¹ Sa natigulang na si Isaac, nahalap na siya. Usa ka adlaw iyang gipatawag si Esau, ang iyang kamagulangang anak nga lalaki, ug miingon ngadto kaniya, "Akong anak?" Mitubag siya, "Ania ako!" ² Miingon si Isaac, "Paminaw kanako. Tigulang na ako kaayo, ug wala ako masayod kung kanus-a ako mamatay. ³ Busa kuhaa karon ang imong pana ug baslayan nga puno sa uhas ug adto sa kabukiran, ug pangayam ug ihalas nga mananap alang kanako. ⁴ Ihawa ang usa ug andama ang labing lamian nga matang sa linuto nga karne nga akong gusto. Unya dad-a kini nganhi kanako aron sa pagkahuman nako sa pagkaon niini, mahatag ko na kanimo ang panalangin sa dili pa ako mamatay." ⁵ Naminaw si Rebeca sa pagsulti ni Isaac sa iyang anak, nga si Esau. Busa sa dihang nakalakaw na si Esau aron mangayam, ⁶ miingon si Rebeca ngadto sa iyang anak, nga si Jacob, "Paminaw kanako. Nadungog nako ang imong amahan nga nakigsulti sa imong igsoon, nga si Esau, nga nag-ingon, ⁷ 'Lakaw ug pangayam sa pipila ka mga ihalas nga mananap ug dad-a kini dinhi, ug lutoa ang labing lamian nga karne, aron nga makakaon ako niini. Unya sa dili pa ako mamatay akong mahatag kanimo ang akong panalangin samtang maminaw si Yahweh.' ⁸ Busa karon, akong anak, buhata kung unsa ang akong isulti kanimo. ⁹ Lakaw ngadto sa panon sa kahayopan ug pag-ihaw ug duha ka pinakatambok nga nating kanding ug dad-a ang karne nganhi kanako. Unya akong lutoan ug lamiang pagkaon ang imong amahan, sa paagi nga iyang gusto. ¹⁰ Ug dad-a kini ngadto sa imong amahan, aron nga makakaon siya niini, ug unya mahatag niya kanimo ang iyang panalangin sa dili pa siya mamatay." ¹¹ Apan miingon si Jacob ngadto sa iyang inahan nga si Rebeca, "Balhibuon ang tibuok lawas sa akong igsoon nga si Esau, apan dili sama niana ang akong pamanit! Hamis ang akong pamanit! ¹² Unsa may mahitabo kung hikapon na ako sa akong amahan? Maamgohan niya nga nanglimbong ako kaniya, ug tungluhon ang akong kaugalingon, ug dili usa ka panalangin!" ¹³ Miingon kaniya ang iyang inahan, " Kung mahitabo man kana, akong anak, ako nalang ang magpatunglo. Buhata kung unsa ang akong gisulti kanimo. Lakaw na ug kuhaa ang mga kanding alang kanako!" ¹⁴ Busa milakaw si Jacob ug giihaw ang duha ka kanding ug gidala niya kini ngadto sa iyang inahan. Unya nagluto ang iyang inahan sa lamiang pagkaon, sama sa gusto sa iyang amahan. ¹⁵ Unya gikuha ni Rebeca ang labing maayong sinina sa iyang kamagulangang anak nga si Esau nga anaa sa tolda, ug gipasul-ob niya sa iyang kamanghoran nga si Jacob, ¹⁶ Gibutang usab niya ang mga balahibo sa nating kanding sa iyang mga kamot ug sa hamis nga bahin sa iyang liog. ¹⁷ Unya gibutang niya sa iyang mga kamot ang pipila ka tinapay ug ang lamian nga pagkaon nga iyang giandam. ¹⁸ Gidala kini ni Jacob ug miadto siya sa iyang amahan ug miingon, "Amahan ko!" Mitubag si Isaac, "Ania ako; kinsa ka man sa akong mga anak?" ¹⁹ Miingon si Jacob ngadto sa iyang amahan, "Ako si Esau, ang imong kamagulangang anak. Gibuhat ko na kung unsa ang imong gisulti kanako. Lingkod ug kaon sa pipila ka karne aron nga panalanginan mo na ako." ²⁰ Apan nangutana si Isaac sa iyang anak, "Akong anak, giunsa mo man pagkakita ug nakapangayam ka dayon sa mananap?" Mitubag si Jacob, "Tungod kay si Yahweh, nga imong gisimba, ang naghimo niini kanako aron magmalampuson." ²¹ Miingon si Isaac ngadto kang Jacob, "Paduol kanako, anak ko, aron nga mahikap ko ikaw ug mahibal-an kung ikaw ba gayod ang akong anak nga si Esau." ²² Busa mipaduol si Jacob sa iyang amahan, nga si Isaac, gihikap siya ni Isaac ug miingon, "Ang tingog mao ang tingog ni Jacob, apan ang mga bukton balhibuon, sama sa mga bukton sa iyang magulang nga igsoon, nga si Esau." ²³ Wala siya nailhi ni Isaac, tungod kay buta na man siya ug ang mga bukton ni Jacob balhibuon man, sama sa iyang magulang nga igsoon nga si Esau. Busa nangandam na si Isaac pagpanalangin kaniya. ²⁴ Apan nangutana una si Isaac, "Ikaw ba gayod ang akong anak nga si Esau?" Mitubag si Jacob, "Oo, ako kini." Miingon si Isaac, ²⁵ "Anak ko, dad-i ako sa imong giluto nga karne, aron nga makakaon na ako niini ug unya mahatag ko na kanimo ang akong panalangin." Busa gihatagan siya ni Jacob, ug gikaon niya kini. Gihatagan usab siya ni Jacob ug bino, ug giinom niya kini. ²⁶ Unya ang iyang amahan, nga si Isaac miingon ngadto kaniya, "Anak ko, paduol ug haloki ako." ²⁷ Busa mipaduol si Jacob kaniya, ug gihagkan siya sa aping sa iyang amahan. Nasimhutan ni Isaac ang baho sa sinina nga gisul-ob ni Jacob. Ang baho niini sama sa sinina ni Esau. Busa miingon siya, "Tinuod gayod, ang baho sa akong anak sama sa baho sa uma nga gipanalanginan ni Yahweh. ²⁸ Gihangyo ko ang Dios nga magpadala kanimo ug yamog gikan sa langit aron mobisbis sa imong kaumahan, ug mao ang hinungdan nga madagayaon ang imong mga abot gikan sa yuta, ug maayong mga abot sa trigo, ug mga ubas alang sa bino. ²⁹ Gihangyo ko nga ang katawhan sa daghang pundok sa katawhan mag-alagad ug moyukbo kanimo. Gihangyo ko nga ikaw ang magdumala sa imong igsoon, ug ang kaliwatan sa imong inahan moyukbo usab kanimo. Gihangyo ko nga ang Dios ang motunglo niadtong motunglo kanimo, ug mopanalangin niadtong magpanalangin kanimo." ³⁰ Human panalangini ni Isaac si Jacob, ug sa pagbiya ni Jacob sa lawak sa iyang amahan, miabot ang iyang magulang nga igsoon nga si Esau gikan sa pagpangayam. ³¹ Giluto ni Esau ang lamian nga putahe ug gidala kini ngadto sa iyang amahan. Miingon siya sa iyang amahan, "Amahan ko, palihog lingkod ug kan-a ang akong giluto, aron nga mapanalanginan mo na ako!" ³² Nangutana kaniya ang iyang amahan nga si Isaac, Kinsa ka man? Mitubag si Esau, "Ako ang imong kamagulangang anak nga si Esau! ³³ Unya nagsugod sa pagpangurog pag-ayo si Isaac. Miingon siya, "Unya kinsa man diay kadtong nagdala kanako ug karne nga inayam, ug nahurot ko kini sa pagkaon? Ania siya dinhi sa wala ka pa miabot. Gipanalanginan ko na siya, ug dili ko na mabakwi pa ang akong panalangin." ³⁴ Sa pagkadungog ni Esau niadtong mga gipamulong sa iyang amahan, mihilak siya sa makusog. Ug nahiubos siya pag-ayo. Miingon siya sa iyang amahan, "Amahan ko, panalangini usab ako! ³⁵ Apan mitubag ang iyang amahan, "Miabot ang imong manghod, gilimbongan ako ug giilog niya ang imong panalangin!" ³⁶ Miingon si Esau, "Husto gayod nga Jacob ang iyang ngalan tungod kay gilimbongan na niya ako sa makaduha. Ang unang higayon mao ang pagkuha niya sa akong katungod sa pagkamagulang, ug niining higayona giilog na usab niya ang akong panalangin. Unya nangutana siya, "Wala ka na bay nahabilin nga panalangin alang kanako?" ³⁷ Mitubag ug miingon si Isaac kang Esau, "Gikasulti ko na nga ang imong manghod magamando kanimo, ug gikasulti ko na nga ang iyang mga kaparyentihan moalagad kaniya. Ug gikasulti ko na usab nga hatagan siya sa Dios ug daghang abot sa trigo ug mga ubas alang sa bino. Busa anak ko, unsa pa man ang mabuhat ko alang kanimo?" ³⁸ Miingon si Esau ngadto sa iyang amahan, "Amahan ko, aduna ka pa bay bisag usa lamang sa imong panalangin? Amahan ko, panalangini usab ako!" Unya mihilak pag-ayo si Esau. ³⁹ Ang iyang amahan nga si Isaac mitubag ug miingon kaniya, "Ang dapit nga imong pagapoy-an layo gikan sa tabonok nga yuta ug gikan sa yamog nga ipadala sa Dios gikan sa langit aron bisbisan ang kaumahan. ⁴⁰ Mangilog ka ug mopatay ka ug tawo aron ka mabuhi, ug maulipon ka sa imong igsoon. Apan kung makahukom ka nga mosupak batok kaniya, makalingkawas ka sa iyang pagdumala." ⁴¹ Tungod sa pagpanalangin sa iyang amahan ngadto kang Jacob, nasuko si Esau sa iyang igsoon. Miingon si Esau sa iyang kaugalingon, "Kung mamatay na ang akong amahan ug mahuman na kami sa pagbangotan alang kaniya, pagapatyon ko si Jacob!" ⁴² Apan nasayran ni Rebeca ang bahad sa iyang kamagulangang anak nga si Esau. Busa gipatawag niya ang iyang kamanghorang anak, ug giingnan niya, "Paminaw kanako. Ang imong magulang, nga si Esau, mohupay sa iyang kaugalingon pinaagi sa pagplano sa pagpatay kanimo, aron manimalos siya sa paglimbong nimo sa inyong amahan. ⁴³ Busa karon, akong anak, paminaw pag-ayo kung unsa ang akong isulti kanimo. Ikyas dayon ug lakaw ug pagpuyo sa akong igsoon nga si Laban, didto sa Haran. ⁴⁴ Pagpuyo sa didto, hangtod mahupay ang kasuko sa imong igsoon. ⁴⁵ Sa dihang malimtan na unya niya kung unsa ang imong gibuhat kaniya, magpadala ako ug mensahe kanimo aron makabalik ka na dinhi. Kay kung patyon ka ni Esau, nan patyon usab siya sa uban, ug unya mamatay ang akong duha ka anak sa samang panahon!" ⁴⁶ Unya miingon si Rebeca ngadto kang Isaac, "Kining langyaw nga mga babayeng gipangawasa ni Esau, nga mga kaliwat ni Heth, nakapasubo sa akong kinabuhi. Kung mangasawa man usab si Jacob sa babaye nga gikan sa kaliwatan ni Heth niining dapita, walay kapuslanan ang akong kinabuhi!"