¹ Mipadayon si Jacob sa iyang panaw, ug nakaabot siya sa silangan sa kayutaan sa Canaan. ² Didto nakakita siya ug usa ka atabay nga anaa sa uma, ug adunay tulo ka panon sa karnero nga naglubog duol sa atabay. Mao kini ang atabay nga kasagarang kuhaanan ug tubig sa mga magbalantay alang sa ilang mga karnero. Adunay dakong bato nga gitabon sa ibabaw sa atabay. ³ Sa dihang magkatigom na ang tanang panon sa kahayopan didto, magtinabangay ang mga magbalantay aron ipaligid ang bato gikan sa ibabaw sa atabay ug mokabo ug tubig alang sa karnero. Sa dihang mahuman na sila sa pagbuhat niana, itabon nila pagbalik ang bato sa samang dapit ibabaw sa atabay. ⁴ Nianang adlawa, si Jacob nangutana sa mga magbalantay sa karnero nga naglingkod didto, "Asa man kamo gikan?" mitubag, "Gikan kami sa siyudad sa Haran." ⁵ Nangutana siya kanila, "Nakaila ba kamo kang Laban, ang apo nga lalaki ni Nahor?" Mitubag sila, "Oo, nakaila kami kaniya." ⁶ Si Jacob nangutana kanila, "Maayo ba si Laban?" Mitubag sila, "Oo, Maayo siya. Tan-awa! Nagpadulong na dinhi ang iyang anak nga babaye nga si Raquel uban ang mga karnero!" ⁷ Miingon si Jacob, "Apan taas pa ang adlaw sa. Dili pa panahon sa pagtigom sa panon sa kahayopan alang sa kagabhion. Nganong dili man ninyo paimnon una ug tubig ang mga karnero ug unya dad-a pagbalik didto sa sibsibanan?" ⁸ Mitubag sila, "Dili, dili namo kana mabuhat hangtod nga magkatigom dinhi ang panon sa kahayopan ug aron nga maligid na namo ang bato gikan sa ibabaw sa atabay. Pagkahuman niana, mahatagan namo ug tubig ang mga karnero." ⁹ Samtang nakigsulti pa siya kanila, miabot si Raquel uban ang karnero sa iyang Amahan. Siya mao ang nag-atiman sa mga karnero sa iyang amahan. ¹⁰ Sa pagkakita ni Jacob kang Raquel, ang anak nga babaye ni Laban, nga igsoong lalaki sa iyang inahan, ug sa mga karnero ni Laban, miduol siya ug giligid ang bato nga mitabon sa atabay, ug mikuha siya ug tubig alang sa karnero sa iyang uyoan. ¹¹ Unya mihalok si Jacob sa aping ni Raquel, ug misinggit siya sa makusog tungod sa tumang kalipay. ¹² Si Jacob miingon kang Raquel nga siya usa sa mga paryente sa iyang amahan, ang anak nga lalaki sa iyang iyaan nga si Rebeca. Busa midagan siya ug iyang gisultihan ang iyang amahan. ¹³ Sa pagkadungog ni Laban nga anaa didto si Jacob, ang anak sa iyang igsoong babaye, midagan siya aron sa pagtagbo kaniya. Migakos siya kaniya ug mihalok sa iyang aping. Unya gidala niya siya sa iyang pinuy-anan, ug unya gisugilon ni Jacob kaniya ang tanan nga nahitabo kaniya. ¹⁴ Unya miingon si Laban kaniya, "Sa pagkatinuod, kabahin ka sa akong pamilya!" Human niana nagpuyo si Jacob didto ug nagtrabaho alang kang Laban sulod sa usa ka bulan. ¹⁵ Miingon si Laban kaniya “Kinahanglan nga dili ka magtrabaho kanako nga walay suhol tungod kay magparyente kita! Apan sultihi ako kung pila ang gusto nimo nga isuhol ko kanimo." ¹⁶ Karon si Laban adunay duha ka anak nga babaye. Ang ngalan sa iyang kimagulangan mao si Lea, ang iyang kamanghoran ginganlan ug Raquel. ¹⁷ Si Lea adunay maanindot nga mga mata, apan si Raquel adunay maanindot nga pamarog ug maanyag. ¹⁸ Nahigugma si Jacob kang Raquel, ug miingon siya, "Magtrabaho ako alang kanimo sulod sa pito ka tuig. Ug mao kana ang akong bayad aron tugotan mo ako nga makigminyo sa imong kamanghorang anak, nga si Raquel." ¹⁹ Mitubag si Laban, "Mas maayo alang kanako nga tugotan ko ikaw nga makapangasawa kaniya kaysa mabana siya sa laing lalaki! Kinahanglan magpuyo ka dinhi uban kanamo." ²⁰ Busa nagtrabaho si Jacob kang Laban sulod sa pito ka tuig aron mangasawa kang Raquel, apan alang kaniya daw sama lamang kini sa pipila ka mga adlaw, tungod kay hilabihan gayod ang iyang paghigugma kaniya. ²¹ Pagkahuman sa pito ka tuig, si Jacob miingon ngadto kang Laban, "Karon tugoti na ako nga makapangasawa kang Raquel, tungod kay ang atong gikasabotan nga panahon nahuman na, ug gusto na akong mangasawa kaniya." ²² Busa gitigom ni Laban ang tanang katawhan nga nagpuyo didtong dapita ug nagpakombira. ²³ Apan nianang gabhiona, imbis nga si Raquel ang dad-on didto kang Jacob, gidala ni Laban ang iyang kamagulangang anak nga si Lea ngadto kaniya. Apan tungod kay ngitngit na man, wala niya makita nga kadto diay mao si Lea ug dili si Raquel, ug nakigdulog siya kaniya. ²⁴ (Ug gihatag nang daan ni Laban ang iyang ulipon nga babaye nga si Zilpa ngadto sa iyang anak nga si Lea aron mahimo niya nga ulipon.) ²⁵ Sa pagkabuntag na, nakuratan si Jacob sa iyang nakita nga si Lea diay mao ang iyang nakadulog! Busa miadto siya kang Laban ug nasuko siya pag-ayo, "Dili maayo ang imong gibuhat kanako! Dili ba nagtrabaho man ako alang kanimo aron mapangasawa nako si Raquel? Busa nganong gilimbongan mo man ako?" ²⁶ Mitubag si Laban, "Niining yutaa, wala namo nabatasan nga ipaminyo pag-una ang kamanghorang anak sa dili pa maminyo ang kamagulangang anak nga babaye. ²⁷ Human nato matapos ang usa ka simana nga pagsaulog, tugotan ko usab ikaw nga makapangasawa sa akong kamanghoran anak nga babaye. Apan ang balos, kinahanglan nga magbayad ka kang Raquel pinaagi sa pagtrabaho kanako sa laing pito pa katuig." ²⁸ Busa mao kana ang gibuhat ni Jacob. Human sa usa ka simana nga pagsaulog, gihatag ni Laban ang iyang anak nga si Raquel ngadto kaniya, aron mahimo niyang asawa. ²⁹ Gihatag ni Laban ang iyang babayeng ulipon nga si Bilha, ngadto kang Raquel aron mahimo niya nga ulipon. ³⁰ Gipangasawa usab ni Jacob si Raquel, ug gihigugma niya si Raquel labaw pa sa iyang paghigugma kang Lea. Ug nagtrabaho siya kang Laban sa dugang pang pito katuig. ³¹ Sa pagkakita ni Yahweh nga wala kaayo gihigugma ni Jacob si Lea, gipamabdos niya si Lea. Apan si Raquel wala namabdos. ³² Nanganak si Lea ug batang lalaki, nga ginganlan niya ug Ruben. Miingon siya, "Nakita ni Yahweh ang akong pag-antos, ug tungod niana gihatagan niya ako ug anak nga lalaki. Karon, nakasiguro ako nga higugmaon na ako sa akong bana sa akong pagpanganak ug usa ka batang lalaki alang kaniya." ³³ Sa wala madugay namabdos siya pag-usab ug nanganak siya ug laing batang lalaki. Miingon siya, "Tungod kay nadungog man ni Yahweh nga wala ako higumaa sa akong bana, gihatag usab niya kanako kining batang lalaki." Busa ginganlan niya kini ug Simeon, nga nagpasabot, "siya nga nakadungog." ³⁴ Ug sa wala madugay namabdos na usab siya, ug nanganak siya ug laing batang lalaki. Miingon siya, "Karon, nakasiguro nagayod ako nga panggaon na ako sa akong bana." Busa ginganlan niya siya ug Levi, nga nagpasabot, "ang kasuod." ³⁵ Sa wala na usab madugay namabdos na usab siya ug nanganak ug laing batang lalaki. Miingon siya, "Kining panahona dayegon ko si Yahweh," busa ginganlan niya siya ug Juda. Pagkahuman niana, wala na siya manganak pa pag-usab.