¹ Unya gipatawag ni Isaac si Jacob ug gipanalanginan siya. Gisulti niya kini kaniya: "Ayaw pangasawa ug babaye nga Canaanhon. ² Hinuon, lakaw dayon ngadto sa Paddan Aram, didto sa balay sa amahan sa imong inahan nga si Betuel. Hangyoa ang usa sa mga anak nga babaye sa igsoon sa imong inahan nga si Laban aron imong pangasaw-on. ³ Mag-ampo ako nga panalanginan ka sa Makagagahom nga Dios, ug makabaton ka ug daghang kaliwatan, sa paagi nga mahimo silang nagkalain-laing pundok sa katawhan. ⁴ Mag-ampo usab ako nga panalanginan ka niya ug ang imong mga kaliwatan aron makapanag-iya sa yuta nga gikapuy-an ninyo karon ingon nga langyaw, ang yuta nga gisaad sa Dios nga ihatag kang Abraham ug sa iyang mga kaliwatan." ⁵ Busa gipalakaw ni Isaac si Jacob ngadto sa Paddan Aram aron mopuyo uban sa igsoon ni Rebeca nga si Laban nga anak ni Betuel, nga sakop sa pundok sa katawhan sa mga Aramihanon. (Mao kadto si Rebeca ang inahan ni Jacob ug ni Esau.) ⁶ Nasayran ni Esau nga gipanalanginan ni Isaac nga iyang amahan si Jacob ug unya gipaadto niya sa Paddan Aram. Nasayran usab niya nga sa pagpanalangin sa iyang amahan kang Jacob, miingon siya kaniya, "Ayaw pangasawa sa babaye nga mga mga Canaanhon," ⁷ ug gituman ni Jacob ang iyang amahan ug inahan, ug miadto na sa Paddan Aram. ⁸ Nakaamgo usab si Esau nga ang iyang amahan nga si Isaac wala motugot sa mga babaye nga Canaanhon. ⁹ Tungod niana, milakaw si Esau aron makigkita sa iyang paryente nga si Ismael ug nangasawa kang Mahalath, ang anak nga babaye ni Ismael. Si Mahalath igsoon ni Nabaioth ug ang apo nga babaye ni Abraham. ¹⁰ Sa kasamtangan, mibiya si Jacob sa Beersheba ug milakaw paingon sa Haran. ¹¹ Sa pag-abot na niya sa maong dapit, mipahulay siya didto tungod kay gabii naman. Nagkuha siya ug bato didto ug gigamit niya kini ingon nga unlan. Unya mihigda siya ug natulog didto. ¹² Samtang natulog siya, nagdamgo siya ug nakakita siya ug hagdanan. Ang ubos nga bahin sa hagdanan anaa sa kalibotan ug ang ibabaw nga bahin atua sa langit. Nakita usab ni Jacob ang mga anghel sa Dios nga nagsaka-kanaog sa hagdanan. ¹³ Unya nakita niya si Yahweh nga nagtindog tumoy sa hagdanan, nga nag-ingon "Ako ang Dios nga si Yahweh, nga gisimba sa imong apohan nga si Abraham ug gisimba usab ni Isaac . Ihatag ko kanimo ug sa imong mga kaliwatan ang yuta nga imong gihigdaan. ¹⁴ Ang imong kaliwatan managhan sama kadaghan sa abog sa yuta, ug ang ilang utlanan mahimong halapad pag-ayo. Mokaylap kini sa tanang dapit, ngadto sa sidlakan ug sa kasadpan, ngadto sa amihanan ug sa habagatan. Panalanginan ko ang tanan nga kaliwatan ug pundok sa katawhan sa kalibotan pinaagi kanimo ug sa imong mga kaliwatan. ¹⁵ Tabangan ko ikaw ug panalipdan ko ikaw bisan asa ka man moadto, ug dad-on ko ikaw pagbalik niini nga yuta. Dili ko ikaw biyaan; buhaton ko alang kanimo ang tanan nga akong gisaad nga buhaton." ¹⁶ Sa panahon sa kagabhion, nakamata si Jacob, naghunahuna siya, "Nakasiguro ako nga anaa si Yahweh niining dapita, ug hangtod karon wala ako nasayod niini!" ¹⁷ Nahadlok siya, ug miingon, "Makalilisang kining dapita! Mao gayod kini ang dapit kung asa nagpuyo ang Dios, ug mao kini ang ganghaan paingon sa langit!" ¹⁸ Pagkabuntag mibangon si Jacob, gikuha niya ang bato nga iyang giunlanan, ug giugbok niya kini aron timailhan sa dapit diin nagpakita ang Dios kaniya. Gibuboan niya ug gamayng lana sa olibo ang ibabaw sa bato aron igahin kini alang sa Dios. ¹⁹ Ginganlan niya ug Bethel ang maong dapit, nagpasabot "pinuy-anan sa Dios." Kaniadto ginganlan kini ug Luz. ²⁰ Ligdong nga nanumpa si Jacob sa Dios, nga nag-ingon, "Kung tabangan mo ako ug panalipdan mo ako sa akong pagpanaw, ug kung hatagan mo ako ug igo nga pagkaon aron kan-on ug mga bisti aron sul-obon, ²¹ aron nga makabalik ako nga luwas ngadto sa balay sa akong amahan, unya ikaw Yahweh, ang Dios nga akong pagasimbahon. ²² Kining bato nga akong giugbok mahimong timailhan sa dapit diin ikaw nagpakita kanako. Ug akong ihatag pagbalik kanimo ang ikapulo sa tanan nimong gihatag kanako."