihang ang luyahon nga mananap andam na usab sa pagpaupa, dili niya ibutang ang mga sanga sa ilang mga pasungan. Busa ipanganak nila ang luyahon nga mga karnero, nga nahiapil sa panon sa kahayopan ni Laban, apan ang mga himsog kabahin sa panon sa kahayopan ni Jacob. ⁴³ Tungod niini, nadato pag-ayo si Jacob. Nanag-iya siya ug danghang panon sa kahayopan. Nanag-iya usab siya ug daghang mga ulipon nga lalaki ug babaye, mga kamelyo, ug mga asno.