¹ Sa paglabay sa panahon adunay dakong kagutom sa yuta. Lahi kana sa kagutom nga nahitabo sa dihang buhi pa si Abraham. Busa miadto si Isaac sa habagatang-sidlakan didto sa siyudad sa Gerar aron makigsulti kang Abimelec, ang hari sa mga Felistihanon. ² Apan mipakita si Yahweh kaniya ug miingon "Ayaw paglugsong ngadto sa Ehipto! Puyo sa yuta nga gisulti nako kanimo! ³ Pabilin niining yutaa, ug pagatabangan ug panalanginan ko ikaw, tungod kay ihatag ko kanimo ug sa imong mga kaliwatan kining mga yutaa, ug buhaton ko gayod kung unsa ang akong gisaad sa imong amahan. ⁴ Padaghanon ko pa gayod ang imong mga kaliwatan sama kadaghan sa mga bituon sa kalangitan. Ihatag ko sa imong mga kaliwatan kining tanang kayutaan, ug himuon ko nga panalangin ang imong kaliwatan ngadto sa tanang pundok sa katawhan sa kalibotan. ⁵ Buhaton ko kana tungod kay nagtuman man si Abraham kanako. Gituman niya ang tanan nga akong gisulti nga iyang buhaton, ang tanan nga akong gisugo kaniya nga buhaton, ang tanan nga akong gisulti ug ang tanang mga balaod nga akong gihatag kaniya." ⁶ Busa si Isaac nagpuyo ngadto sa Gerar kauban ang iyang asawa ug mga anak nga lalaki. ⁷ Sa dihang mangutana ang mga kalalakin-an sa Gerar kung kinsa kanang bayhana, motubag si Isaac, "Siya ang akong igsoong babaye." Gisulti niya kini tungod kay nahadlok man siya sa pag-ingon, "Siya ang akong asawa." Kay naghunahuna man siya nga, "Maanyag kaayo si Rebeca nga lagmit makagusto sila kaniya. Ug patyon nila ako aron lamang makuha siya." ⁸ Sa nakapuyo na didto si Isaac sa hataas nga panahon, usa ka adlaw niana, ang hari sa mga Felistihanon nga si Abimelec midungaw sa bintana sa iyang palasyo ug natingala siya sa pagkakita nga si Isaac naghagwa sa iyang asawa nga si Rebeca. ⁹ Busa gipatawag dayon ni Abimelec si Isaac ug giingnan siya, "Karon nasayran na nako nga asawa mo gayod siya! Busa nganong nagsulti ka man nga, 'Siya ang imong igsoon nga babaye'?" Mitubag si Isaac kaniya, "Gisulti ko kadto tungod kay nagtuo man ako nga tingali adunay tawo dinhi nga mopatay kanako aron kuhaon siya." ¹⁰ Miingon si Abimelec, "Wala mo unta kini buhata kanamo! Kay tingali baya may tawo nga nakigdulog na sa imong asawa, ug ikaw unya ang mahimong hinungdan nga masad-an kami sa dakong sala!" ¹¹ Unya gimandoan ni Abimelec ang tanan niyang katawhan, sa pag-ingon, "Ayaw ninyo pasipad-i kining tawhana o ang iyang asawa! Kay si bisan kinsa ang mobuhat niini pagasilotan gayod!" ¹² Nagpugas si Isaac nianang yutaa ug nianang tuiga, ug daghan kaayo ang iyang abot, tungod kay gipanalanginan man siya ni Yahweh. ¹³ Nakabaton pa gayod si Isaac ug daghan pang mga kabtangan, hangtod nga nadato siya kaayo. ¹⁴ Aduna siyay dakong panon sa mga karnero, mga kanding, ug mga baka, ug daghang mga sulugoon. Tungod niana, ang mga Felistihanon nasina kaniya. ¹⁵ Busa ang tanang mga atabay nga kinalot kaniadto sa mga sulugoon sa iyang amahan nga si Abraham, gitabonan sa mga tawo ug yuta. ¹⁶ Unya miingon si Abimelec kang Isaac, "Mas midaghan pa kamo kaysa kanamo, busa gusto ko nga mamahawa na kamo sa among dapit." ¹⁷ Busa namahawa didto si Isaac ug ang iyang pamilya. Nanlakaw sila ug nagtukod sa ilang mga tolda sa walog sa Gerar ug namuyo didto. ¹⁸ Adunay pipila ka mga atabay nianang dapita nga kinalot sa dihang buhi pa ang amahan ni Isaac nga si Abraham, apan gitabonan kini ug yuta sa mga Felistihanon sa pagkamatay ni Abraham. Apan gikalot pag-usab ni Isaac ug sa iyang mga sulugoon ang mga atabay, ug ginganlan ra gihapon ni Isaac ang atabay sama sa gipangalan sa iyang amahan. ¹⁹ Nagkalot ang mga sulugoon ni Isaac sa walog ug nakakaplag sila ug tubod. ²⁰ Apan ang mga kalalakin-an nga magbalantay sa mga kahayopan sa walog sa Gerar nakiglalis sa mga lalaki nga magbalantay sa mga kahayopan ni Isaac. Miingon sila, "Ang tubig niining atabaya amoa!" Busa ginganlan ni Isaac ang atabay ug Esek, nga ang buot ipasabot "panaglalis," tungod kay naglalis man sila kung kinsa ang nanag-iya niini. ²¹ Unya nagkalot ug laing atabay ang mga sulugoon ni Isaac, apan nanag-away sila kung kinsa na usab ang makapanag-iya sa atabay. Busa ginganlan kini ni Isaac ug Sitnah, nga ang buot ipasabot "panagsupak." ²² Unya mipahawa sila didto ug nagkalot ug laing atabay, apan niining panahona wala nay si bisan usa ang nag-away kung kinsa ang makapanag-iya niini. Busa ginganlan niya kini ug Rehobot, nga ang buot ipasabot "walay sulod nga dapit," sa pag-ingon, "Gihatagan kita ni Yahweh ug dapit nga walay sulod aron pagapuy-an, ang dapit nga dili gusto sa ubang mga tawo, ug magmauswagon kita pag-ayo." ²³ Gikan didto mitungas si Isaac ngadto sa Beersheba. ²⁴ Sa unang gabii niya didto, nagpakita kaniya si Yahweh ug nag-ingon, "Ako ang Dios nga gisimba sa imong amahan. Ayaw kahadlok sa bisan unsa. Tabangan ko ikaw ug panalanginan ko ikaw, ug tungod sa akong gisaad sa akong sulugoon nga si Abraham, akong padaghanon pag-ayo ang imong kaliwatan." ²⁵ Busa si Isaac nagtukod didto ug halaran ug naghalad aron sa pagsimba kang Yahweh. Gitukod niya didto ang ilang tolda, ug ang iyang mga sulugoon nagsugod sa pagkalot ug atabay. ²⁶ Samtang nagkalot sila sa atabay, miabot si Haring Abimelec didto kang Isaac nga gikan sa Gerar, kauban si Ahuzzat, ang iyang magtatambag, ug si Phicol, ang pangulo sa iyang mga kasundalohan. ²⁷ Nangutana si Isaac kanila, "Gikasilagan na ninyo ako kaniadto ug gipapahawa. Busa nganong nanganhi man kamo karon kanako?" ²⁸ Ang usa kanila mitubag, "Nakita namo nga gitabangan ka ni Yahweh. Busa nakaingon kami sa usag usa, 'Kinahanglan nga aduna kitay kasabotan tali kanamo ug kang Isaac.' Busa kinahanglan namo mohimo ug malinawon nga pakigsaad nganha kanimo, ²⁹ sa pagpadayag nga dili ninyo kami pasakitan, sa susamang paagi nga wala ka namo pasipad-i. Maayo kanunay ang among pagtagad kaninyo, ug gipalakaw ka namong malinawon. Ug karon gipanalanginan ka na ni Yahweh." ³⁰ Busa nagpakombira si Isaac alang kanila, ug nangaon silang tanan ug naginom. ³¹ Sayo sa kabuntagon nanumpa silang tanan sa usag usa nga ilang buhaton kung unsa ang ilang gisaad. Unya gipapauli sila ni Isaac sa maayong kabubot-on. ³² Nianang adlawa miabot ang mga sulugoon ni Isaac ug misugilon kaniya mahitungod sa atabay nga nahuman na nila ug kalot. Miingon sila, "Nakakaplag kami ug tubig sa atabay!" ³³ Ginganlan ni Isaac ang atabay ug Shiba, nga susama sa Hebreohanong pulong nga ang buot ipasabot "pagpanumpa." Hangtod karon ang lungsod didto ginganlan ug Beersheba nga ang buot ipasabot "atabay sa pagpakigsabot sa kalinaw." ³⁴ Sa nagpanuigon na ni Esau ug 40, naminyo siya kang Judith, ang anak nga babaye ni Beeri, ug ni Basemath, ang anak nga babaye ni Elon. Kining duha ka babaye mga kaliwat ni Heth, dili gikan sa kaliwat ni Isaac. ³⁵ Ang duha ka asawa ni Esau nakapasubo pag-ayo kang Isaac ug kang Rebeca.